Mulaŵiliri munyake wa dera ku Armenia zina lake Artur wakachezgeranga mpingo. Iyo wakasanga kuti ŵabali pa mpingo uwu ŵandayambe upharazgi wa uko kukusangika ŵanthu ŵanandi, kweniso wa mashelufu gha matayala. Artur na muwoli wake Anna pamoza na Kaboni munyake zina lake Jirayr ŵakakhumba kuchiska ŵabali kuti ŵatemwenge chomene upharazgi uwu. Ntheura ŵakatora kashelufu na kukapharazga ku malo uko kukusangika ŵanthu ŵanandi. Ŵakakhala apo pakajumphanga ŵanthu ŵanandi.

 Ŵanthu ŵanandi ŵakanweka na kwamba kutorapo magazini. Kweni pakaŵa ŵanthu ŵanyake awo ŵakakondwa yayi na upharazgi uwu. Ŵasembe ŵaŵiri ŵakiza apo pakaŵa kashelufu ndipo munyake wakatimba kashelufu na lundi. Kufuma apo wakatchaya khofi Mubali Artur kumaso, ndipo magilasi agho wakavwara ghakawa pasi. Artur, Anna, na Jirayr ŵakayezga kudumbiskana nawo mwakuzika, kweni vikaphura kanthu yayi. Wasembe wakadyaka kashelufu ndipo mabuku ghose ghakawa pasi limbwalimbwa. Ŵasembe ŵakayowoyera Ŵakaboni mazgu ghamsinjiro na kuŵawofya chomene, ndipo paumaliro ŵakafumapo.

 Artur, Anna, na Jirayr ŵakaluta kukadandawura ku polisi yapafupi. Ŵakayowoya ivyo vikachitika ndipo ŵakapharazgiraso ŵapolisi na ŵanyake awo ŵakaŵapo. Kufuma apo ŵakaluta nawo kwa mulara wa ŵapolisi. Pakwamba mulara wa ŵapolisi wakakhumbanga waka kumanya ivyo vikachitika. Kweni wapolisi wakazizwa chomene kupulika kuti Artur wakamuwezgera yayi wasembe uyo wakamuswa khofi nangauli Artur wakawonekanga wankhongono chomene. Wapolisi wakaleka kufumba umo vikendera na kwamba kufumba ivyo Ŵakaboni ŵa Yehova ŵakugomezga. Ivi vikapangiska kuti ŵadumbirane maora 4! Wapolisi wakakondwa chomene na ivyo wakapulika, ndipo wakati: “Ichi ndicho ntchisopa!” Pamasinda wakayowoya mwakuseka kuti: “Naneso nkhukhumba kwamba chisopa chenechichi.”

 Zuŵa lakulondezgapo, Artur wakalutaso kukapharazga, ndipo mwanalume munyake uyo wakawonanga ivyo vikachitika wakayima, ndipo wakamuwonga chomene Artur chifukwa cha kujikora na kuleka kuwezgera. Wakayowoyaso kuti wazamuŵachindikaso yayi ŵasembe ŵara chifukwa cha ivyo ŵakachita.

 Mise yake, mulara wa ŵapolisi yura wakamuchemaso Artur kuti walute ku ofesi yake. M’malo mwa kudumbirana vya mulandu wura, wapolisi wakamba kumufumba mafumbo ghanandi ghakukhwaskana na Baibolo. Ŵapolisi ŵanyake ŵaŵiri nawo ŵakiza kuzakategherezga.

 Zuŵa lakulondezgapo, Artur wakalutaso ku ofesi ya mulara wa ŵapolisi yura ndipo wakamulongora mavidiyo ghakulongosora Baibolo. Wapolisi wakakondwa chomene na mavidiyo agha ndipo wakachema ŵapolisi ŵanyake kuti nawo ŵawonelereko.

 Ivyo ŵasembe ŵara ŵakachita vikawovwira kuti ŵapolisi ŵanandi ŵapulike makani ghawemi kakwamba. Ŵapolisi ŵakajiwonera ŵekha kuti Ŵakaboni ŵa Yehova mbanthu ŵawemi chomene.