Pa November 30 m’paka December 12, 2015, wupu wa United Nations Conference on Climate Change (COP21), ukaŵa na ungano ukuru wa kusintha kwa nyengo ku Paris, France. Pa ungano uwu pakaŵa ŵalendo ŵakufuma mu vyaru 195, ndipo ŵakadumbiskana ivyo ŵanthu ŵangachita chifukwa cha kusintha kwa nyengo. Pakaŵa ŵanthu pafupifupi 38,000, kusazgapo ŵalara ŵa boma, ŵasayansi, ŵakuwona chilengiwa, na ŵamalonda. Ŵanthu ŵanyake ŵanandi ŵakawungana pa malo ghapafupi na ungano uwu kuti ŵapulike vinandi vya kusintha kwa nyengo.

Nangauli Ŵakaboni ŵa Yehova ŵakachita nawo yayi ungano uwu, kweni nawo ŵakukhumba yayi kusakaza chilengiwa. Pa nyengo ya ungano uwu, Ŵakaboni ŵa Yehova ŵanandi ku Paris ŵakapharazga uthenga uwemi wa mu Baibolo wakuti charu chapasi sonosono apa chiŵenge makora.

Kaboni wa Yehova munyake wakapharazgira munthu wa ku Peru uyo ŵakasangana mu galimoto, ndipo wakavwara umo ŵakuvwalira kwawo. Munthu uyu wakati wali na umoyo uwemi ndipo wakukondwa na uko wakukhala chifukwa kuli mapiri ghakutowa. Kweni wakati wakufipa mtima chomene chifukwa cha kusakazika kwa charu. Wakati wapulika uthenga uwemi wa mu Baibolo, wakakondwa chomene ndipo wakapoka kadi la webusayiti yithu ya www.pr418.com.

Apo ŵakaŵa mu sitima yapamtunda, Ŵakaboni ŵa Yehova ŵaŵiri ŵakapharazgira munthu munyake wa vyachilengiwa wa ku America. Munthu uyu wakazizwa chomene kupulika kuti wupu wa Green Building Initiative uli kupeleka masatifiketi ghaŵiri (Four Green Globes) ku Ŵakaboni ŵa Yehova chifukwa cha kujipeleka kupwelelera chilengiwa apo ŵakazenganga maofesi ghanyake ghaŵiri ku Wallkill, New York, United States. Munthu uyu nayo wakapokera kadi la webusayiti yithu.

Ŵanthu ŵanandi ŵakakondwa kumanya kuti Ŵakaboni ŵa Yehova ŵakuŵikapo mtima kupwelelera chilengiwa, ndipo ŵanandi ŵakati ŵamuŵerenga vinandi pa webusayiti yithu. Mulendo munyake uyo wakafuma ku Canada wakapulika kuti Ŵakaboni ŵa Yehova ŵakawoneseska kuti nyama zose, na tuyuni wuwo, ni vyakuvikilirika apo ŵakazenganga ofesi yawo yikuru ku Warwick, New York. Iyo wakati: “Pakwamba nkhaŵa nkhwantha yakupwelelera tuyuni pambere nindambe kuwona vyachilengiwa. Nkhamanyanga yayi kuti Ŵakaboni ŵa Yehova nawo ŵakupwelelera chomene vinyama. Namuŵerenga mabuku ghinu na kuluta pa webusayiti yinu kuti nimanye vinandi vya imwe!”