Banja lithu nda ku Tonga, charu icho chili na virwa pafupifupi 170, kumwera cha kumanjiliro gha zuŵa kwa nyanja ya Pacific. Ku Tonga kulije vinthu vinandi, kulije magesi na galimoto. Panyumba yithu pakaŵa maji gha mu mipopi, ndipo tikaŵa na nkhuku zichoko waka. Para sukulu zajara, ine na ŵakuru ŵane ŵaŵiri, tikawovwiranga adada kulima. Tikalimanga nthochi, viyawo, masimbi na vikhawo. Padera pa kandalama ako adada ŵakakasanganga para ŵagwira tumaganyu, ŵakaguliskangaso vipasi ivyo ŵakalimanga kuti ŵasange ndalama zakovwilira banja. Taŵanthu ŵanandi pa chirwa ichi tikalichindikanga chomene Baibolo ndipo mbumba yakwithu yikakhalanga yayi ku tchalitchi. Kweni tikagomezganga kuti vinthu vingatiyendera makora para tingasamukira ku charu chisambazi.

 Apo nkhaŵa na vyaka 16, asibweni ŵakasamuskira banja lithu ku California, U.S.A. Vikatisuzga chomene kusambira mitheto ya uku! Nangauli tikamba kusangako ndalama, kweni tikakhalanga ku chigaŵa icho ŵanthu ŵanandi ŵakaŵa ŵakavu ndipo kukaŵa ku chinyina cha uchigeŵenga kweniso munkhwala wakuzweteska wongo. Kanandi usiku tikapulikanga kulira kwa futi. Ŵanthu ŵanandi ŵakakhalanga mwawofi chifukwa cha uchigeŵenga. Ndipo ŵanthu ŵanandi ŵakendanga na futi kuti ŵajivikilirenge kweniso kuti ŵamazge mphindano. Nichali na mpholopolo pa nganga iyo ŵakanilasa pa nyengo iyo kukachitika vivulupi.

 Apo nkhaŵa ku sekondare nkhakhumbanga kuti niyanenge na ŵanyane. Mwapachokopachoko nkhamba kwenda mu mapate, kuloŵera, kuchita nkhaza kweniso kugwiliskira ntchito munkhwala wakuzweteska wongo. Pakati pajumpha nyengo nkhamba kutemwa chomene kokeni (cocaine). Nkhamba kwiba kuti nisange ndalama zakugulira munkhwala wakuzweteska wongo. Banja lakwithu likatemwanga chomene kusopa, ndipo likanichenjezganga kanandi waka kuti nileke nkharo ziheni kweni kwa ine vikanjiranga khutu ili na kufumira kunyake. Nkhakakikapo kanandi waka chifukwa cha nkhaza. Nkharo yane yikahenipirangahenipiranga! Paumaliro nkhajalirika mu jele.

 Zuŵa linyake mu 1997, apo nkhaŵa mu jele, kayidi munyake wakaniwona kuti nkhuŵazga Baibolo. Yikaŵa nyengo ya Khisimasi, iyo Ŵatonga ŵanandi ŵakuwona kuti njakupatulika. Kayidi uyu wakanifumba usange nkhumanya ivyo Baibolo likuyowoya vyakukhwaskana na kubabika kwa Khristu. Kweni ine nkhamanyangapo kalikose yayi. Wakanilongora nkhani yakubabika kwa Yesu iyo yili mu Baibolo, ndipo nkhawona kuti vinandi ivyo vikuchitika pa Khisimasi vikuzunulikapo yayi mu Baibolo. (Mateyu 2:1-12; Luka 2:5-14) Nkhazizwa chomene, ndipo nkhakhumbanga kumanya vinandi ivyo Baibolo likuyowoya. Kayidi uyu wakalutanga ku maungano agho Ŵakaboni ŵa Yehova ŵakachitiranga ku jele ili, ntheura nane nkhamba kuluta nayo. Panyengo iyi ŵakasambiranga buku la Chivumbuzi. Nangauli nkhatorangapo vichoko waka pa ivyo ŵakasambizganga, kweni nkhawona kuti vyose ivyo ŵakasambizganga vikafumanga mu Baibolo.

