Chaka chilichose, Ŵakaboni ŵa Yehova ŵakupanga mavidiyo agho ŵakuwoneska pa maungano ghawo gha Chigaŵa. Ghanandi mwa mavidiyo agha ghakupangika mu Chingelezi. Kasi vikwenda wuli kuti ŵanthu ŵanandi ŵaviyowoyero vyakupambanapambana awo ŵakwiza pa maungano gha chigaŵa nawo ŵapindurenge na mavidiyo agha? Kanandi ŵakuchita kung’anamura mazgu gha mu mavidiyo agha na kujambura mu viyowoyero vyakupambanapambana. Kasi awo ŵakuwonelera mavidiyo agha ŵakupindura wuli?

Wonani ivyo ŵanthu ŵanyake awo Mbakaboni yayi ŵakayowoya ŵati ŵawonelera mavidiyo agha pa Ungano wa Chigaŵa ku Mexico na Central America:

• “Napulikanga waka ivyo vyanguŵa mu vidiyo yayi kweni nane nangujitora nga kuti nili mu vidiyo. Yanifika pa mtima chomene.”—Mwanalume munyake uyo wakiza pa ungano wa mu chiyowoyero cha Chipopoluca ku Veracruz, Mexico.

• “Nangujipulika nga kuti nili waka mu tawuni ya kukwithu, nkhuchezga na mubwezi wane wapamtima. Mavidiyo agha ngawemi chomene kuluska mafilimu, chifukwa napulikiskanga chilichose icho chayowoyeka.”—Mwanalume munyake uyo wakiza pa ungano wa mu chiyowoyero cha Chinahuati ku Nuevo León, Mexico.

• “Nati nawonelera mavidiyo gha mu chiyowoyero chane, nkhajipulika nga kuti ŵanthu ŵa mu vidiyo ŵakuyowoya waka na ine.”—Mwanakazi munyake uyo wakiza pa ungano wa mu chiyowoyero cha Chichol ku Tabasco, Mexico.

• “Gulu ili likuŵikapo mtima chomene pakovwira ŵanthu kuti ŵasambirenge mu chiyowoyero chawo. Palijeso gulu linyake ilo likuchita nthena!”—Mwanakazi munyake uyo wakiza pa ungano wa mu chiyowoyero cha Chicakchiquel ku Sololá ku Guatemala.

Kasi Ŵakaboni ŵa Yehova ŵakufiska wuli kujambura mavidiyo ghawemi nthena, apo ŵakugwiliskira ntchito ŵanthu awo ni nkhwantha yayi pa nkhani ya kujambura panji kuyowoya mu mavidiyo, ndipo kanandi ŵakujambura mazgu gha mu mavidiyo mu vigaŵa vyambura kutukuka?

Mu chaka icho chajumpha, ofesi ya Ŵakaboni ŵa Yehova ku Central America yikalaŵilira mulimo wakujambura mazgu gha mu mavidiyo gha ungano mu Chisipanishi na viyowoyero vinyake 38. Ŵanthu ŵakujipeleka waka 2,500 ŵakawovwirapo pa mulimo uwu. Awo ŵakajamburanga na matimu agho ghakang’anamuranga ŵakachitiranga ntchito iyi mu maofesi gha minthavi, mu maofesi gha kung’anamulirako mabuku, panji mu masitudiyo ghakukolerapo waka agho ŵakapanga. Mazgu gha mu mavidiyo ghakajambulikira mu malo ghakujumpha 20 ku Belize, Guatemala, Honduras, Mexico, na Panama.

Pakakhumbikwiranga kulimbikira na kusanga katundu wakupambanapambana wakupangira masitudiyo. Kuti mu masitudiyo agha muleke kunjira chiwawa, ŵakagwiriskira ntchito vinthu vyambura kusuzga kusanga nga ni mabulangeti na matiresi.

Ŵanandi awo mazgu ghawo ghakajambulika mu mavidiyo ŵakasanganga ndalama zinandi yayi, ntheura ŵakajinora vinthu vinyake kuti ŵalute ku situdiyo iyo yili pafupiko na iwo. Ŵanyake ŵakendanga maora 14! Ku chigaŵa chinyake, dada na mwana wake ŵakenda pafupifupi maora 8 kuti ŵakafike ku situdiyo.

Kwamba wachali muchoko, Naomi wakawovwiranga banja lakwake kupanga masitudiyo ghakukolerapo waka. Iyo wakuti: “Kanandi tikalindiliranga mwakunweka sabata iyo ŵazamwambira kujambura mazgu gha mu mavidiyo. Adada ŵakaŵikangapo mtima chomene pakulongozga mulimo uwu. Nyengo zinyake amama ŵakaphikanga chakurya cha ŵanthu 30 awo ŵajipeleka waka.” Pasono Naomi wakugwira ntchito yakujipeleka pa ofesi yakung’anamulirako mabuku ku Mexico. Iyo wakuti “Ndine wakukondwa chomene kuti nkhupeleka nyengo yane kuti novwire ŵanthu kupulika uthenga wa mu Baibolo mu chiyowoyero chawo chakonkhera. Iyi ni ntchito yakukondweska chomene kuluska yiliyose iyo ningachita.”

Maungano gha chigaŵa gha Ŵakaboni ŵa Yehova ghakuchitika pa charu chose ndipo waliyose ngwakupokelereka. Kuti mumanye vinandi wonani chigaŵa chakuti MAUNGANO GHAKURUGHAKURU pa webusayiti yithu.