Baibolo likukanizga yayi kugonana. Likuti kugonana ntchawanangwa icho Chiuta wali kupeleka ku ŵanthu ŵa mu nthengwa. Chiuta wakalenga “mwanalume na mwanakazi.” Ndipo wakawona kuti vyose ivyo wakalenga vikaŵa “viwemi chomene.” (Genizesi 1:27, 31) Apo Chiuta wakapelekanga Eva kwa Adamu kuti waŵe muwoli wake, wakati ŵaŵenge “thupi limoza.” (Genizesi 2:24) Ntheura ŵakeneranga kugonana na kuphalirana twakusingo.

 Baibolo likuphalira ŵanalume kuti: “Sekelera na muwoli wa uphya wako, . . . Mabere ghake ghakukhorweske mazuŵa ghose. Ukondwenge na chitemwa chake nyengo zose.” (Zintharika 5:18, 19) Chiuta wakukhumbaso kuti ŵanakazi ŵakondwenge na chawanangwa cha kugonana. Baibolo likuti: “Mfumu wapeleke chakwenelera kwa muwoli wake, muwoli nayo wapeleke chakwenelera kwa mfumu wake.”—1 Ŵakorinte 7:3.

Kasi Baibolo likuti mbanjani awo ŵakwenera kugonana?

 Chiuta wakukhumba kuti ŵanthu ŵamunthengwa pera ndiwo ŵagonanenge. Lemba la Ŵahebere 13:4 likuti: “Nthengwa yiŵenge yakuchindikika na ŵanthu wose, ndipo pakugona paŵenge pambura kufipirwa chifukwa Chiuta wazamweruzga ŵazaghali na ŵaleŵi.” Ntheura, waliyose wakwenera kuŵa wakugomezgeka kwa munyake. Ŵakutorana ŵakuŵa ŵakukondwa chomene para ŵakuleka kuŵa ŵaryezi, ŵakujighanaghanira ŵekha, kweniso para ŵakulondezga fundo ya mu Baibolo, yakuti: “Uyo wakupeleka wakukondwa chomene kuluska uyo wakupokera.”—Milimo 20:35.