Mu nyengo ya muliri wa COVID-19 iyi, ŵabali na ŵadumbu ŵithu ŵasintha nthowa izo ŵakupharazgira uthenga wakupembuzga wa mu Baibolo. M’malo mwa kukapharazga ku malo agho kukusangika ŵanthu ŵanandi panji kwenda nyumba na nyumba, pasono chomene ŵakupharazgira ŵanji kwizira pa telefoni na makalata. a Ŵanthu ŵanandi ŵakuwonga chomene kuyezgayezga kwawo ndipo vyalongolerathu kuti Yehova ŵakuŵatumbika. (Zintharika 16:3, 4) Wonani viyelezgero vinyake kufuma mu charu chinyake icho ni chilwa.

 Pambere muliri undambe, kanandi Helen wakalutanga kwa mwanakazi munyake kuti wakasambire nayo Baibolo, kweni mwanakazi uyu wakakananga. Ndipouli, kwati kwakhala zuŵa limoza pambere ŵanthu ŵandakanizgike kwenda chifukwa cha muliri wa COVID-19, Helen wakamupa Baibolo na buku la Kasi Baibolo Likutisambizga Vichi? Apo ŵanthu ŵakaŵa kuti ŵakanizgika kwenda, Helen wakayezgaso kumupempha mwanakazi uyu kuti wasambirenge nayo Baibolo, wakamuphalira kuti ŵasambilirenge pa telefoni. Apa sono mwanakazi uyu wakazomera. Wakakondwanga chomene na ivyo ŵakadumbiskananga ndipo wakachedwa yayi kumupempha Helen kuti ŵasambirenge zuŵa lililose. Mwanakazi uyu wakamba kuchitako maungano gha Chikhristu kwizira pa foni. Chakukondweska chinyake ntchakuti padera pakulondezga ivyo wakusambira, mwanakazi uyu wakuphalirakoso ŵanji ivyo wakusambira.

 Nga ntchigaŵa chimoza chakuti ŵapharazgenge, Ŵakaboni ŵa mu mpingo unyake ŵakalembera makalata ŵapolisi ŵa mu chigaŵa chawo kuŵawonga chifukwa cha ntchito yiwemi iyo ŵakuchita. Ŵapolisi aŵa ŵakazizwa chomene na makalata agha. Yumoza wawo wakaphalira Jefferson uyo ni mulara mu mpingo kuti, “Ine nkhatenge Ŵakaboni ŵa Yehova ŵakuŵatinkha ŵapolisi.” Jefferson wakamulongosolera makora na kudidimizga fundo yakuti maghanoghano agha nga utesi. Ŵapolisi ŵakakondwa chomene na makalata agho ŵakapokera mwakuti ŵakaghabatika pa chijaro chakunjilira mu ma ofesi ghawo. Mpolisi munyake wakati: “Ivi vingawovwira ŵanji kuti ŵambe kutiwona mwakwenelera.”

 Edna na Ednalyn wose mbapayiniya ŵanyengozose. b Chifukwa chakuti ŵalije mwaŵi wa intaneti ku nyumba kwawo, ŵakatondekanga kujoyina kuti ŵachite maungano gha mpingo kwizira pa videoconferencing. Iwo ŵakimbira mzengezgani wawo uyo ni Kaboni yayi kuti waŵajoyineko pa Wi-Fi yake ndipo pamanyuma ŵamulipirenge. Mzengezgani wawo uyu wakaŵazomerezga kuti ŵangajoyina kwa ulere. Edna na Ednalyn ŵati ŵamuchemerako mzengezgani wawo ku maungano, iyo wakazomera. Pasono nthena mzengezgani uyu, yumoza wa ŵana ŵake na ŵazukuru ŵake ŵaŵiri ŵakusambira Baibolo na Ŵakaboni ŵa Yehova kweniso ŵakuchita maungano mwakukhazikika.

 Ŵabali na ŵadumbu ŵakamanyiskanga ŵazengezgani ŵawo, awo ŵakugwilira lumoza ntchito na ŵanji vya nkhani yachisanisani iyo yikaŵa kuti yizamudumbika kwizira pa videoconference. Ellaine, uyo wakugwira ntchito ku chipatala chinyake mu chigaŵa icho wakakhalanga, pakwamba wakatondekanga kuchemerako awo wakugwira nawo ntchito. Wakaghanaghananga kuti madokotala ghanyake ghangaŵa kuti ghali na maghanoghano ghakubudika ghakukhwaskana na Ŵakaboni ŵa Yehova. Ndipouli, wakalemba meseji mwaubwezi pa foni na kughachemerako madokotala gha pa chipatala ichi. Kweni Ellaine wakaŵa na wofi kuchemerako madokotala ghaŵiri agho ni mfumu na muwoli. Pamanyuma pa kughanaghanirapo na kulomba, wakasankha kuti waŵalembere meseji kuti nawo ŵakuchemeka. Dokotala mwanakazi wakazgora kuti: “Ukukhumba kuti ninjire chisopa chako?” Ellaine wakazgora kuti maungano agha nga waliyose, nga Ŵakaboni ŵa Yehova pera yayi. Zuŵa lakulondezgapo, Ellaine wakazizwa kuwona kuti ŵakutorana aŵa ndiwo ŵakachelera kujoyina ku maungano. Iyo wakuti: “Pambere maungano ghandamare, dokotala mwanakazi wakanilembera meseji kuti: ‘Aka kanguŵa kakwamba kuŵapo pa maungano gha Ŵakaboni ŵa Yehova. Ghanguŵa ghawemi chomene. Nakondwa chomene. Yewo chomene chifukwa cha kunichemerako.’”

 Ellaine wakachemerako madokotala 20 ndipo wakakondwa chomene kumanya kuti 16 ŵakajoyina ku maungano agha. Pakukora mazgu gha mpositole Paulosi, mudumbu uyu wakuti: “Ndine wakukondwa kuti nafiska ‘kuchita chikanga’ kuphalirako ŵanthu awo nkhugwira nawo ntchito ‘makani ghawemi gha Chiuta.’”—1 Ŵatesalonika 2:2.

 Muliri wapangiska vinthu kuŵa vyakusuzga kwa waliyose. Ndipouli ŵabali na ŵadumbu ŵithu ŵa mu charu ichi kweniso vyaru vinyake ŵakulutilira kuŵa ŵakukondwa na kuwona vinthu mwakwenelera mwakuchita vyose ivyo ŵangafiska kuti ŵawovwire na kukhozga ŵanji.—Milimo 20:35.