“Usange ukukhumba nadi kumumanya Chiuta, lutilira kusambira na Ŵakaboni ŵa Yehova.” Nkhazizwa chomene nati napulika mazgu agha. Pa nyengo iyi, pakaŵa kuti pajumpha nyengo yichoko waka kufuma apo nkhambira kusambira Baibolo na Ŵakaboni ŵa Yehova. Kweni kuti mupulikiske nkhani iyi, lekani dankha nimuphalirani umo nkhaŵira kale.

 Nkhababikira mu tawuni ya Quezaltepeque, ku El Salvador. Mu banja lakwithu tikaŵamo ŵana 15, ndipo ine nkhaŵa wanambara 6. Ŵapapi ŵane ŵakanisambizganga kuti niŵe wakugomezgeka na kulondezga malango. Nyengo zinandi Leonardo na Ŵakaboni ŵa Yehova ŵanyake, ŵakizanga panyumba kuzakatisambizga Baibolo. Kweni nkhasurako waka ivyo nkhasambiranga ndipo nkhamba nkharo ziheni. Apo nkhaŵa na vyaka 14, nkhamba kumwa moŵa na minkhwala yakuzweteska wongo pamoza na ŵanyane ŵa ku sukulu. Ŵanyane ŵakamba kuleka sukulu na kujoyina gulu la vigeŵenga ndipo paumaliro nane ndivyo nkhachita. Tikamba kutandalira waka kupempha ndalama mu tawuni na kwiba kuti tisange ndalama zakumwera.

 Nkhakolerananga chomene na gulu ili. Nkhagomezgekanga chomene ku gulu ili kuluska chilichose. Mwachiyelezgero, zuŵa linyake munyithu munyake wakaloŵera chomene ndipo wakamba kutimbana na neba wane. Neba wakatimba munyithu uyu na kumukora ndipo paumaliro wakachema ŵapolisi. Nkhakwiya sayizi! Nkhamba kuswa galimoto ya neba na kumuphalira kuti wamuleke munyane. Apo nkhaswanga galimoto, neba wakaniŵeyelera kuti nileke. Kweni nkhaŵa kuti nakwiya uheni, so nkhaphwanya galimoto yose.

 Apo nkhaŵa na vyaka 18, yikaŵako ya mtima bii pakati pa gulu lithu na ŵapolisi. Nkhatora bomba kuti niŵaponye nalo, mbwe nkhasanga kuti laniphulikira mu woko. Nkhamanyanga yayi icho chikachitika. Woko lane likazilirika chomene ndipo paumaliro nkhakomoka. Nkhawukira ku chipatala, ndipo nkhasanga kuti woko lane lamalyero ladumuka, khutu lakumalyero laleka kupulika, ndipo jiso lakumalyero nalo laleka kuwona.

 Nkhati nafuma waka mu chipatala nkhaweleraso ku gulu lane nangauli nkhaŵa kuti nichali wakukomwa. Pakati pajumpha kanyengo, nkhakakika ndipo ŵakanijalira mujele. Uku ndiko nkhazgoka chigeŵenga chakukwana. Nkhachitiranga lumoza vinthu na vigeŵenga vinyake zuŵa lose. Tikaryeranga lumoza chakurya cha mulenji, tikakhweŵanga vyamba, na kwamba kuchezga m’paka nyengo yakugonera.

 Apo nkhaŵa mu jele, Leonardo wakiza kuzakaniwona. Apo tikachezganga, wakawona tatuu pa woko lane la malyero, na kunifumba kuti: “Ukumanya ivyo matatuu ghatatu agha ghakung’anamura?” Nkhamuzgora kuti: “Enya nkhumanya, ghakwimira uzaghali, minkhwala yakuloŵezga, na sumu za rock.” Kweni Leonardo wakaniphalira kuti: “Ine ningati vikwimira chipatala, jele, na nyifwa. Ukaŵa ku chipatala, sono uli mu jele. Ukumanya kale umaliro wake.”

 Ivyo Leonardo wakaniphalira vikanigulura nkhongono. Wakaneneskanga, nkhajijimiranga dindi. Leonardo wakanipempha kuti wambe kusambira nane Baibolo, ndipo nkhazomera. Ivyo nkhasambiranga mu Baibolo vikanovwira kuti nisinthe. Mwachiyelezgero, Baibolo likuti “mendezgano ghaheni ghakunanga nkharo yiwemi.” (1 Ŵakorinte 15:33, mazgu ghamusi) Chakwamba, nkhasanga ŵabwezi ŵawemi. So nkhaleka kuluta ku maungano gha gulu la vigeŵenga, ndipo nkhamba kuluta ku maungano gha Ŵakaboni ŵa Yehova agho ŵakachitiranga mu jele. Ku maungano, nkhakumana na kayidi munyane, zina lake Andrés. Andrés wakabatizikira mu jele na kuzgoka Kaboni wa Yehova. Wakanichema kuti tikalyere lumoza chakurya cha mulenji. So nkhaleka kukhweŵa vyamba. Mulenji uliwose, ine na Andrés tikadumbiskananga mavesi gha mu Baibolo m’malo mwakuti nikhweŵenge vyamba.

