Kasi Baibolo Likuti Wuli pa Nkhani ya Kotcha Thupi la Munthu Wakufwa?

JULANI

Ivyo Baibolo likuyowoya

Baibolo likupeleka ulongozgi wakudunjika yayi pa nkhani ya kotcha thupi la munthu wakufwa. Kweniso mu Baibolo mulije dango lakuti mukwenera kusunga thupi la munthu wakufwa mu dindi panji kotcha.

Ndipouli, mu Baibolo muli nkhani za ŵateŵeti ŵakugomezgeka ŵa Chiuta awo ŵakasunga mathupi gha ŵabali ŵawo awo ŵali kufwa. Nyengo yinyake, Abrahamu wakaŵikapo mtima kupenja malo ghakuti wasungepo thupi la muwoli wake, Sara.—Genizesi 23:2-20; 49:29-32.

Baibolo likuzunuraso za ŵateŵeti ŵanyake wakugomezgeka awo ŵakawotcha mathupi gha ŵanthu ŵakufwa. Sauli, uyo wakaŵa themba la Israyeli, na ŵana ŵake ŵatatu ŵakati ŵakomeka ku nkhondo, ŵarwani ŵakachindika yayi mathupi ghawo. Ŵasilikari ŵakugomezgeka ŵa Israyeli ŵakati ŵapulika ivyo vikachitika, ŵakaluta na kutora mathupi agha na kughawotcha ndipo viwangwa ŵakavisunga mu dindi. (1 Samuyeli 31:8-13) Baibolo likulongora kuti chikaŵa chakwenelera kotcha mathupi ghawo.—2 Samuyeli 2:4-6.

Mautesi ghakukhwaskana na kotcha mathupi gha ŵanthu ŵakufwa.

Utesi: Nimuyuyuro kotcha thupi la munthu wakufwa.

Unenesko: Baibolo likuti awo ŵafwa ŵakuwelera ku fuvu, nakuti ndivyo vikuchitika nadi para thupi lavunda. (Genizesi 3:19) Kotcha thupi la munthu wakufwa ni nthowa yipusu yakuti munthu wawelere ku fuvu.

Utesi: Kale, ŵanthu ŵekha awo ŵakaŵa ŵabwezi ŵa Chiuta yayi ndiwo ŵakaŵawotchanga para ŵafwa.

Unenesko: Mathupi gha ŵanthu ŵanyake ŵambura kugomezgeka, nga ni Akani na mbumba yake, ŵakaghawotcha. (Joshuwa 7:25) Kweni kuti likaŵa dango yayi. (Dotoronome 21:22, 23) Nga umo tawonera kale mu nkhani iyi, mathupi gha ŵanthu ŵanyake ŵakugomezgeka nagho ŵakaghawotchanga, nga umo vikaŵira na Yonatani, mwana wa Themba Sauli.

Utesi: Chiuta wangazakamuwuska yayi munthu uyo thupi lake ŵawotcha.

Unenesko: Palije icho chingatondeska Chiuta kuwuska munthu uyo wafwa, kwali thupi lake lasungika mu dindi, lawotcheka, lasoŵera mu nyanja, panji laryeka na vinyama. (Chivumbuzi 20:13) Wankhongonozose wangapangaso thupi la munthu uyo wafwa.—1 Ŵakorinte 15:35, 38.

Kasi mukwenera kotcha thupi la munthu uyo wafwa, panji kusunga mu dindi?

Apo mukusankha chakuchita na thupi la munthu uyo wafwa, ghanaghanirani fundo zakulondezgapo izi.

Ivyo mwenecho wakayowoya pambere wandafwe. Mu Baibolo muli nkhani za ŵanthu ŵanyake awo ŵakayowoyerathu ivyo ŵabali ŵawo ŵakwenera kuzakachita na thupi lawo para ŵafwa.—Genizesi 50:4, 5; Ekisodo 13:19.
Mitheto. Pa nkhani ya kotcha panji kusunga munthu mu dindi vikuthemba pa umo ŵanthu ŵa ku malo agho ŵakuchitira. (Yohane 19:40) Mwachiyelezgero, mu nyengo yakale ŵakatemwanga kusunga thupi mu dindi. (Genizesi 49:31; 1 Samuyeli 28:3) Mazuŵa ghano napo, ŵanthu ŵangasankha chakuchita na thupi la munthu uyo wafwa kuyana na mutheto wakwake, chikuru ukususkana yayi na fundo za mu Baibolo.
Malango gha Boma. Baibolo likutichiska kuti tikwenera kupulikira ŵamazaza. (Ŵaroma 13:1) Mu vigaŵa vinyake, ŵamazaza ŵakuŵika malango gha umo ŵangachitira na thupi la munthu uyo wafwa. Mwachiyelezgero, ŵalara ŵanyake ŵaboma ŵakusankha malo gha uko ŵatayenge vyoto vya thupi la munthu uyo ŵawotcha.
Umo ŵanyake ŵakuwonera. Malemba ghakutichiska kuti tikwenera kulaŵiska pa ivyo ise tikukhumba pera yayi. (Ŵafilipi 2:4) Para tikukhumba kusankha chakuchita na umo tingachitira na thupi la munthu uyo wafwa, tikwenera kughanaghanira mafumbo agha: Kasi ŵabali ŵa munthu uyo wafwa, ŵakuti wuli pa nkhani ya kotcha panji kusunga thupi mu dindi? Kasi ŵanthu ŵa kuchigaŵa icho mukukhala ŵakuti wuli pa nkhani iyi?