Nkhababikira mu tawuni ya Gomba ku Uganda. Mu tawuni iyi, ŵanthu ŵanandi ŵakaŵa ŵakavu. Kukaŵavya magesi, ndipo usiku tikalikiranga nyali.

 Ŵapapi ŵane awo ŵakaŵa ŵalimi, ŵakasamukira ku Uganda kufuma ku Rwanda. Ŵakalimanga khofi na nthochi, ndipo kufuma ku nthochi ŵakapanganga moŵa wakumanyikwa chomene wakuchemeka waragi. Kweniso ŵapapi ŵane ŵakaŵetanga nkhuku, mbuzi, nkhumba, na ng’ombe. Kuyana na mutheto withu kweniso umo nkhakulira, nkhagomezganga kuti mwanakazi wakwenera kupulikira mfumu wake pa chilichose, ndipo wakwenera yayi kuyowoyapo maghanoghano ghake.

 Apo nkhaŵa na vyaka 23, nkhasamukira ku Rwanda. Nkhaluta na ŵanyane ku malo uko ŵanthu ŵakuvinira. Nati nafika kura, uyo wakawoneleranga malo agha, wakanipa khadi kuti ninjire mu holo iyo ŵakaviniranga kwambura kulipira. Nkhawonelerangaso mafilimu ghambembe kweniso ghankhaza. Ivyo nkhawonanga vikanipangiska kuti nambe kutemwa nkhaza kweniso kuloŵera.

 Mu 2000, nkhamba kukhala na mwanakazi munyake zina lake Skolastique Kabagwira, ndipo tikaŵa na ŵana ŵatatu. Kuyana na ivyo ŵakanisambizga apo nkhaŵa mwana, nkhakhazganga kuti para wakunitawuzga panji para wakupempha chinthu wagwadenge. Kweniso nkhawonanga kuti vyose ivyo tikaŵa navyo vikaŵa vyane pera, ndipo ningachita navyo chilichose icho nakhumba. Kanandi nkhafumangapo usiku, ndipo nkhawerangako cha m’ma 3 koloko mulenji, nyengo zinyake nkhaŵanga kuti naloŵelerathu. Para nagogoda ndipo Skolastique wachedwa kujurako, nkhamutimbanga.

 Panyengo iyi, nkhagwiranga ntchito ku kamupani yinyake ndipo ndine nkhawoneleranga ŵanyane. Nkhapokeranga ndalama zinandi. Para nili panyumba, Skolastique wakaninyengeleranga kuti panyake ningamba kusopa ku tchalitchi lake la Pentecostal chifukwa wakaghanaghananga kuti panji ningasintha. Kweni ine nkhakhumbanga yayi kuluta ku tchalitchi lake. M’malo mwake nkhamba chibwezi na mwanakazi munyake. Chifukwa cha nkhaza kweniso uzaghali, Skolastique pamoza na ŵana ŵithu ŵatatu ŵakasama panyumba na kuluta ku ŵapapi ŵake.

 Mubwezi wane uyo wakaŵa mulara kwa ine, wakayowoya nane za umo nkhuchitira vinthu pa umoyo wane. Wakanichiska kuti niweleraneso na Skolastique. Wakaniphalira kuti ŵana ŵane nkhwenera kukhala nawo. Mu 2005, nkhaleka kumwa moŵa, nkhamazga chibwezi ndipo nkhawelerana na Skolastique. Mu 2006 tikatorana mwadango. Ndipouli nkhaŵa kuti nichali kumuchitira nkhaza muwoli wane.

