“Zuŵa lililose pakuchitika vinthu vinyake ivyo vingavumbura usange mfumu na muwoli mbakuzikira panji yayi. Awo ŵandatore panji kutengwa ŵangapulikiska yayi kuzirwa kwa kuŵa munthu wakuzikira. Kweni kuzikira nkhwakuzirwa chomene kuti nthengwa yinu yendenge makora.”—John.

•  Chifukwa wuli mukwenera kuzikira?

•  Kasi mungachita wuli kuti muzikirenge?

•  “Kuzikira nkhwakuzirwa chomene”

•   Para mwatorana ndipo mukuwona ivyo munyinu wakuchita makora yayi

   “Para pajumpha nyengo ntchipusu chomene kuwona waka ivyo munyinu wakuleka kuchita makora. Para maghanoghano agha ghajintha misisi, ukutondeka kuwukora mtima.”—Jessena.

•   Mungayowoya kwambura kughanaghanirapo para ndimwe ŵambura kuzikira.

   “Nkhuchimbilira kuyowoya maghanoghano ghane, kweni paumaliro nkhujiyimba mulandu kuti nindayowoye makora. Nizikirenge mphanyi nkhughanaghanirapo dankha usange ivyo niyowoyenge ni vyamahara panji yayi.”—Carmen.

   Baibolo likuti: “Chitemwa chikuzikira ndipo ntchalusungu.” (1 Ŵakorinte 13:4) Nyengo zinyake mungaghanaghana kuti ŵanthu ŵaŵiri awo ŵakutemwana chomene ŵachitenge vinthu mwakuzikira. Kweni ndimo viliri yayi. John uyo tamuzunura kukwambilira wakati: “Nga umo vikuŵira na makhaliro ghanyake ghawemi, vikuŵa vyakusuzga chomene kuti munthu wazikirenge, nakuti mukhaliro uwu ukuchedwa yayi kumara. Munthu wakwenera kuyezgayezga kuti walutilire kuŵa wakuzikira.”

•   Para vinyake vyamukwenyerezgani.

   Mwachiyelezgero: Para ivyo mfumu panji muwoli winu wachita vyamukwenyerezgani, icho chikwiza dankha mu mutu winu ntchakuti muwezgere.

   Fundo ya mu Baibolo: “Ungakwiyanga luŵiro chara, chifukwa vindere ndivyo vikukaŵa yayi kukwiya.”—Mupharazgi 7:9.

   Kasi mungachita wuli kuti muzikirenge? Muzikirenge dankha pambere mundayowoye. Lekani kuchimbilira kughanaghana kuti mfumu panji muwoli winu wachitira dala kuti wamukhuŵazgani. Buku linyake likuti: “Taŵanandi tikukhuŵara luŵiro na ivyo munyithu wayowoya chifukwa chakuti tikughanaghanira waka kuti wakhumbanga kutikhuŵazga!”—Fighting for Your Marriage.

   Para mfumu panji muwoli wamukwiyiskani, mungachita makora kuzikira dankha. Ivi viwovwirenge kuti muleke kugazgana. Baibolo likuti: “Para nkhuni palije, moto ukuzimwa.”—Zintharika 26:20.

   “Para mwamba kuwona kuti muwoli winu ni mulwani winu, mungachita makora kughanaghanira dankha ivyo vikumutumani kuti mumutemwenge, ndipo chitanipo kanthu kuti mulutilire kumutemwa.”—Ethan.

   Fundo yakuti mughanaghanirepo:

  •  Kasi mukuchita wuli para muwoli panji mfumu winu wamukhuŵazgani?

  •  Kasi muzamulongora wuli kuti ndimwe ŵakuzikira para wazakamukhuŵazganiso?

•   Para munyinu wakumukhuŵazgani mwakuwerezgawerezga.

   Mwachiyelezgero: Nyengo zose mfumu panji muwoli winu wakuchedwa pakuchita vinthu ndipo mukumulindilira nyengo yitali, ivi vikumukwiyiskani.

   Fundo ya mu Baibolo: “Lutilirani kuzizipizgirana na kugowokerana na mtima wose.”—Ŵakolose 3:13.

   Kasi mungachita wuli kuti muzikirenge? Mughanaghanirenge ivyo vingawovwira nthengwa yinu m’malo mwa kughanaghanira waka vya imwe pera. Jifumbani kuti, ‘Kasi nthengwa yithu yingakhora panji kutimbanizgika para nyengo zose nkhughanaghanira waka ivyo munyane wachita?’ Kuluwa yayi kuti “tose tikukhuŵara nyengo zinandi.” (Yakobe 3:2) Fundo iyi yikulongora kuti namwe muli na vinyake ivyo mukuchita makora yayi.

   “Nyengo zinyake nkhuzikira para mubwezi wane wanikhuŵazga, kweni vikunisuzga chomene kuzikira para mfumu wane wanikhuŵazga. Nkhuwona kuti ntchifukwa chakuti mfumu wane nkhukhala nayo nyengo zose, ntheura nkhumanya ivyo wakubudiska. Kweni para nkhuzikira vikulongora kuti nkhumutemwa chomene mfumu wane na kumuchindika, ndipo ivi ni vyakuzirwa chomene kuti nthengwa yithu yendenge makora.”—Nia.

   Fundo yakuti mughanaghanirepo:

  • Kasi mukuzikira para mfumu panji muwoli winu wamukhuŵazgani?

  • Kasi muzamulongora wuli kuti ndimwe ŵakuzikira para wazakamukhuŵazganiso?