Irma wakukhala ku Germany, ndipo wali na vyaka pafupifupi 90. Wakachita ngozi ziŵiri zakofya ndipo ŵakamuchita opareshoni kanandi waka. Ntheura wangafiskaso yayi kupharazga nyumba na nyumba nga umo wakachitiranga pakwamba. Irma wakulembera makalata ŵabali ŵake na ŵanyake kuti waŵaphalire ivyo wakugomezga. Makalata agha ghakukhozga chomene ŵanthu na kupembuzga awo ŵaferwa. Ŵanthu ŵakukondwa na makalata agha ndipo ŵanyake ŵakumwimbira foni kupempha makalata ghanyake. Ŵanthu ŵakumulemberaso Irma makalata ghanandi ghakumuwonga na kupemphaso makalata ghanyake. Irma wakuti, “Nane makalata agha ghakunikhozga ndipo ghakunipa nkhongono kuti nilutilire kuchita vyauzimu.”

 Irma wakulemberaso makalata awo ŵakukhala mu nyumba izo ŵakusuzgira ŵachekuru. Irma wakuti: “Muchekuru munyake uyo mfumu wake wali kufwa, wakaniyimbira foni na kuniphalira kuti kalata yane yamukhozga chomene. Wakati wakusunga kalata iyi mu Baibolo lake ndipo kanandi wakuyiŵazga usiku uliwose. Mwanakazi munyake uyo nayo mfumu wake wali kufwa, wakati kalata yane yamukhozga chomene kuluska ivyo wasembe wakupharazga ku tchalitchi kwawo. Wakati wali na mafumbo ghanandi ndipo wakapempha usange wangiza kunyumba kwithu.”

 Munyake wa Irma uyo ni Kaboni wa Yehova yayi wakati wasamira kunyake wakamupempha Irma kuti wamulembere kalata. Irma wakati: “Mwanakazi uyu wakasunganga makalata ghose agho nkhamulemberanga. Mwanakazi uyu wakati wafwa, mwana wane wakaniyimbira foni, ndipo wakati waŵazga makalata ghose agho nkhalemberanga amama ŵake. Wakanipempha usange ningamulengera lusungu na kwamba kumulembera makalata ghanyake kuti nayo wakhozgeke.”

 Irma wakukondwa chomene na uteŵeti wake. Iyo wakuti: “Nkhupempha Yehova kuti walutilire kunipa nkhongono kuti nimuteŵeterenge. Nangauli ningapharazga yayi nyumba na nyumba, kweni nkhuchita ivyo ningafiska.”