Baibolo likuti “Yehova waŵanorenge yayi kanthu kawemi awo ŵakwenda mwakunyoloka.” (Salimo 84:11) Kasi ‘kwenda mwakunyoloka’ chikung’anamurachi? Chikung’anamura kukhala umoyo wakulongora kuti mukulutilira kusunga phangano ilo mukachita kwa Yehova apo mukajipeleka kwa iyo. (Mupharazgi 5:4, 5) Kasi mungachita wuli kuti mulutilire kwenda mwakunyoloka pamanyuma pa kubatizika?

Mu nkhani iyi

•  Lutilirani kuzizipizga masuzgo

•  Lutilirani kutonda viyezgo

•  Lutilirani kusazgirako mwamphu winu

 Lemba lakovwira: “Tikwenera kujumpha mu visuzgo vinandi kuti tikanjire mu Ufumu wa Chiuta.”—Milimo 14:22.

 Ng’anamuro lake: Unenesko ngwakuti, Ŵakhristu wose ŵakusangana na masuzgo pa umoyo wawo. Masuzgo ghanyake agho mungasangana nagho nkhususkika panji kusekeka chifukwa chakuti ndimwe Mkhristu. Ghanyakeso ghangaŵa masuzgo gha vya ndalama panji ulwari ndipo waliyose wangakhwaskika na masuzgo ghanthena agha.

 Ivyo mungakhazga: Nyengo zinyake vinthu vingasintha pa umoyo winu, ndipo panji vingasintha mu nthowa iyo imwe mungakondwa nayo yayi. Baibolo likuti vinthu viheni vingawira waliyose—Mkhristu panji yayi.—Mupharazgi 9:11.

 Ivyo mungachita: Pakuti mwamanya kuti mungasangana na masuzgo, nozgekerani ivyo mungazakachita kuti mumarane nagho. Muwonenge kuti masuzgo ghakumupani mwaŵi wakukhozga chipulikano chinu na kumovwirani kuti mugomezgenge chomene Yehova. (Yakobe 1:2, 3) Mukuluta kwa nyengo, namwe mungazakajipulika nga ni mpositole Paulosi uyo wakati: “Mu vinthu vyose, nkhusanga nkhongono mwa uyo wakunipa nkhongono.”—Ŵafilipi 4:13.

 Fundo yakovwira: Sambirani vyakukhwaskana na Yosefe. Mungaŵerenga nkhani yakulongosora umoyo wake mu buku la Genizesi chaputara 37 na 39 m’paka 41. Jifumbani mafumbo agha: Kasi ni masuzgo wuli ghamabuchi agho ghakamuwira, ndipo wakamarana nagho wuli? Kasi Yehova wakamovwira wuli Yosefe?

 Kasi mukukhumba wovwiri wakusazgikira?

•   Ŵazgani nkhani izi:

   “Kasi Ningachita Wuli Para Nasangana na Masuzgo?”

   “Kasi Ndine Wakuzizipizga?”

   “Kasi Mungachita Wuli Para Vinthu Vyasintha”

•   Chitani dawunilodi:

   “Ngati Bambo Kapena Mayi Anu Akudwala”

 Lemba lakovwira: “Waliyose wakuyezgeka para wakopeka na kunyengeka na khumbiro lake.”—Yakobe 1:14.

 Ng’anamuro lake: Tose nyengo zinyake tikuyezgeka na makhumbiro agho para tingaghalekelera, ghangatipangiska kuti tibude.

 Ivyo mungakhazga: Pamanyuma pa kubatizika, namwe nyengo zinyake mungasuzgika na “makhumbiro gha thupi.” (2 Petrosi 2:18) Mungayezgeka kuti mugonane na munthu uku mundatorane.

