•  Kasi kuphotokerana ni vichi?

•  Chifukwa wuli ŵanyake ŵakuphotokerana?

•  Kasi kuphotokerana kuli na uheni wuli?

•  Ivyo ŵanyinu ŵakuyowoya

 Ŵanyake ŵakughanaghana kuti ni para munthu wakuyowoya tumazgu tunyake panji kuchita chinthu chinyake kulongora kuti wakudokera munthu uyo ni mwanalume panji mwanakazi munyake yayi. Kasi ntchiheni kudokera munthu uyo ni mwanakazi panji mwanalume munyako yayi? Viŵi yayi. Msungwana munyake zina lake Ann wakati: “Usange wafikapo kuti ungaŵa na chibwezi ndipo ukudokera munthu munyake, kasi ungamanya wuli kuti nayo wakukukhumba?”

 Mu nkhani iyi, tidumbiskanenge chomene za ŵanthu awo ŵakuphotokera ŵanyawo nga kuti ŵakukhumba kuŵa nawo pa chibwezi kweni ŵakuŵa kuti ŵandanozgeke kuŵa pa chibwezi.

 “Palije suzgo para ukuphotokerana na munthu na chilato chakuti uŵe nayo pa chibwezi. Kweni mbuheni kuchita vinthu ivyo vingapangiska munthu munyake kugomezga kuti ukumukhumba kweni paumaliro ukumusongaso yayi.”—Deanna.

 Ŵanyake ŵakukhumba waka kuti ŵajipulikeko makora. Msungwana munyake zina lake Hailey wakati: “Para mwahuno waphotokerana na munthu munyake, mbwe machero ukuŵa nga ungaphotokeranaso na munyake.”

 Kweni para ukuchita vinthu ivyo vikupangiska munyake kughanaghana kuti ukukhumba kuŵa nayo pa chibwezi kweni ukumusonga yayi, mbwenu ndikuti ukumuseŵeleska waka maghanoghano. Ŵanthu ŵangakayikaso usange ukughanaghana makora. Baibolo likuti: “Munthu wambura mahara wakusekelera na uchindere.”—Zintharika 15:21.

 Hailey wakayowoyaso kuti, “Pakwamba, kuphotokerana kungawoneka kuti nkhuwemi waka, kweni kanandi umaliro wake ukuŵa uheni.”

•   Kungananga mbiri yinu.

   “Munthu uyo wakutemwa kuphotokera ŵanyake, wangawoneka kuti wakujikayikira kweniso kuti wachali mwana. Ungamuwona kuti ngwambura kugomezgeka kweniso kuti wakukhumba waka chinthu chinyake kwa iwe.”—Jeremy.

   Baibolo likuti: “Chitemwa . . . chikupenja vyake pera yayi.”—1 Ŵakorinte 13:4, 5.

   Fundo yakuti mughanaghanirepo: Kasi ni mazgu panji vyakuchita wuli ivyo vingapangiska kuti muphotokeranenge?

•   Kungakwiyiska uyo mukumuphotokera.

   “Ine nkhukhumba yayi kuŵa pafupi na munthu uyo wakutemwa kuphotokera ŵanthu. Nkhuwona kuti wakuniyowoyeska chifukwa chakuti ndine msungwana. Ŵanthu awo ŵakuniphotokera ŵakunighanaghanira yayi, ŵakukhumba waka kujikondweska ŵekha.”—Jaqueline.

   Baibolo likuti: “Waliyose waleke kupenja icho ntchachandulo kwa iyo, kweni icho ntchachandulo kwa munthu munyake.”—1 Ŵakorinte 10:24.

   Fundo yakuti mughanaghanirepo: Kasi muli kughanaghanapo kuti munthu munyake wakumukhumbani kuti muŵe pa chibwezi, kweni paumaliro mukasanga kuti ndimo viliri yayi? Usange zgoro ndakuti enya, kasi mukajipulika wuli? Kasi mungachita wuli kuti muleke kuchita vinthu ivyo vingakwiyiska munyinu?

•   Kungapangiska kuti muleke kusanga chitemwa chanadi.

   “Ine ningatemwa yayi kuŵa pa chibwezi panji kutorana na munthu uyo wakutemwa kuphotokera ŵanyake. Ntchakusuzga kumumanya panji kugomezga munthu uyo wakujibisa.”—Olivia.

   Wamasalimo Davide wakalemba kuti: “Nkhugega awo ŵakujibisa umo ŵaliri.”—Salimo 26:4.

   Fundo yakuti mughanaghanirepo: Kasi mukumuwona wuli munthu uyo wakuphotokera ŵanyake? Kasi ndiyo imwe mungasongana nayo?