Enya, Chiuta wakusintha maghanoghano ghake para ŵanthu ŵasintha nkharo yawo yiheni. Mwachiyelezgero, apo Chiuta wakapelekanga uthenga wa cheruzgo ku Ŵaisrayeli, wakati: “Panyake ŵapulikenge, ndipo waliyose wa iwo wawerengeko ku nthowa yake, ndipo nisinthenge maghanoghano pa soka ilo nkhukhumba kuŵachitira chifukwa cha milimo yawo yiheni.”​—Yeremiya 26:3.

 Mabaibolo ghanandi ghali kung’anamura lemba ili kuti Chiuta “wangapera” pa chilango icho wakakhumbanga kuŵapa ŵanthu aŵa, ivyo vingalongora nga kuti wakabudiska kupeleka chilango ichi. Ndipouli, mazgu gha Chihebere gha pa lemba ili ghakung’anamura “kusintha maghanoghano panji ivyo wakhumbanga kuchita.” Purofesa munyake wakalemba kuti: “Para munthu wasintha nkharo yake yiheni, vikupangiskaso Chiuta kusintha cheruzgo icho wakhumbanga kupeleka.”

 Kweni ivi vikung’anamura kuti ni nyengo zose yayi apo Chiuta wakwenera kusintha maghanoghano ghake. Wonani nkhani zinyake za mu Baibolo izo zikulongora kuti Chiuta wakasintha yayi maghanoghano ghake:

•   Chiuta wakazomerezga yayi kuti wasinthe maghanoghano ghake chifukwa cha Balaki uyo wakakhumbanga kukatemba mtundu wa Israyeli.​—Maŵazgo 23:18-20.

•   Themba Sauli likati lasintha na kwamba kuchita viheni, Chiuta wakasintha yayi maghanoghano ghake ghakumukana Sauli kuti walutilire kuŵa themba la Israyeli.​—1 Samuyeli 15:28, 29.

•   Chiuta wazamufiska layizgo lake lakuti Mwana wake wazakaŵe wasembe kwamuyirayira. Chiuta wazamusintha yayi maghanoghano ghake.—Salimo 110:4.​

 Enya, Baibolo likumulongosora Chiuta kuti: “Ine ndine Yehova, nkhusintha chara.” (Malaki 3:6) Kweniso Baibolo likuti Chiuta ‘wakusintha yayi, wakupambana na mfwiri uwo ukuzgoka.’ (Yakobe 1:17) Ndipouli fundo iyi yikususkana yayi na fundo yakuti Chiuta wakusintha maghanoghano ghake. Chiuta wakusintha yayi mu nthowa yakuti wakusintha yayi fundo zake za urunji na za chitemwa izo wakwendera. (Dotoronome 32:4; 1 Yohane 4:8) Kweni wangapa ŵanthu ulongozgi wakupambanapambana pa nyengo zakupambana. Mwachiyelezgero, Chiuta wakapa Themba Davide ulongozgi wakupambana wa umo wangalwera nkhondo ziŵiri mwakulondezgana, ndipo ulongozgi wose ukaŵa wakovwira.​—2 Samuyeli 5:18-25.

Yayi, kweni wakudandawura kuti ŵanthu ŵanandi ŵakukana kumupulikira. Baibolo likulongosora umo Chiuta wakajipulikiranga pambere Chigumula cha Nowa chindachitike, likuti: “Chitima chikamukora Yehova kuti wakapanga munthu pa charu chapasi, ndipo wakakwenyelera mu mtima wake.” (Genizesi 6:6) Mu vesi ili, mazgu ghakuti “wakadandawura” ghakufuma ku lizgu la Chihebere ilo likung’anamura “kusintha maghanoghano.” Ntheura Chiuta wakasintha maghanoghano ghake na kuparanya ŵanthu ŵanandi awo ŵakaŵako pambere Chigumula chindachitike chifukwa ŵakaŵa ŵaheni. (Genizesi 6:5, 11) Nangauli wakachita chitima chifukwa chakuti ŵanyake ŵakasankha kuchita viheni, kweni wakasintha yayi maghanoghano ghake ghakukhwaskana na ŵanthu wose. Nakuti wakaponoska Nowa na banja lake pa Chigumula kuti wasunge mtundu wa ŵanthu pa charu chapasi.​—Genizesi 8:21; 2 Petrosi 2:5, 9.