Enya, Baibolo likayowoyerathu kuti vyakuchita vya ŵanthu vizamuhenipirathu mu mazuŵa ghithu ghano. Likayowoyerathu kuti ŵanthu ŵazamukana kulondezga fundo zapachanya pa nkhani ya chiwemi na chiheni ndipo ŵazamuchitanga nkharo ziheni. a (2 Timote 3:1-5) Ndipouli Baibolo likayowoyaso kuti ŵanthu ŵanyake ŵazamutolerako yayi nkharo zawakawaka zanthena izi. M’malo mwake, na wovwiri wa Chiuta ŵanthu aŵa ŵazamuŵikapo mtima kukana nkharo ziheni izi, na kusambira kuchita vinthu mu nthowa iyo Chiuta wakukondwa nayo.—Yesaya 2:2, 3.

Mu nkhani iyi

•  Kasi Baibolo likayowoyerathu vichi pankhani ya vyakuchita vya ŵanthu mu nyengo yithu yino?

•  Kasi mtima wa kujighanaghanira ŵekha uwo ŵanyake ŵali nawo ukukhwaska wuli ŵanji?

•  Chifukwa wuli vyakuchita vya ŵanthu vikuhenipirahenipira?

•  Kasi tikwenera kuchita wuli apo makhaliro gha ŵanthu ghakuhenipira chomene?

•  Kasi ndikuti waliyose wambenge kuchita vinthu viheni?

•  Kasi kuchita vya chiwawa ndiwo uŵenge waka umoyo wa ŵanthu wose?

 Baibolo likuyowoya vya makhaliro ghaheni ghanandi chomene agho ghakwamba chifukwa cha mtima wa kujighanaghanira wekha. Ŵanthu ŵazamuŵa “ŵambura kujikora,” “ŵakujitemwa,” kweniso “ŵakutemwa vyakusanguluska m’malo mwa kutemwa Chiuta.”—2 Timote 3:2-4.

 Nga umo uchimi uwu ukayowoyera, pasono ŵanthu ŵakujighanaghanira waka ŵekha, ŵakujipenjera icho ntchachandulo kwa iwo, ndiposo ŵakuchita chilichose icho ŵangafiska kuti iwo pera vinthu viŵayenderenge makora pa umoyo wawo. Mtima wanthena uwu wazara chomene pasono, mwakuti ŵanthu ŵanandi ŵakukhumba waka kuti iwo ndiwo ŵaŵenge pakwamba nyengo zose. Ŵanandi ŵakupenja icho ntchachandulo kwa iwoŵene ndipo ŵali kuleka “kutemwa uwemi,” nakuti ŵali kuluwako vyakuti ku charu kuli makhaliro ghawemi. Ŵanthu ŵanandi mbambura “kuwonga,” ŵalije navyo ntchito vyakuti ŵalongore kuwonga pa ivyo ŵali navyo panji ivyo ŵanji ŵaŵachitira.—2 Timote 3:2, 3.

 Mtima wa kujighanaghanira waka wekha ndiwo ukupangiska makhaliro ghanyake ghaheni agho Baibolo likayowoyerathu kuti ghazamuŵako mu mazuŵa ghithu ghano:

•   Uryezi. Ŵanthu ŵanandi “ŵakutemwa ndalama” ndipo ŵakugomezga kuti ndalama izo ŵali nazo kweniso katundu ndivyo vikulongora kuti vinthu vikuŵayendera makora chomene.—2 Timote 3:2.

•   Kujitukumura. Ŵanthu ŵanandi ‘mbakujiŵikamo, ŵakujikuzga,’ kweniso “ŵakujitukumura na kunotha.” (2 Timote 3:2, 4) Ŵanthu ŵanthena aŵa ŵakutemwa kujilumba chifukwa cha maluso ghawo, mikhaliro yawo, panji vinthu ivyo ŵali navyo.

•   Kusesa. Ŵanthu “ŵakuyuyura Chiuta” na “ŵakusesa” ŵazara chomene. (2 Timote 3:2, 3) Mazgu agha ghakung’anamura ŵanthu awo ŵakuyowoyera viheni ŵanyawo panji Chiuta kweniso awo ŵakutetera mautesi ŵanyawo.

•   Ukajilangi. Ŵanthu ŵanandi ‘mbambura kugomezgeka,’ “ŵanonono,” “ŵakwendera mphiska,” kweniso “ŵakajilangi.” (2 Timote 3:2-4) Ŵanthu awo ŵali na makhaliro ghanthena agha ŵakukosera waka pa vyawo, ŵakukana kukolerana chimoza na ŵanyawo, kweniso ŵakutondeka kusunga malayizgo ghawo.

•   Nkhaza. Ŵanthu ŵanandi mazuŵa ghano ‘mbakofya,’ ŵakukaŵa yayi kuthukira, ivyo vikupangiska kuti ŵachite vinthu vyankhaza na vyakofya.—2 Timote 3:3.

