Kasi Chiponosko Ni Vichi?
Ivyo Baibolo likuyowoya
Nyengo zinyake ŵakulemba Baibolo ŵakagwiliskiranga ntchito mazgu ghakuti “kuponoska” na “chiponosko” pakulongosora za munthu uyo wathaskika ku ulwani panji pharanyiko. (Ekisodo 14:13, 14; Milimo 27:20) Ndipouli, kanandi mazgu agha ghakuyowoya za kuwombokwa ku kwananga. (Mateyu 1:21) Pakuti nyifwa yikamba chifukwa cha kwananga, ŵanthu awo ŵakuthaskika ku kwananga ŵazamukhala kwamuyirayira pa charu chapasi.—Yohane 3:16, 17. a
Kasi tingaponoskeka wuli?
Kuti munthu waponoskeke wakwenera kuŵa na chipulikano mwa Yesu, na kulondezga malango ghake.—Milimo 4:10, 12; Ŵaroma 10:9, 10; Ŵahebere 5:9.
Baibolo likuti ivyo munthu wakuchita ndivyo vikulongora kuti wali na chipulikano chamoyo panji yayi. (Yakobe 2:24, 26) Ndipouli, fundo iyi yikung’anamura kuti chiponosko ni malipiro gha ivyo tikuchita yayi. M’malo mwake, chiponosko “ntchawanangwa cha Chiuta” icho wakupeleka chifukwa cha ‘lusungu lwake lukuru.’—Ŵaefeso 2:8, 9.
Kasi munthu wangataya mwaŵi wakupokera chiponosko?
Enya. Nga umo munthu uyo wathaskika mu maji kuti waleke kukhapira wangawaso panji kudukiraso mu maji, munthu uyo waponoskeka ku kwananga kweni wakutondeka kulutilira kuŵa na chipulikano, nayo wangataya mwaŵi wakupokera chiponosko. Lekani Baibolo likuchiska Ŵakhristu awo ŵaponoskeka kuti ŵakwenera ‘kukoleska chomene chipulikano.’ (Yuda 3) Kweniso, Baibolo likuchenjezga awo ŵaponoskeka kuti: “Lutilirani kopa na kutenthema kuti musange chiponosko chinu.”—Ŵafilipi 2:12.
Kasi Mponoski Ni Chiuta Panji Yesu?
Baibolo likuti Chiuta ndiyo wakuponoska ŵanthu, ndipo kanandi likumuchema kuti “Mponoski.” (1 Samuyeli 10:19; Yesaya 43:11; Tito 2:10; Yuda 25) Kweniso Chiuta wakatuma ŵanalume ŵakupambanapambana kuti ŵakaponoske Ŵaisrayeli, ndipo Baibolo likuchema waliyose wa ŵanalume aŵa kuti “mponoski.” (Nehemiya 9:27; Ŵeruzgi 3:9, 15; 2 Mathemba 13:5) b Pakuti Chiuta wakuponoska ŵanthu ku kwananga kwizira mu sembe yakuwombora ya Yesu Khristu, lekani Baibolo likuchemaso Yesu kuti “Mponoski.”—Milimo 5:31; Tito 1:4. c
Kasi Ni Waliyose Uyo wazamuponoskeka?
Yayi, ŵanyake ŵazamuponoskeka yayi. (2 Ŵatesalonika 1:9) Yesu wakati wafumbika kuti, “Kasi awo ŵazamuponoskeka mbachoko waka?” Iyo wakati kwa iwo: “Limbikirani chomene kunjira pa mulyango ufinyi, chifukwa ŵanandi, nkhumuphalirani, ŵazamukhumba kunjiramo kweni ŵazamutondeka.”—Luka 13:23, 24.
Mautesi pa Nkhani ya Awo Ŵazamuponoskeka
Utesi: Lemba la 1 Ŵakorinte 15:22 likusambizga kuti wose ŵazamupona, chifukwa likuti “mwa Khristu wose ŵazamuzgoka ŵamoyo.”
Unenesko: Vesi ili likulongosora nkhani ya chiwuka. Tikuyowoya nthena chifukwa mavesi ghanandi mu chaputara 15 cha buku la 1 Ŵakorinte ghakulongosora za chiwuka cha ŵakufwa. (1 Ŵakorinte 15:12, 13, 20, 21, 35) Ntheura mazgu ghakuti “mwa Khristu wose ŵazamuzgoka ŵamoyo” ghakung’anamura kuti ŵanthu wose awo ŵazamuŵa na mwaŵi wakuwuskika, ŵazamuwuskika chifukwa cha sembe ya Yesu Khristu.—Yohane 11:25.
