Baibolo likuti Chiuta wakukhumba kutipa “munthazi muwemi na chigomezgo.” a (Yeremiya 29:11) Nakuti chifukwa chimoza icho Chiuta wali kutipira Baibolo, ntchakuti ‘tisanguluskike na Malemba na kuŵa na chigomezgo.’ (Ŵaroma 15:4) Nga umo tiwonerenge, Baibolo lili na ulongozgi wakuzirwa chomene uwo ungatovwira kuti tiŵe na chigomezgo pasono nthena, kweniso malayizgo ghake ghakutipa chigomezgo chiwemi cha munthazi.

Mu nkhani iyi

•  Kasi Baibolo likutipa wuli chigomezgo?

•  Kasi Baibolo likupeleka chigomezgo wuli ku ŵanthu wose?

•  Mavesi gha mu Baibolo agho ghakuyowoya vya chigomezgo

 Likutiphalira fundo izo zingatovwira kuti tiŵe na umoyo uwemi, ivyo vikutovwira kuŵa na chigomezgo chiwemi. Wonani viyelezgero ivi.

•   Nyengo zose muthembenge ulongozgi wa mu Baibolo. Lemba la Salimo 119:105 likuti: “Mazgu ghinu ni nyali ku malundi ghane, na ungweru mu nthowa yane.” Ungweru ukuru ungachita vinthu viŵiri. Ungatovwira kuwona ivyo vili panthazi pithu, kweniso ungatovwira kuwona patali. Mwakuyana waka, ulongozgi wa mu Baibolo ungatovwira kutonda masuzgo agho tikusangana nagho zuŵa lililose, na kutipa chigomezgo kuti tighawonenge mwakwenelera. Fundo za mu Baibolo zingatovwira kusangaso nkhongono na ‘kukondweska mtima withu.’ (Salimo 19:7, 8) Pa nyengo yimozamoza, Baibolo likutovwira kumanya makora ivyo Yehova wakukhumba kutichitira taŵanthu. Chigomezgo ichi chingatovwira kuti tiŵe ŵakukondwa kweniso ŵakukhorwa na umoyo.

•   Zomerezgani kuti ŵanji ŵamovwirani. Para masuzgo ghatifyenya chomene, kanandi chikuŵa chipusu kwamba kujipatura ku ŵa mubanja lithu panji ŵabwezi ŵithu. Kweni Baibolo likutiphalira kuti ntchiwemi yayi kuchita nthena, chifukwa vingatipangiska kusankha vinthu mwambura mahara. (Zintharika 18:1) Ŵa mu banja lithu na ŵabwezi ŵithu ŵangatovwira chomene. Nyengo zinyake ŵangaŵa na masachizgo agho ghangatovwira kumarana na suzgo ilo tili nalo. (Zintharika 11:14) Chinyakeso ntchakuti, ŵangatipembuzga na kutisanguluska, ndipo ŵangatovwira kusangaso nkhongono zakuzizipizgira m’paka apo vinthu vizamuŵiraso makora.—Zintharika 12:25.

•   Lombani kwa Chiuta. Baibolo likuti: “Katundu wako umuthwikiske Yehova, ndipo wakovwirenge. Wazomerezgenge chara kuti murunji wawe.” b (Salimo 55:22) Yehova wakumanyikwa kuti ni “Chiuta uyo wakupeleka chigomezgo.” (Ŵaroma 15:13) Mungamuphalira “vyose ivyo mukwenjerwa navyo,” chifukwa iyo wakumupwelelerani. (1 Petrosi 5:7) Nakuti Baibolo likuti: “Wazamumukhozgani, wazamumuzgorani ŵankhongono kuti muleke kusunkhunyika.”—1 Petrosi 5:10.

•   Zomerezgani kuti viyezgo vikhozge chigomezgo chinu. Baibolo likulayizga kuti: “Kweni uyo [wakupulikira Chiuta], wakhalenge mwakufwasa ndipo wayungwenge yayi chifukwa cha kopa soka.” (Zintharika 1:33) Mwanakazi munyake wa ku Australia zina lake Margaret, wakataya katundu wake munandi chomene chifukwa cha chimphepo chankhongono icho chikasakaza nyumba yake. Kweni m’malo mwakuti wahangayike na ivyo vikamuchitikira, wakasambira fundo yakuzirwa chomene yakuti vinthu vyakuthupi ni vyakanyengo waka. Kufuma waka pa nyengo iyi, wakamba kuŵika mtima chomene pa vinthu ivyo ni vyakuzirwa nadi, nga ŵa mubanja lake na ŵabwezi ŵake, ubwezi wake na Chiuta, na chigomezgo icho Baibolo likulayizga.—Salimo 37:34; Yakobe 4:8.

 Baibolo likulayizga kuti kunthazi vinthu vizamuŵa makora chomene pano pa charu chapasi. Nakuti kwakhala pachoko waka kuti ivi vifiskike. Masuzgo ghose agho ŵanthu ŵakusangana nagho pasono, ghakulongora pakweru kuti tikukhala mu “mazuŵa ghaumaliro” gha charu chiheni ichi. (2 Timote 3:1-5) Sonosono apa, Chiuta wambenge kulamulira pa charu chose ndipo wazamuwuskapo vinthu vyose vyambura urunji na masuzgo agho tikusangana nagho. Wazamuchita ivi kwizira mu boma lake ilo likumanyikwa kuti Ufumu wa Chiuta. (Daniyeli 2:44; Chivumbuzi 11:15) Apo Yesu wakayowoyanga lurombo lwachiyelezgero, wakakumbukanga vya boma la kuchanya ili, lekani wakati: “Ufumu winu wize. Khumbo linu lichitike pano pasi.”—Mateyu 6:9, 10.

 Baibolo likulongosora makora chomene ivyo Chiuta wakukhumba kuchitira ŵanthu. Wonani masuzgo ghanyake agho Ufumu wa Chiuta uzamumazga:

•   Kuzamuŵavya njara. “Charu chapasi chipambikenge vipasi vyake.”—Salimo 67:6.

•   Kuzamuŵavya matenda. “Pazamuŵavya munthu wakukhala mu charu uyo wazamuti: ‘Nalwara.’”—Yesaya 33:24.

•   Kuzamuŵavya nyifwa. Chiuta “wazamufyura masozi ghose ku maso [gha ŵanthu], ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:3, 4.