 Kaboni munyake wakanipempha kuti wanisambizgenge Baibolo, nkhakondwa chomene ndipo nkhazomera. Kakaŵa kakwamba pa umoyo wane kusambira kuti Baibolo likuti charu chapasi chizamuŵa paradiso. (Yesaya 35:5-8) Nkhamanyaso kuti usange nkhukhumba kukondweska Chiuta, nkhwenera kusintha vinandi pa umoyo wane. Nkhasambira kuti Yehova wanganizomerezga yayi kunjira mu paradiso usange nichali na nkharo ziheni. (1 Ŵakorinte 6:9, 10) Ntheura nkhaŵikapo mtima kuti nileke mtima wakunjoŵe, kukhweŵa, kuloŵera na kugwiliskira ntchito munkhwala wakuzweteska wongo.

 Mu 1999, kukati kwakhala vyaka vichoko waka kuti nifume mu jele, ŵakanisamuskira ku jele linyake. Nangauli pakajumpha chaka chimoza kwambura kukumanaso na Ŵakaboni ŵa Yehova, kweni nkhaŵikapo mtima kuti nilutilire kuleka nkharo ziheni. Mu 2000, boma la United States likanikanizga kukhala mu charu ichi, ntheura ŵakanitumizga kukwithu ku Tonga.

 Nkhati nafika ku Tonga, nkhakumana na Ŵakaboni ŵa Yehova ndipo nkhambiraso kusambira Baibolo. Nkhatemwanga chomene kusambira, ndipo nkhakondwa kuwona kuti ivyo Ŵakaboni ŵa ku Tonga ŵakasambizganga vikafumanga mu Malemba nga umo ŵakachitiranga Ŵakaboni ŵa ku United States.

 Adada ŵakaŵa na udindo ukuru ku tchalitchi ntheura ŵakamanyikwanga chomene mu chigaŵa chithu. Pakwamba banja lakwithu likakwiya chomene chifukwa nkhasambiranga Baibolo na Ŵakaboni ŵa Yehova. Kweni pamanyuma, ŵapapi ŵane ŵakakondwa chomene kuwona kuti ivyo nkhusambira mu Baibolo vikunovwira kuleka nkharo ziheni.

 Vikanisuzga chomene kuti nileke kumwa moŵa, chifukwa mutheto wa mu chigaŵa chithu ukuzirwiska chomene moŵa. Ŵanalume ŵanandi mu charu chithu ŵakatandaliranga kumwa kava, moŵa uwo ŵakuphika kufuma ku misisi ya sobora. Ntheura nkhati nafika kuno, nkhambiraso mutheto withu, nkhalutanga kukamwa kava usiku uliwose m’paka niloŵere. Suzgo likaŵa lakuti nkhendanga na ŵanthu awo ŵakalondezganga yayi fundo za mu Baibolo. Paumaliro, nkhamanya kuti nkharo yane yikakwiyiskanga Chiuta. Ntheura nkhasintha chifukwa nkhakhumbanga kuti niŵe paubwezi na Chiuta.

 Nkhamba kufika pa maungano ghose gha Ŵakaboni ŵa Yehova. Maungano agha ghakanovwira kuti nileke nkharo ziheni. Mu 2002, nkhabatizika na kuŵa Kaboni wa Yehova.

 Natumbikika chomene chifukwa Chiuta wazikira nane, nga umo likuyowoyera Baibolo kuti: “Yehova . . . wakuzikira chifukwa cha imwe pakuti wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (2 Petrosi 3:9) Chiuta mphanyi wali kuparanya kale charu chiheni ichi, kweni wazikira m’paka sono kuti ŵanthu nga ndine ŵasinthe na kuŵa nayo paubwezi. Nkhuwona kuti nane wanganigwiliskira ntchito kovwira ŵanthu kuti nawo ŵaŵe ŵabwezi ŵake.

 Yehova wanovwira kuti nkharo yane yileke kuhenipirahenipira. Nili kuleka kwibira ŵanthu kuti nisange ndalama zakugulira munkhwala wakuzweteska wongo. M’malo mwake nkhovwira ŵazengezgani ŵane kuti nawo ŵaŵe paubwezi na Yehova. Pakati pajumpha nyengo, nkhasanga muwoli wane wakutemweka, Tea. Pasono tili na mwana yumoza munyamata ndipo tikukondwa chomene mu banja lithu. Tose tikukondwa kusambizga ŵanthu vya chigomezgo icho Baibolo likulayizga kuti tizamukhala na umoyo wamuyirayira kweniso mwamtende mu paradiso pa charu chapasi.