Bryn, uyo wakukhala ku North Carolina, U.S.A., wali mu Komiti Yakudumbiskana na Chipatala. Komiti iyi yikugwira ntchito pamoza na vipatala kuti yiwovwire ŵalwari awo Mbakaboni ŵa Yehova para ŵakukhumbikwira wovwiri.

 Chifukwa cha muliri wa COVID-19, vipatala vinandi vikazomerezganga yayi ŵanthu kuwona ŵalwari. Bryn wakimbira foni dayilekitara wakuwona za umo chisopa chingawovwilira membara wake ku chipatala, kuti wamanye umo wangawovwilira ŵalwari awo Mbakaboni ŵa Yehova.

 Kweni Bryn wakayowoya na wachiŵiri kwa dayilekitara. Chifukwa chakuti ŵanthu ŵakazomerezgekanga yayi kuwona ŵalwari, Bryn wakapempha usange vingachitika kuti nambara yake ya foni ŵapeleke kwa ŵalwari awo Mbakaboni ŵa Yehova kuti wayowoye nawo. Ndipo wakazomera pempho lake.

 Bryn wakamba kughanaghanira awo ŵakugwira ntchito ku chipatala. Wakaphalira wachiŵiri kwa dayilekitara kuti wakuwonga chomene ntchito iyo ŵachipatala ŵakuchita ndipo wakugomezga kuti ŵali makora. Wakayowoyaso kuti wali kuŵazgapo umo ŵanthu ŵakufipira mtima chifukwa cha muliri, chomenechomene awo ŵakugwira ntchito ku chipatala.

 Wachiŵiri kwa dayilekitara uyu wakazomerezga kuti muliri wa COVID-19 wapangiska ŵanandi ku chipatala kuti ŵafipenge mtima.

 Pamanyuma Bryn wakati: “Webusayiti yithu yili na ulongozgi uwo ungawovwira ŵanthu kuti ŵaleke kufipa mtima. Para mungaluta pa jw.org na kulemba mazgu ghakuti ‘kufipa mtima’ pa chigaŵa cha kufufuzira nkhani, mwamusanga nkhani zakukhozga izo zingawovwira awo mukugwira nawo ntchito.”

 Uku ŵachali kudumbiskana, munthu uyu wakajura pa webusayiti, na kulemba mazgu ghakuti, “kufipa mtima” pachigaŵa chakufufuzira nkhani, ndipo wakasanga nkhani zakupambanapambana. Pamanyuma wakati “Ahaa! Namulongora abwana, nkhani izi zingawovwira chomene awo tikugwira nawo ntchito na ŵanyake. Ni printenge na kugaŵira ŵanthu.”

 Pakati pajumpha masabata ghachoko waka, Bryn wakayowoya na diyilekitala, uyo wakamuphalira kuti ŵakajura pa webusayiti ndipo ŵakaprintapo nkhani zakuyowoya vya kufipa mtima kweniso nkhani izo zikukoleranako na nkhani iyi. Ŵakagaŵira manesi na ŵanthu ŵanyake awo ŵakugwira ntchito ku chipatala.

 Bryn wakati: “Dayilekitara wakaniwonga chifukwa cha ntchito iyo tikuchita kweniso chifukwa cha nkhani zakukhozga izi. Nkhani izi zikaŵawovwira chomene.”