Nkhakulira ku Tampere, msumba uwo uli kutali na tawuni ku Finland. Banja lakwithu likatemwanga yayi vyakusopa, kweni likawonanga kuti masambiro na nkharo yiwemi ni vyakuzirwa chomene. Amama mba ku Germany, ndipo apo nkhaŵa mwana, kanandi nkhalutanga kwa agogo ku West Germany.

 Kufuma waka pa wana, nkhatemwanga chomene maseŵero. Pakwamba nkhaseŵeranga maseŵero ghose, kweni apo nkhaŵa na vyaka 14 mtima wane wose ukaŵa pa tenisi. Nkhati nafika vyaka 16, nkhanozgekeranga kaŵiri panji katatu pa zuŵa. Nkhaŵa na nkhwantha ziŵiri izo zikanisambizganga ndipo namise nkhayezgeleranga panekha. Maseŵero ghakanikondweskanga chomene; nkhajipulikanga makora chomene para nkhuseŵera tenisi. Kanandi nkhatemwanga kuchezga na ŵanyane ndipo nyengo zinyake tikamwangapo moŵa, kweni chakukondweska ntchakuti nindanjirepo mu masuzgo chifukwa cha moŵa panji kumwa munkhwala wakuzweteska wongo. Umoyo wane wose ukagona pa tenisi.

 Apo nkhaŵa na vyaka 17 nkhamba kuchitako chiphalizgano cha ATP cha maseŵero gha tenisi. a Nkhawinapo viphalizgano vinandi ndipo nkhamba kumanyikwa mu charu chane. Apo nkhaŵa na vyaka 22, nkhaŵa yumoza wa ŵanthu 50 awo ŵakaseŵeranga makora chomene tenisi pa charu chose.

 Nkhenda mu vyaru vinandi chomene kukaseŵera tenisi. Nkhawonanga malo ghanandi ghakutowa, ndipo nkhamanyaso kuti mu vyaru vinandi muli masuzgo nga uchigeŵenga, kugwiliskira ntchito munkhwala ghakuzweteska wongo kweniso kunanga chilengiwa. Mwachiyelezgero, apo tikaŵa ku United States, ŵakatikanizga kwenda mu matawuni ghanyake chifukwa uchigeŵenga ukaŵa ukuru chomene. Vinthu ivi vikanikhwaska chomene. Nangauli nkhachitanga chinthu icho nkhachitemwenga chomene, kweni paumaliro wa zuŵa nkhakhorwanga yayi.

 Chibwezi chane, Sanna, chikamba kusambira Baibolo na Ŵakaboni ŵa Yehova. Ine vikanisekeskanga waka apo ŵakasambiranga, kweni nkhamukanizganga yayi kusambira Baibolo. Tikatorana mu 1990, ndipo pakati pajumpha chaka chimoza, wakabatizika na kuŵa yumoza wa Ŵakaboni ŵa Yehova. Nangauli nkhalutangako yayi ku tchalitchi, kweni nkhagomezganga kuti kuli Chiuta. Nkhakumbuka kuti apo nkhaŵa ku Germany agogo ŵakatemwanga kuŵazga Baibolo nakuti ŵakanisambizganga umo ningalombera.

 Zuŵa linyake Kari na muwoli wake awo Mbakaboni ŵa Yehova ŵakiza kunyumba kwithu, ndipo Kari wakanilongora mauchimi gha mu Baibolo ghakuyowoya vya “mazuŵa ghaumaliro.” (2 Timote 3:1-5) Ivi vikanikhukiska chomene, ndipo nkhamanya chifukwa icho vinthu vyahenipira nthena pa charu. Pa zuŵa ili tikadumbiskana vinandi yayi vyakukhwaskana na chisopa. Kufuma waka pa zuŵa lira, tikamba kudumbiskana vya Baibolo na Kari, ndipo nkhapulikiskanga ivyo nkhasambiranga. Nkhaŵa wakutangwanika kweniso nkhendanga chomene, ntheura tikasambiranga mwakukhazikika yayi. Kweni Kari wakaleka yayi kunisambizga. Wakanizgoranga waka pa makalata mafumbo agho nkhamufumba apo tikasambiranga. Wakanizgora kufuma mu Baibolo mafumbo ghose agho nkhamufumba ghakukhwaskana na umoyo, ndipo pachoko na pachoko nkhamanya uthenga ukuru uwo wuli mu Baibolo, wakuti Ufumu wa Chiuta ndiwo uzamufiska khumbo la Chiuta. Nkhakhozgeka chomene nati namanya kuti zina la Chiuta ni Yehova kweniso kumanya ivyo Chiuta watichitira. (Salimo 83:18) Icho chikanikondweska chomene ntchakuti nkhamanya kuti Chiuta wakapeleka sembe yakuwombora chifukwa chakuti wakutitemwa chomene. (Yohane 3:16) Nkhasambiraso kuti ningaŵa paubwezi na Chiuta na kuzakakhala muyirayira kweniso mwa mtende mu paradiso. (Yakobe 4:8) Nkhamba kujifumba kuti, “Kasi ningalongora wuli kuti nkhuwonga Chiuta?”

