Baibolo likukanizga yayi kumwa moŵa mwamahara, kweniso para ntchakuzomerezgeka uko mukukhala. Kweni likukanizga kuloŵera.​—Salimo 104:15; 1 Ŵakorinte 6:10.

 Kweni kasi ungachita wuli usange ŵanyako ŵakukuchichizga kumwa moŵa uku dango la uko ukukhala kweniso ŵapapi ŵako ŵakukukanizga?

•  Ghanaghanirapo vyakufumapo vyake

•  Manyirathu vyakuchita

•  Ivyo ŵanyako ŵakuyowoya

 Nyengo zinyake ŵanyako ŵangawona kuti kumwa moŵa ni nthowa yakusangwirapo waka. Kweni kasi chingachitika ntchivichi paumaliro?

•  Kuswa malango. Kuyana na malango gha uko ukukhala, usange ungamwa moŵa uku ntchakukanizgika ungaŵa na mulandu, ŵangakupoka layisensi ya galimoto, ungapokera chilango, ŵangakulipiska ndalama, ntchito yingamara panji ŵangakujalira mu jele.​—Ŵaroma 13:3.

•  Mbiri yako yinganangika. Moŵa ungapangiska kuti uleke kughanaghana makora. Ndipo nyengo zinyake ungachita panji kuyowoya vinthu ivyo ungajiyimba navyo mulandu paumaliro. (Zintharika 23:31-33) Mazuŵa ghano tekinoloje yaluta panthazi chomene, ntheura ivyo ungachita vingathandazgika mwaluŵiro chomene ndipo vingananga mbiri yako kwa nyengo yitali.

•  Kutondeka kujivikilira. Para munthu waloŵera wangatondeka kujivikilira ndipo nyengo zinyake ŵanthu ŵangamuchitira vyamuziro. Ndipo nyengo zinyake chingaŵa chipusu chomene kuti ŵanyako ŵakunyenge kuchita vinthu viheni panji kuswa malango.

•  Chizgoŵi. Ŵakuchita kafukufuku ŵanyake ŵasanga kuti para munthu wakwamba kumwa moŵa wachali muchoko chikuŵa chakusuzga kuti waleke. Kweniso para munthu wakumwa moŵa kuti wamazge kwenjerwa, phukwa, na vinyake chikuŵa chakusuzga chomene kuti waleke kumwa.

•  Nyifwa. Kafukufuku uwo ukachitika ku United States mu vyaka vyasonosono ukalongora kuti ŵanthu para ŵaloŵera, ŵakuchita chomene ngozi za pa msewu, ndipo mumaminiti 52 ghalighose ŵanthu ŵanandi ŵakufwa. Kafukufuku uwu ukalongoraso kuti mu chaka chimoza ŵachinyamata ŵakujumpha 1,500 ŵa vyaka vya m’ma 21 ŵakafwa pa ngozi chifukwa cha kumwa moŵa. Nanga vingaŵa kuti iwe undamwe moŵa, ungaŵika umoyo wako pa ngozi para ungakwera galimoto uku uyo wakwendeska wamwa moŵa.

 Para wamanyirathu vyakuchita vikovwirenge kugega masuzgo agho ungasangana nagho chifukwa cha kumwa moŵa.

 Fundo ya mu Baibolo: “Munthu wakuchenjera wakuwona ulwani na kubisama.” (Zintharika 22:3) Ntchambura mahara kumwa moŵa usange munthu wakukhumba kwendeska panji kuchita vinthu vinyake ivyo vingakhumbikwira kuti wachite mwakupwelelera chomene.

 Ivyo nichitenge: ‘Nimwenge moŵa pekha para ntchakuzomerezgeka uko nkhukhala, kweniso pa nyengo yakwenelera.’

 Fundo ya mu Baibolo: ‘Muli ŵazga ŵa uyo mukumupulikira.’ (Ŵaroma 6:16) Para ukumwa moŵa chifukwa chakuti ndivyo ŵanyako ŵakuchita, mbwenu uŵenge waka muzga wawo. Kweniso usange ukumwa kuti umazge waka phukwa panji kwenjerwa, ndikuti undasankhe nthowa yiwemi yakumazgira masuzgo.

 Ivyo nichitenge: ‘Nizomerezgenge yayi kuti ŵanyane ŵanichichizgnge kumwa moŵa.’

 Fundo ya mu Baibolo: “Ungaŵanga yayi pamoza na awo ŵakutemwa kumwa vinyo linandi.” (Zintharika 23:20) Para mukuchezga na ŵanthu ŵaheni ŵangamupangiskani kuchita ivyo mukukhumba yayi. Mukuŵika umoyo winu pa ngozi para mukuchezga na ŵanthu awo ŵakumwa chomene moŵa.

 Ivyo nichitenge: ‘Nichezgenge chomene yayi na ŵanthu awo ŵakumwa moŵa mwakujumphizga.’