Nkhababikira mu banja likavu ku Tiranë, msumba ukuru wa Albania. Adada ŵakaŵa ŵakugomezgeka chomene mwakuti ŵakagwiranga ntchito kwa maora ghanandi kuti ŵatipwelelere. Kweni nipera ndalama yikaŵanga yakukwana yayi. Apo nkhaŵa muwukirano, chitima chikanikoranga chomene kuwona kuti ndise ŵakavu. Panyengo iyo nkhaŵa muchoko, kanandi nkhaŵavyanga skapato kweniso ni nyengo zose yayi apo tikaŵanga na chakurya chakukwana.

 Nkhamba kwiba apo nkhaŵa kuti nichali muchoko chomene. Nkhaghanaghananga kuti nkhuchita ivi kuti novwire waka banja lakwithu. Mukuluta kwanyengo, ŵapolisi ŵakanikora. Ntheura mu 1988, apo nkhaŵa na vyaka 14, adada ŵakanituma ku sukulu iyo ŵakusambizgirako ŵana kuti ŵasinthe nkharo yiheni. Ku sukulu iyi nkhakhalako vyaka viŵiri ndipo nkhasambira ntchito yakotchelera visulo. Nati nawerako, nkhakhumbanga kuti nigwirenge ntchito kuti nijisangirenge vyakukhumbikwira, kweni ntchito nkhayisanganga yayi. Ŵanthu ŵanandi ku Albania ŵakatondekanga kusanga ntchito chifukwa cha masuzgo gha ndyali agho ghakaŵapo panyengo iyo. Chakuchita chikanisoŵa ndipo nkhamba kuchezgaso chomene na ŵabwezi ŵane ŵakale, ntheura nkhambaso kwiba. Mukuluta kwanyengo, ine na ŵabwezi ŵane tikakakika ndipo tikagwira jele kwa vyaka vitatu.

 Nati nafuma mu jele, nkhalutilira na nkharo yane ya kwiba. Chuma chikendanga makora yayi mu Albania, ndipo charu chikakavuka chomene. Panyengo yakusuzga iyi, nkhapanganga ndalama zinandi chifukwa chakuchita vinthu vyakukanizgika. Pamanyuma pakuti ŵanyane ŵaŵiri awo tikibiranga lumoza na futi ŵakakika, nkhachimbira na kuluta ku charu chinyake kopa kuti ŵanganikaka na kunijalira mu jele kwa vyaka vinandi. Panyengo iyi, nkhaŵa kuti natora muwoli wane, Julinda, ndipo tili na bonda mwanalume.

 Tikaluta ku England. Nkhakhumbanga chomene kuti niŵe na umoyo uwemi pamoza na muwoli wane na mwana wane, kweni chikaŵa chakusuzga chomene kuti nisinthe nkharo yane yakale. Pakati pajumpha nyengo yichoko waka, nkhambaso kuchita viheni. Panyengo iyi nkhamba kuguliska munkhwala wakuzweteska wongo ndipo nkhasanganga ndalama zinandi chomene.

 Kasi Julinda wakajipulikanga wuli apo nkhaguliskanga munkhwala wakuzweteska wongo? Lekani wamuphalirani yekha: “Apo nkhakuranga ku Albania, nkhadokeranga chomene kuŵa musambazi. Nkhaŵa wakunozgeka kuchita chilichose kuti tiŵe na umoyo uwemi. Nkhaghanaghananga kuti ndalama zingasintha umoyo withu, ntheura nkhamukhozgeranga chomene Artan para wakuteta, kwiba, na kuguliska munkhwala wakuzweteska wongo panji niti waka chilichose, chikuru tikupanga nacho ndalama.”

 Mu 2002, umoyo withu ukasintha ndipo khumbo lithu lakuti tiŵe na umoyo wa wofuwofu likamalira penepapo. Ŵakanikora apo nkhanyamura munkhwala unandi wakuzweteska wongo ndipo nkhajalirikaso mu jele.