 Mu 2008, yumoza wa Ŵakaboni ŵa Yehova zina lake Joël wakiza kunyumba, ndipo nkhategherezga uthenga wake. Kwa myezi yinandi Joël na Bonaventure nyengo zose ŵakizanga, ndipo tikasambiranga vinandi mu Baibolo. Nkhaŵafumbanga mafumbo ghanandi, chomenechomene kufuma mu buku la Chivumbuzi. Nkhaŵasuskanga chomene Ŵakaboni. Nkhaŵafumba kuti, chifukwa wuli mukuti “mzinda ukuru” uwo ukuzunulika pa Chivumbuzi 7:9 uzamukhala pa charu chapasi, apo vesi ili likuti “ukimilira panthazi pa chitengo [cha Chiuta] na panthazi pa Mwana wa mberere,” Yesu Khristu? Joël wakazgora mafumbo ghane ghose. Mwachiyelezgero, wakanilongora lemba la Yesaya 66:1 ilo Chiuta wakunena charu chapasi kuti “ntchakukandapo malundi” ghake. Mzinda ukuru ukwimilira panthazi pa chitengo cha Chiuta uku uli pano pasi. Nkhaŵerenga pa Salimo 37:29 apo pakuti ŵarunji ŵazamukhala pa charu chapasi kwamuyirayira.

 Pamanyuma, nkhazomera kusambira Baibolo na Joël. Ntheura Bonaventure wakamba kusambira nase Baibolo, ine pamoza na muwoli wane Skolastique. Nati namba kusambira Baibolo, nkhamba kuŵa na khumbo lakuti nisinthe umoyo wane. Nkhasambira kuti muwoli wane nkhwenera kumuchindika. Nkhakhumbangaso yayi kuti wagwadenge para wakunitawuzga panji para wakupempha chinthu kwa ine. Nkhaleka kuwona vinthu ivyo banja lithu lasanga kuti ni vyane pera. Nkhaleka kuwonelera mafilimu ghankhaza. Chikaŵa chipusu yayi kusintha, nkheneranga kujikora kweniso kujiyuyura.

 Pati pajumpha vyaka vichoko waka, mwana wane mulara, Christian nkhakamupeleka ku Uganda kuti wakakhalenge na ŵapapi ŵane. Kweni nati naŵerenga lemba la Dotoronome 6:4-7, nkhamanya kuti ine na muwoli wane ndise Chiuta wali kutipa udindo wakulera ŵana na kuŵasambizga fundo za Yehova. Tikati tamutorako Christian ku Uganda, tose tikaŵa ŵakukondwa.

 Nkhasambira kuti Yehova ni Chiuta walusungu, ndipo nkhugomezga kuti wali kunigowokera vyose ivyo nkhachitanga kale. Nkhukondwa kuti Skolastique nayo wakazomera kusambira Baibolo. Pa Disembala 4, 2010, ine na muwoli wane tikajipatulira kwa Yehova na kubatizika. Pasono tikugomezgana chomene, ndipo tikukondwa kulondezga fundo za mu Baibolo mu banja lithu. Muwoli wane wakukondwa chifukwa para naŵeruka waka ku ntchito, nkhuluta kunyumba. Kweniso wakuwonga chomene chifukwa nkhuchita nayo vinthu mwalusungu kweniso mwantchindi, nili kuleka kumwa moŵa kweniso nili kuleka nkhaza. Mu 2015 nkhimikika kuŵa mulara mu mpingo kuti novwire ŵabali na ŵadumbu. Tili na ŵana 5, ndipo ŵatatu ŵali kubatizika.

 Apo nkhasambiranga Baibolo na Ŵakaboni, nkhazomerezganga waka chilichose icho ŵaniphalira yayi. Kweni nkhakhorwa chifukwa ŵakazgoranga mafumbo ghane kufuma mu Baibolo. Ine na Muwoli wane tikamanya kuti awo ŵakusopa Chiuta waunenesko ŵakwenera kuchita vinthu mwakukolerana na fundo zake. Nkhuwonga chomene kuti Yehova wali kuniguza, ndipo nili mu banja lake lauzimu. Para nkhukumbuka ivyo nkhachitanga kale, nkhugomezga kuti Chiuta wangawovwira munthu waliyose kusintha mikhaliro yiheni na kwamba kumukondweska.