 Ŵanyane ŵakawona kuti namba kusintha. So mulongozgi wa gulu la vigeŵenga wakati wakunipenja kuti tidumbiskanepo. Nkhatenthema uheni! Nkhamanyanga yayi ivyo wamuchita para wamanya kuti nkhukhumba kufuma mu gulu, chifukwa ŵakazomerezganga viŵi yayi kuti munthu wafumemo. Wakati: “Tawona kuti sono ukwizako cha para gulu lithu likukumana, m’malo mwake ukuluta ku maungano gha Ŵakaboni ŵa Yehova. Tiphalira ivyo ukukhumba kuchita.” Nkhamuphalira kuti nkhukhumba kulutilira kusambira Baibolo na kusintha nkharo yane. Nkhazizwa chomene apo wakaniphaliranga kuti para ukukhumba nadi kuŵa Kaboni wa Yehova palije suzgo. Wakaniphaliraso kuti: “Usange ukukhumba nadi kumumanya Chiuta, lutilira kusambira na Ŵakaboni ŵa Yehova. Tikumanya kuti ulekenge nkharo ziheni. Wachita makora chomene. Wasankha nthowa yiwemi. Ŵakaboni ŵakovwirenge nadi kuti usinthe. Nane nkhasambirapo nawo apo nkhaŵa ku United States, nakuti ŵabali ŵane ŵanyake Mbakaboni ŵa Yehova. Kopa yayi. Iwe lutizga waka.” Nkhaŵa nichali na wofi, kweni nkhakondwa chomene. Mu mtima nkhawonga waka Yehova. Nkhaŵa nga chiyuni chafuma mu chitatanga. Apa ndipo nkhaghapulikiska mazgu gha Yesu ghakuti: “Mumanyenge unenesko, ndipo unenesko umufwaturaninge.”—Yoh 8:32.

 Ŵanyane ŵanyake ŵakaniyezganga, ŵakanipanga munkhwala wakuloŵezga. Nyengo zinyake nkhatondekanga kujikora, ndipo nkhachitangako. Kweni nkhalutilira kulomba kwa Yehova ndipo mukuluta kwa nyengo, nkhalekerathu vyose.—Salimo 51:10, 11.

 Nkhati nafuma mu jele, ŵanthu ŵakagomezganga kuti namwambiraso nkharo yane yawakawaka, kweni ndimo vikaŵira yayi. M’malo mwake, nkhalutanga ku jele kuti nkhaphalireko ŵanyane ivyo nasambira mu Baibolo. Paumaliro, ŵanyane wose ŵakagomezga kuti nasintha nadi. Kweni chachitima ntchakuti ŵanyake awo nkhaŵachitirapo nkhaza ŵakagomezga yayi kuti nasintha.

 Zuŵa linyake apo tikapharazganga na munyane, gulu linyake la vigeŵenga likatiwukira ndipo likakhumbanga kunikoma. Mubali uyo nkhaŵa nayo wakaŵaphalira mwachikanga kuti sono nili kusintha, niliso chigeŵenga yayi. Ine nkhakhala waka chete. Ŵakanitimba na kuniphalira kuti ningizangamoso cha mu chigaŵa ichi, ndipo paumaliro ŵakatileka kuti tilutenge. Baibolo likanisintha nadi. Niŵenge umo nkhaŵira kale, mphanyi zikasweka penepara. Kweni sono nkhulondezga ulongozgi wa pa 1  Ŵatesalonika 5:15, uwo ukuti: “Muwoneseske kuti paŵavye yumoza wakuwezgera munyake uheni pa uheni, kweni nyengo zose londezgani icho ntchiwemi kwa yumoza na munyake kweniso ku ŵanthu wose.”

 Kufuma waka apo nkhaŵira Kaboni wa Yehova, nkhuyezgeska chomene kuti niŵe munthu wakugomezgeka. Kweni ntchipusu yayi. Kweni Yehova, Baibolo, kweniso ŵabwezi awo nasanga sono ŵanovwira kuti nisinthe. Nkhukhumbaso yayi kuwelera ku umoyo wane wakale.— 2 Petrosi 2:22.

 Pakwamba nkhaŵa munthu wankhaza na wa mtima wakunjoŵe. Sono mphanyi kulije nilutilirenge na umoyo wane wakale. Baibolo lili kunisintha chomene. Nili kuleka nkharo yiheni. Sono nili pa mtende na ŵanthu awo pakwamba nkhaŵachitiranga nkhaza. (Luka 6:27) Nili na ŵabwezi awo ŵakunovwira kuti niŵe na nkharo yiwemi. (Zintharika 13:20) Nkhukondwa chomene na umoyo, ndipo nkhuteŵetera Yehova uyo wali kunigowokera viheni vyose ivyo nkhachitanga.—Yesaya 1:18.

 Mu 2006, nkhanjira sukulu yakusambizga Baibolo awo ŵandatore. Pakati pajumpha vyaka, nkhatora, ndipo sono tili na mwana msungwana. Sono nkhumalira nyengo yane pa kusambizga ŵanthu uthenga wa mu Baibolo uwo ungaŵawovwira. Ndine mulara mu mpingo, ndipo nkhovwira ŵawukirano kuti ŵaleke kuchita mphuvya izo ine nkhachitanga apo nkhaŵa muwukirano. M’malo mwa kujijimira dindi, sono nkhukhozga ubwezi wane na Yehova kuti nizakasange umoyo wamuyirayira uwo Chiuta walayizga.