Mu 2017, Ŵakaboni ŵa Yehova 12, ŵakamba ulendo wa pa boti kufuma Mosquito (Miskito) chigaŵa cha mu mphepete mwa nyanja ku Nicaragua. Boti ilo ŵakendapo zina lake ni Sturi Yamni. Yumoza mwa awo ŵakaŵa pa ulendo uwu zina lake Stephen wakuti, “Chilato chithu chikaŵa chakuti tikakhozge kagulu ka Ŵakaboni awo ŵakakhalanga ku chigaŵa cha ku mizi na kuŵawovwirako kupharazga makani ghawemi mu chigaŵa chawo icho ntchikuru chomene.”

 Ŵakaboni 12 aŵa ŵakanyamuka kufuma ku Pearl Lagoon mtunda wa makilomita 200 kuti ŵakafike ku Río Grande de Matagalpa. Ŵakamanyanga yayi kuti zina la boti lawo ilo mu chiyowoyero cha ŵanthu ŵa ku Miskito likung’anamura kuti “Makani Ghawemi,” liŵenge na ng’anamuro lapadera ku ŵanthu awo ŵakakhalanga mumphepete mwa mlonga. Kwambura kupenderako maora agho ŵakayimanga usiku, ŵati ŵenda maora 12, ŵakafika ku La Cruz de Río Grande. Ŵakaboni ŵa Yehova 6 ŵakaŵapokelera mwakukondwa ŵabali na ŵadumbu ŵawo mwauzimu.

 Usiku kukachitika soka la chilengiwa. Kukaputa chimphepo chankhongono icho chikiza na chivula chikuru ku Río Grande de Matagalpa. Pati pajumpha kanyengo kachoko waka, maji ghakatutuka chomene mu mlonga ndipo ghakalutilira kututuka kwa mazuŵa ghaŵiri. Nyumba ya Ufumu na nyumba zinandi zikakhwaskika chomene na maji ghakututuka agha. Ŵabali na ŵadumbu awo ŵakiza ku chigaŵa ichi ŵakawovwirapo kuti ŵanthu ŵafume mu nyumba zawo. Ŵanandi ŵakagona mazuŵa ghaŵiri mu nyumba yakudikanya ya Kaboni munyake.

 Pa zuŵa lachitatu, meya wa ku La Cruz wakiza kuzakawonana na Ŵakaboni kuŵapempha kuti ŵawovwirepo. Pakuti boti la Sturi Yamni ndilo lekha likaŵa lankhongono kuti lingenda mu mlonga wa maji ghakututuka, meya wakakhumbanga kuti ŵabali na ŵadumbu ŵithu ndiwo ŵakapelekezgenge ŵanthu awo ŵakovwira kupeleka vyakukhumbikwa ku ŵanthu awo ŵakakhwaskika na maji ghakututuka agha. Ŵakaboni ŵakaŵa ŵakunozgeka kovwirapo.

 Mulenji wakulondezgapo, Ŵakaboni ŵatatu ŵakanyamuka pamoza ŵanthu awo ŵakovwira para kwachitika masoka. Stephen wakuti, “Panyengo iyi mlonga ukaŵa kuti wazura chomene. Makuni ghakurughakuru agho ghakazgulika ghakayenjamanga pachanya pa maji, ndipo maji ghakachimbiranga chomene, ghakendanga mtunda wa makilomita ghakujumpha 18 pa ora lililose.” Nangauli vikaŵa nthena boti likafiska kukafika mu vigaŵa vitatu.

 Ŵakaboni ŵatatu ŵakasangirapo mwaŵi wakupeleka chipembuzgo ku ŵanthu ŵakukhala ku vigaŵa ivi. Ŵakagaŵira magazini ya Wukani! ya mu 2017 iyo yikaŵa na mutu wakuti, “Ivyo Mungachita Para Kwachitika Soka.”

 Ŵanthu ŵa ku vigaŵa ivi ŵakakondwa chomene kupokera wovwiri wakuthupi na wauzimu uwo Ŵakaboni ŵakapeleka. Ŵanyake awo ŵakukhala ku vigaŵa ivi ŵakati “Ŵanthu aŵa mbakukhumbisiska nadi kutovwira mu nyengo zakusuzga.” Apo ŵanyake ŵakati, “Ŵanthu aŵa ŵakutemwa nadi ŵazengezgani ŵawo.” Ŵati ŵawona kujipeleka uko Ŵakaboni aŵa ŵakachita kuti ŵawovwire ŵanyawo na ŵanthu ŵanyake, ŵanthu ŵanandi sono mbakukhumbisiska kutegherezga uthenga wakupembuzga uwo uli mu Baibolo.