•   Uchikanamalango. Yesu wakayowoyerathu kuti mu nyengo yithu yino kuzamuŵa ‘kusazgikira kwa uchikanamalango.’ (Mateyu 24:12) Wakayowoyaso kuti “mautimbanizgi,” panji kuti “vivulupi” vizamuzara chomene.—Luka 21:9, mazgu ghamusi.

•   Kuleka kutemwana mu mbumba. Chifukwa chakuti ŵanthu ‘mbambura kupulikira ŵapapi’ ndipo ŵalije “chitemwa [chapaubali]” vikupangiska kuti ŵanandi mu mbumba ŵajipulikenge ŵakujowoleka, kweniso ŵanyake ŵakwamba kuchitira nkhaza ŵamumbumba mwawo.—2 Timote 3:2, 3.

•   Upusikizgi wa visopa. Pali ŵanthu ŵanandi chomene awo “ŵakuwoneka nga ŵakusopa Chiuta.” (2 Timote 3:5) M’malo mwakuti ŵachite khumbo la Chiuta, ŵakulondezga waka ivyo ŵalongozgi ŵa visopa ŵakuŵaphalira ndipo vikuŵa vyakuti ndivyo ŵakukhumba nakale kupulika.—2 Timote 4:3, 4.

 Chifukwa chakuti ŵanandi ŵakujighanaghanira waka ŵekha, vikupangiska kuti ŵanthu ŵanandi ŵasuzgikenge maghanoghano kuluska kumasinda kose uku. (Mupharazgi 7:7) Mwachiyelezgero, ŵanthu ŵanyake awo ŵakutemwa chomene ndalama ŵakulyera ŵanji masuku pa mutu. Ŵanthu awo ŵalije chitemwa ŵangachitira nkhaza ŵamumbumba mwawo ivyo vingapangiska ŵanji mu mbumba kusuzgika maghanoghano panji kuŵa na maghanoghano ghakukhumba kujikoma waka. Nakuti ŵanthu awo ŵakwendera mphiska ŵanji panji kuchita mwambura kugomezgeka, ŵangapangiska ŵanyawo kwamba kusuzgika maghanoghano kwa nyengo yitali.

 Baibolo likulongosora vifukwa ivyo vikupangiska kuti ŵanthu ŵasinthe nthena:

•   Ŵanthu ŵanandi ŵalije chitemwa chanadi kwali nkhwa Chiuta panji ku ŵanyawo. (Mateyu 24:12) Nakuti ivi vikupangiska kuti ŵanthu ŵanandi ŵambe kujighanaghanira waka ŵekha.

•   Satana Dyabulosi wali kuchimbizgika kuchanya ndipo wali na mazaza pano pasi. (Chivumbuzi 12:9, 12) Kufuma waka apo wakachimbizgikira kuchanya, Satana wakupangiska ŵanthu ŵanandi kuŵa na mtima wakujighanaghanira waka ŵekha.—1 Yohane 5:19.

 Mazgu gha Chiuta ghakuti: “Upatukeko ku ŵanthu aŵa.” (2 Timote 3:5) Ivi vikung’anamura kuti tambe kujipatura ku ŵanyithu yayi. M’malo mwake, tikwenera kuŵa maso kuti tileke kuŵa paubwezi na ŵanthu awo ŵali na mtima wakujighanaghanira ŵekha kweniso awo ŵakuleka kopa Chiuta.—Yakobe 4:4.

 Yayi. Baibolo likayowoyerathu kuti ŵanyake ŵazamuŵa kuti “ŵakudagha na kutampha chifukwa cha vinthu vyose vyaukazuzi ivyo vikuchitika.” (Ezekiyeli 9:4) Iwo ŵazamukana mtima wakujighanaghanira ŵekha ndipo ŵazamwenderanga fundo za Chiuta pa umoyo wawo. Kayowoyero kawo na vyakuchita vyawo vizamupambananga chomene na vya ŵanthu wose. (Malaki 3:16, 18) Mwachiyelezgero, ŵazamuŵikapo mtima kuŵa pamtende na ŵanthu wose na kukana kuchitako nkhondo kweniso vya chiwawa.—Mika 4:3.

 Yayi. Vingachitika yayi kuti mbwenu charu chose chizure waka na ŵanthu awo ŵakuchita vya chiwawa. M’malo mwake, sonosono apa Chiuta wawuskengepo ŵanthu wose awo ŵakulutilira kuswa malango ghake. (Salimo 37:38) Chiuta wazamukhazikiska “charu chapasi chiphya,” kung’anamura ŵanthu ŵakuzika awo ŵazamukhala pano pasi mwamtende kwamuyirayira. (2 Petrosi 3:13; Salimo 37:11, 29) Chigomezgo ichi ntchanadi. Nanga ni sono nthena, Baibolo likovwira ŵanthu kuti ŵasinthe na kwamba kulondezga fundo za Chiuta pa umoyo wawo.—Ŵaefeso 4:23, 24.