Ong-Li ni Kaboni wa Yehova ku Bulgaria. Wakasambiranga Baibolo na mwanakazi munyake zina lake Zlatka. Kweni mfumu wake wakasambirangako yayi. Ong-Li wakuti: “Para tikusambira nkhani zakukhwaskana na mabanja, nkhamuphaliranga kuti ntchiwemi chomene kuti waphalirenge mfumu na ŵana ŵake kuti wakuŵatemwa. Zlatka wakanilaŵiska mwachitima chomene, ndipo wakati iyo wandamuphalirepo mfumu panji mwana wake msungwana wa vyaka 9 kuti wakuŵatemwa!”

 Zlatka wakati, “Nili wakunozgeka kuŵachitira chilichose, kweni ningaŵaphalira yayi kuti nkhuŵatemwa. Umo nili kuŵirako, amama ŵandaniphalirepo kuti ŵakunitemwa, ndipo nindapulikepo kuti agogo ŵakuphalira amama kuti ŵakuŵatemwa.” Ong-Li wakaphalira Zlatka kuti Yehova wakaphalira Yesu kuti wakumutemwa. (Mateyu 3:17) Ong-Li wakaphalira Zlatka kuti wayilombere nkhani iyi, na kupempha Yehova kuti wamovwire kuti nayo wakaphalirenge mfumu na mwana wake kuti wakuŵatemwa.

 Ong-Li wakati: “Pakati pajumpha mazuŵa ghaŵiri, Zlatka wakakondwa chomene na kuniphalira kuti wakalomba kwa Yehova. Afumu ŵake ŵati ŵafika panyumba, wakaŵaphalira kuti wasambira mu Baibolo kuti ntchakuzirwa chomene kuti mwanakazi wachindikenge chomene mfumu wake. Kufuma apo wakaphalira mfumu wake kuti wakumutemwa chomene! Mwana wake msungwana nayo wakati wafika panyumba, Zlatka wakamuvumbatira na kumuphalira kuti wakumutemwa chomene! Zlatka wakaniphalira kuti: ‘Sono chakumtima chawa. Vyaka vyose ivi natondekanga kuyowoya umo nkhujipulikira, kweni sono Yehova wanovwira kuti nitemwenge chomene banja lane.’

 Ong-Li wakayowoyaso kuti: “Pakati pajumpha sabata yimoza, nkhakumana na mfumu wa Zlatka, ndipo wakaniphalira kuti: ‘Ŵanthu ŵaniphaliranga kuti nimukanizge Zlatka kusambira Baibolo na imwe, kweni ningazomera cha, chifukwa ivyo wakusambira vikovwira chomene banja lithu. Sono tikukondwa chomene mu banja lithu ndipo tikupulikana hoo!’”