Utesi: Lemba la Tito 2:11 likulongora kuti ŵanthu wose ŵazampona chifukwa likuti “Chiuta walongora lusungu lwake lukuru kuti ŵanthu ŵa mitundu yose ŵaponoskeke.”
Unenesko: Lizgu ilo mu Chigiriki likung’anamurika kuti “wose” mu visi ili, lingang’anamuraso kuti “mtundu uliwose.” d Ntheura lemba la Tito 2:11 likung’anamura kuti Chiuta wakupeleka chiponosko ku ŵanthu ŵakufuma mu mitundu ‘yose na mafuko na na malulimi.’—Chivumbuzi 7:9, 10.
Utesi: Lemba la 2 Petrosi 3:9 likulongora kuti ŵanthu wose ŵazamupona chifukwa likuti Chiuta “wakukhumba yayi kuti munyake waparanyike.”
Unenesko: Mbunenesko kuti Chiuta wakukhumba kuti ŵanthu wose ŵaponoskeke. Ndipouli, iyo wakuchichizga waliyose yayi kulondezga ivyo Baibolo likuyowoya kuti wazakaponoskeke. Pa “zuŵa la cheruzgo,” Chiuta wazamuparanya “ŵanthu ŵambura kopa Chiuta.”—2 Petrosi 3:7.
a Nyengo zinyake Baibolo lingayowoya za munthu kuti “waponoskeka” nangauli nyengo yakuti waponoskekere nadi ku kwananga na nyifwa yindafike.—Ŵaefeso 2:5; Ŵaroma 13:11.
b Mu malemba agho ghazunulika apa, mazgu ghakuti “mponoski,” mu Mabaibolo ghanyake ŵalikulemba kuti “chatonda,” “muwomboli,” “mulongozgi,” panji “munthu munyake.” Ndipouli, mu malemba ghakwambilira gha Chiheberi, mazgu ghakuti “mponoski,” ndigho ghali kugwiliskirika ntchito pakuyowoya za ŵanalume awo Yehova wakaŵatuma kuthaska ŵanthu ŵake. Ghakulembeka mwakuyana waka nga umo ghakulembekera para ghakulongosora Yehova pakuŵa Mponoski.—Salimo 7:10.
c Zina lakuti Yesu lili kufuma ku zina la Chihebere lakuti Yehoh·shu′aʽ, ilo likung’anamura kuti “Yehova Ntchiponosko.”
d Wonani buku la Vine’s Complete Expository Dictionary of Old and New Testament Words. Lizgu la Chigiriki lakuyana waka likusangikaso pa lemba la Mateyu 5:11, apo Yesu wakaphalira ŵasambiri wake kuti ŵanthu ŵazamuŵayowoyera uheni wa “mtundu uliwose.”
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Sembe ya Yesu ‘Ntchiwombolero cha Ŵanandi’ mu Nthowa Wuli?
Kasi chiwombolero chikuponoska wuli ŵanthu ku kwananga?
MAFUMBO AGHO BAIBOLO LIKUZGORA
Kasi Baibolo Likusambizga Kuti ‘Para Munthu Zina Lake Lalembeka mu Buku la Umoyo Mbwenu Ndikuti Waponoskeka Kale’?
Yesu wakayowoya chiyelezgero icho chikuzgora fumbo ili.
MAFUMBO AGHO BAIBOLO LIKUZGORA
Kasi Kugomezga Yesu Nkhwakukwana kuti Munthu Waponoskeke?
Baibolo likuyowoya vya ŵanthu ŵanyake awo ŵakugomezga Yesu kweni ŵazamuponoskeka yayi. Kasi ivi vingachitika wuli?
VISAMBIZGO VYAKUZIRWA VYA MU BAIBOLO
Chifukwa Wuli Yesu Wakafwa?
Baibolo lili na maukaboni ghanandi agho ghakulongora kuti nyifwa ya Yesu njakuzirwa. Kasi nyifwa yake yingatiwovwira wuli?
MAVESI GHA MU BAIBOLO GHALONGOSOREKA
Lemba la Ŵaroma 10:13, Lalongosoreka—‘Kuchema pa Zina la Fumu’
Chiuta wapeleka mwaŵi ku ŵanthu wose kuti ŵaponoskeke na kusanga umoyo wamuyirayira, vilije kanthu tikupambana mtundu, fuko, panji umo tikusangira.
IVYO BAIBOLO LIKUSAMBIZGA
Yezgani Kusambira Nase Baibolo
Sangani mwaŵi wakusambira Baibolo munthowa yakudumbiskana na munthu.