 Nkhaghanaghanirapo chomene vya umoyo wane. Apo tikasambiranga Baibolo, nkhasambira kuti munthu wakuŵa wakukondwa zanadi para wakupa, ntheura nkhamba kuphalirako ŵanyane ivyo nkhugomezga. (Milimo 20:35) Pakuti nkhaŵa nkhwantha ya tenisi, nkhafumapo pa nyumba kwa mazuŵa pafupifupi 200 kuti nkhachiteko viphalizgano vya tenisi. Banja lakwithu likanovwira kuti nifiske vilato vyose vyakukhwaskana na kuseŵera tenisi. Kweni nkhawona kuti nkhwenera kusintha.

 Nkhamanya kuti ŵanthu ŵanandi ŵangapulikiska yayi kuti naleka kuseŵera tenisi chifukwa cha kusopa. Kweni kumanya Yehova kweniso kusanga umoyo wamuyirayira ni mwaŵi ukuru chomene kuluska njombe yiliyose iyo ningasanga chifukwa cha kuseŵera tenisi, ntheura vikanisuzga yayi kusankha chakuchita. Ntheura nkheneranga kusulako waka vinthu ivyo ŵanthu ŵangayowoya. Lemba la Salimo 118:6 likanovwira kuti nileke kuwelera nyuma pa ivyo nkhasankha, likuti: “Yehova wali kwa ine, niwopenge chara. Kasi munthu wangachitachi kwa ine?”

 Panyengo iyi, ŵanthu ŵanyake ŵakajipeleka kunisangira nthowa yiwemi chomene iyo yinganovwira kuti nilutilire kuseŵera tenisi vyaka vinandi kwambura kufipa mtima na chilichose. Kweni nkhaŵa kuti nasankha kale chakuchita, ntheura nkhakana ndipo nkhaleka kuseŵera mu chiphalizgano cha ATP. Nkhalutilira kusambira Baibolo ndipo pa July 2, 1994, nkhabatizika na kuŵa yumoza wa Ŵakaboni ŵa Yehova.

 Kwa ine, vikachitika waka yayi kuti nambe kughanaghana vya Chiuta. Kweniso nkhaupenjanga yayi unenesko. Nkhawonanga kuti vyose vili makora waka pa umoyo wane ndipo nizamusoŵerwapo kanthu yayi. Kweni nkhawona kuti unenesko wa mu Baibolo ndiwo ukalindiliranga ine, ndipo nkhasanga kuti umoyo ngwakuzirwa chomene, nakuti sono nkhukondwa chomene kuluska umo nkhaghanaghaniranga! Banja lithu sono ndakukhora ndipo tikukolerana kuluska kumasinda kose. Nkhukondwa kuti ŵana ŵane ŵatatu ŵakulondezga ine, ndipo nawo Mbakaboni ŵa Yehova.

 Nichali kutemwa kuseŵera tenisi. Nkhugwira ntchito zakukhwaskana na maseŵero gha tenisi, nakuti ndiyo yikunovwira kuti nisange sopo na mchere. Kweni nkhutemwa chomene tenisi nga umo nkhachitiranga kale yayi. Pakwamba nkhamaliranga nyengo yinandi kunozgekera kuseŵera tenisi kuti niŵe nkhwantha. Sono pakuti ndine mupharazgi, nkhukondwa kuti nkhumalira nyengo yinandi pakovwira ŵanthu kuti ŵamanye na kulondezga fundo za mu Baibolo izo zikasintha umoyo wane. Nkhukondwa chomene kuti nkhuŵika ubwezi wane na Yehova pa malo ghakwamba kweniso kuphalirako ŵanyane vinthu ivyo nkhugomezga.​—1 Timote 6:19.