Nkhababikira ku Ciudad Obregón ku mpoto kwa Mexico. Kukwithu tiliko ŵana 9 ndipo ine ndine wa nambara 5. Tikakhalanga kutali na tawuni, uko adada ŵakaŵa na famu yichoko. Ghakaŵa malo ghawemi ghakukhalako. Mu banja lithu tikakolerananga chomene ndipo tikaŵa ŵakukondwa. Kweni apo nkhaŵa na vyaka 5 kukachitika chimphepo chikuru cha hurricane ndipo chikananga famu yithu. Ntheura tikasamukira ku tawuni yinyake.

 Adada vinthu vikamba kuŵayenderaso, kweni ŵakamba kumwa chomene. Ivi vikakhwaska chomene mbumba yithu. Tikamba kwiba ndudu za hona za adada na kukhweŵa. Apo nkhaŵa na vyaka 6 nkhamba kumwa moŵa. Pakati pajumpha nyengo yichoko waka, adada na amama ŵakapatukana. Apa ndipo nkharo yane yikanangikirathu.

 Amama ŵakamba kukhala na mwanalume munyake ndipo ndiwo tikakhalanga nawo. Adada ŵamusangapo ŵakatovwiranga yayi, ntheura tikasuzgikanga chomene chifukwa amama nawo ŵakaŵavya ndalama zakukwana. Ine na ŵana ŵakwithu tikeneranga kugwira maganyu kuti tisange sopo na mchere. Ine nkhapolishanga skapato za ŵanthu, kuguliska buledi, nyuzipepara, babugamu, na vinthu vinyake. Nkhendendekanga mu misika na kusora vyakurya mu mabini.

 Apo nkhaŵa na vyaka 10 munthu munyake wakanichema kuti nkhagwirenge nayo ntchito ku malo ghakutayako viswaswa. Nkhazomera ndipo nkhaleka sukulu na kufumapo panyumba. Ndalama iyo wakanipanga pa zuŵa yikakwananga yayi 1 dola, ndipo wakanipanga chakurya icho wakasoranga ku malo ghakutayako viswaswa. Nkhakhalanga mu kachigongwe ako nkhazenga pafupi na malo agha. Ŵanthu awo nkhakhalanga nawo pafupi ŵakatukanga chomene ndipo ŵakaŵa ŵazaghali. Ŵanandi ŵakagwiliskiranga chomene ntchito munkhwala wakutimbanizga wongo ndipo ŵakamwanga chomene moŵa. Iyi yikaŵa nyengo yakusuzga chomene pa umoyo wane, nkhakhaliranga waka kulira usiku wose kweniso nkhaŵa na wofi. Soni zikanikoranga chomene chifukwa nkhaŵa mukavu kweniso wambura kusambira. Nkhakhala ku malo ghakutayako viswaswa pafupifupi vyaka vitatu ndipo paumaliro nkhasamukira ku tawuni yinyake ku Mexico. Uko nkhasamira nkhagwiranga ntchito zakumunda nga nkhupwelelera maluŵa na thonje, kuwunjika mijuŵa na kujima katofeni.

 Pakati pajumpha vyaka vinayi nkhawelera ku Ciudad Obregón. Nkhamba kukhala na ankhazi awo ŵakaŵa a ng’anga. Usiku nkhalotanga maloto ghakofya ndipo para nawuka nkhasuzgikanga chomene maghanoghano ndipo nkhakhumbanga kujikoma. Usiku unyake nkhalomba kwa Chiuta nkhati: “Fumu, usange muliko, nkhukhumba kumumanyani, ndipo nizamumuteŵeterani umoyo wane wose. Usange kuli chisopa chaunenesko, chonde novwirani kuti nichimanye.”

 Nkhatemwanga chomene vyakusopa. Nakuti apo nkhaŵa muchoko nkhasopapo mu matchalitchi ghanandi chomene, kweni pakaŵavya ilo likanikhorweska. Palije ilo likanovwira kulimanya makora Baibolo panji kunovwira kuti nimumanye makora Chiuta. Mu matchalitchi ghanyake ŵakatemwanga kuyowoya chomene vya ndalama, apo ghanyake ghakatemwanga chomene uzaghali.

 Apo nkhaŵa na vyaka 19, mulamu wane munyake wakaniphalira kuti wakakumana na Ŵakaboni ŵa Yehova ndipo ŵali kumulongosolera ivyo Baibolo likuyowoya pa nkhani ya kugwiliskira ntchito vikozgo pakusopa. Wakaniŵazgira Ekisodo 20:4, 5. Lemba ili likuti ungajipangiranga chikozgo chakuŵaja chara. Vesi 5 likuti: “Ungavisindamiranga chara nesi kunyengeka kuti uviteŵetere, chifukwa ine Yehova Chiuta wako, ndine Chiuta uyo wakukhumba kuti ŵanthu ŵasopenge iyo pera.” Mulamu wane wakanifumba kuti, “Viŵenge kuti Chiuta wakugwiliskira ntchito vikozgo pakuchita minthondwe kweniso wakukhumba kuti tivigwiliskirenge ntchito pakumusopa, chifukwa wuli pera wakukanizga kuvigwiliskira ntchito?” Fumbo ili likanipangiska kuti nighanaghanirepo chomene. Pamasinda tikamba kudumbiskana nkhani zinandi za mu Baibolo. Nkhakondwanga chomene para tikudumbiskana mwakuti nkhawonanga kuti nyengo yikuchepa.

 Zuŵa linyake wakaluta nane ku maungano gha Ŵakaboni ŵa Yehova. Nkhakondwa chomene na ivyo nkhawona na kupulika. Nkhawona kuti na ŵana wuwo ŵakaŵa na vyakuchita, ndipo ŵakayowoyanga makora pa pulatifomu! Mumtima nkhati, ‘Ŵanthu aŵa ŵakusambira vinthu vyapachanya chomene!’ Ŵakaboni ŵa Yehova ŵakanipokelera makora chomene nangauli nkhaŵa na visisi vitali kweniso nkhavwara makora yayi. Nakuti maungano ghakati ghamara, mbumba yinyake yikanichema kuti nkharye chakurya kunyumba kwawo.

 Ŵakaboni ŵa Yehova ŵakanisambizga kufuma mu Baibolo kuti Yehova Chiuta ni Dada wachitemwa, ndipo wakutipwelelera nanga tingapambana kasangiro, mtundu, fuko, masambiro na uko tili kukulira. Iyo wakutemwera yayi. (Milimo 10:34, 35) Nkhamazga njara yane yauzimu. Nkhamba kukondwa na umoyo na kujiwona kuti ndine wakuzirwa chomene.

 Nkhamba kusintha nkharo yane yakale! Nkhaleka kukhweŵa, kuloŵera, na kutuka. Nkhaleka kusungira ŵanyane vyakusingo kweniso nkhaleka kulota maloto ghakofya. Nkhaleka kujiwona kuti ndine wawakawaka, chifukwa cha masuzgo agho nkhakumana nagho apo nkhaŵa muchoko kweniso chifukwa cha kulekera sukulu pa nthowa.

 Nili kutora mwanakazi muwemi uyo wakutemwa chomene Yehova ndipo wakunovwira chomene. Sono nkhwendera mipingo ya Ŵakaboni ŵa Yehova kuti nikhozge na kusambizga ŵabali na ŵadumbu ŵane mwauzimu. Nkhukondwa chomene kuti fundo za mu Baibolo na masambiro agho Chiuta wakupeleka ku ŵanthu ŵake, vyanovwira chomene kuti nijiwonenge mwakwenelera.