 Ivyo mungachita: Nozgekeranithu maghanoghano ghinu sono—pambere mundayezgeke—mwakuti muzakaleke kulongozgeka na makhumbiro ghinu pa kusankha chakuchita. Kumbukani kuti Yesu wakati: “Palije uyo wangateŵetera nga ni muzga wa mabwana ghaŵiri.” (Mateyu 6:24) Mungasankha uyo waŵenge bwana winu. Sankhani Yehova. Nanga vingaŵa kuti khumbiro liheni ilo ndankhongono wuli, kweni mungasankha kuleka kulilondezga.—Ŵagalatiya 5:16.

 Fundo yakovwira: Manyani ivyo mukuchita makora na ivyo mukutondeka. Sankhani ŵabwezi awo ŵangamovwirani kuŵa na makhaliro ghawemi. Gegani ŵanthu, malo, na vyakuchitika ivyo vingapangiska kuti chiŵe chakusuzga kuchita icho ntchiwemi.—Salimo 26:4, 5.

 Kasi mukukhumba wovwiri wakusazgikira?

•   Ŵazgani nkhani izi:

   “Kodi Ndingatani Kuti Ndisamagonje Poyesedwa?”

   “Kasi Ningachita Wuli Kuti Nileke Kughanaghanira Waka vya Kugonana?”

   “Kodi Mungatani Kuti Musamangotengera Zochita za Anzanu?”

   “Kasi Mukutolera Maghanoghano gha Yehova?”

 Lemba lakovwira: “Waliyose wa imwe walutilire kulimbikira . . . m’paka paumaliro . . . mwakuti muleke kuŵa ŵachizita.”—Ŵahebere 6:11, 12.

 Ng’anamuro lake: Munthu uyo wakuleka kuŵikako mahara ku ivyo wakuchita wangakaŵa yayi kugongowa panji kwamba kuchita chizita.

 Ivyo mungakhazga: Mukwenera kuti mukakondwa chomene kweniso mukaŵa ŵamwamphu mwati mwabatizika waka. Mukamutemwanga chomene Yehova. Kweni mukuluta kwa nyengo, mungamba kuwona kuti ntchakusuzga kupulikira Yehova pa chilichose, ndipo ivi vingamugongoweskani na kumupangiskani kuti mwamphu winu uchepe.—Ŵagalatiya 5:7.

 Ivyo mungachita: Lutilirani kuchita icho ntchakwenelera, nanga mphanyengo iyo mtima winu ukukhumba yayi. (1 Ŵakorinte 9:27) Pa nyengo yimozamoza, sendelerani kufupi chomene na Adada ŵinu ŵakuchanya ndipo mungachita nthena para mukuŵikapo mtima kuŵamanya makora na kulomba kwa iwo pafupipafupi. Chinyakeso ntchakuti mukwenera kulutilira kuŵa paubwezi na awo ŵakutemwa kuteŵetera Yehova.

 Fundo yakovwira: Kuluwa yayi kuti Yehova wakumutemwani chomene ndipo ngwakunozgeka kumovwirani. Lekani kuchimbilira kughanaghana kuti wakhuŵara namwe usange mwaleka kuŵa na mwamphu uwo mukaŵa nawo pakwamba. Baibolo likuti: “Wakuŵapa nkhongono ŵakuvuka, nkhongono zinandi ku awo ŵalije nkhongono.” (Yesaya 40:29) Mukuluta kwa nyengo, iyo wazamumutumbikani apo mukuyezgayezga kuti muŵeso ŵamwamphu nga ni kale.

 Kasi mukukhumba wovwiri wakusazgikira?

•   Ŵazgani nkhani izi:

   “Ŵanyamata na Ŵasungwana ‘Lutilirani Kusanga Chiponosko Chinu’”

   “Kodi Ndingatani Kuti Kulambira Mulungu Kuzindisangalatsa?”

•   Wonelerani:

   Ivyo Ŵanyinu Ŵakuyowoya—Uwu Ndiwo Mbumoyo

 Fundo yakuzirwa: Para mukwenda mwakunyoloka, mukondweskenge mtima wa Yehova! (Zintharika 27:11) Iyo wakondwenge kuti mwasankha kuŵa ku chigaŵa chake, ndipo wamupaninge vyose ivyo mukukhumbikwira kuti mutonde mauryarya gha Satana.