 Baibolo likamba kusintha umoyo wane pambere namweko nindamanye. Kukwambilira kwa 2000, Julinda wakakumanapo na Ŵakaboni ŵa Yehova ndipo wakamba kusambira nawo Baibolo. Kusambira Baibolo kukaninozgeranga yayi chifukwa nkhaghanaghananga kuti ndakuvuska. Kweni Julinda wakatemwanga chomene kusambira Baibolo. Julinda wakuyowoya kuti: “Nkhababikira mu banja ilo likutemwa vyakusopa, ntheura nkhalitemwanga Baibolo na kulichindika. Nyengo zose nkhakhumbanga chomene kuti nimanye ivyo likusambizga ndipo nkhakondwanga chomene kusambira Baibolo na Ŵakaboni. Vinandi ivyo Baibolo likuyowoya nkhawonanga kuti ni vyakupulikikwa. Ivyo nkhasambira vikanovwira kuti nisinthe vinthu vinyake pa umoyo wane. Ndipouli, nkhaŵa kuti nichali kughanaghana kuti ndalama zingatovwira kuti tiŵe ŵakukondwa m’paka apo Artan wakakakikira. Artan wati wakakika, vikapangiska kuti nisinthirethu maghanoghano ghane. Mwaluŵiro, nkhawamo kuti ivyo Baibolo likuyowoya pa nkhani ya ndalama ni vyaunenesko. Tikachita chilichose icho tingafiska kuti tiŵe ŵasambazi, kweni ndalama zikatipangiska yayi kuŵa ŵakukondwa. Pamanyuma nkhapulikiska kuti nyengo zose nkhwenera kuchita ivyo Chiuta wakukhumba kuti niŵe wakukondwa.”

 Mu 2004, nkhafumiskika mu jele, ndipo pakati pajumpha nyengo yichoko waka nkhakhumbanga kuti nambireso kugura na kuguliska munkhwala wakuzweteska wongo. Ndipouli, Julinda wakaŵa kuti wasintha kaghanaghaniro kake, ndipo ivyo wakaniphalira vikapangiska kuti nighanaghanirepo chomene. Iyo wakati: “Nkhukhumbaso ndalama zako yayi. Nkhukhumba mfumu wane, kweniso nkhukhumba dada wa ŵana ŵane waŵenge panyumba kuti wachezgenge na ŵana ŵake.” Nkhazizwa chomene na ivyo wakayowoya, kweni vikaŵa vyaunenesko. Nkhakhala vyaka vinandi kutali na banja lane. Kweniso nkhaghanaghanirapo pa masuzgo ghose agho nkhasangana nagho chifukwa cha kupenja ndalama munthowa zambura kwenelera. Ntheura nkhaŵikapo mtima kuti nisinthe nthowa zane na kulekerathu kuchezga na ŵabwezi ŵane ŵakale ŵara.

 Nkhakhwaskika chomene nati naluta na muwoli wane kweniso na ŵana ŵane ŵaŵiri ku maungano gha Ŵakaboni ŵa Yehova. Nkhakondwa chomene na ŵanthu ŵaubwezi awo nkhakumana nawo ku malo agha. Mukuluta kwa nyengo, nkhamba kusambira Baibolo.

 Nkhasambira mu Baibolo kuti “kutemwa ndalama ni msisi wa mtundu uliwose wa vinthu vyakupweteka, ndipo pakukuzga chitemwa ichi, ŵanyake . . . ŵajilasa bwekabweka na vyakuŵinya vinandi.” (1 Timote 6:9, 10) Pa ivyo nkhasangana navyo pa umoyo wane, nkhajiwonera nekha kuti ivyo lemba ili likuyowoya ni vyaunenesko! Chitima chikanikora chomene na ivyo nkhachitanga kumanyuma chifukwa vikapweteka chomene banja lane na ine wuwo. (Ŵagalatiya 6:7) Nati nasambira umo Yehova na Mwana wake, Yesu Khristu, ŵakutitemwera nkhamba kusintha nkharo yane. Nkhamba kughanaghanira chomene vya ŵanji m’malo mwa kujighanaghanira nekha, ndipo ivi vikanovwira kuti nambe kuchezga chomene na banja lane.

 Nasanga chandulo chomene chifukwa cha kulondezga ulongozgi wa mu Baibolo wakuti: “Umoyo winu uŵenge wambura kutemwa ndalama, uku mukukhorwa na vinthu ivyo vilipo.” (Ŵahebere 13:5) Pasono nili na mtende wa mu mtima kweniso nili na njuŵi yituŵa. Ivi vyanipa chimwemwe icho nindaŵepo nacho kumanyuma kose uku. Banja lithu lakhora chomene, ndipo tikutemwana chomene.

 Pakwamba nkhaghanaghananga kuti para tili na ndalama zinandi, ndipo tiŵenge ŵakukondwa. Kweni pasono nawona umo kupalamura milandu na kutemwa chomene ndalama vikanipira vyakuŵinya vinandi. Ndise ŵasambazi yayi, kweni nkhujipulika kuti tasanga chinthu icho ntchakuzirwa chomene pa umoyo withu, icho nkhuŵa paubwezi na Yehova Chiuta. Ndise ŵakukondwa zanadi chifukwa cha kumusopa mwakukolerana nga ni banja.