Baibolo likuti pa vinthu vyose ivyo Chiuta wali kulenga pa charu chapasi, mbanthu ŵachoko waka awo ŵakuluta kuchanya. (Chivumbuzi 14:1, 3) Iwo ŵakuluta kuchanya kuti ŵakaŵe mathemba na ŵasembe pasi pa Ufumu wa Yesu. (Luka 22:28-30; Chivumbuzi 5:9, 10) Kweni ŵanthu mamiliyoni ghanandi ŵazamuwuskikira mu paradiso pano pasi.—Salimo 37:11, 29.

 Baibolo likuyowoyapo yayi kuti vinyama vikuluta kuchanya para vyafwa, nakuti pali chifukwa chakupulikikwa. Vinyama vingafiska yayi vinthu ivyo vikukhumbikwa kuti ‘vichemekere kuchanya.’ (Ŵahebere 3:1) Vinyake mwa vinthu ivi nkhumanya makora Chiuta, kuŵa na chipulikano, na kupulikira malango ghake. (Mateyu 19:17; Yohane 3:16; 17:3) Ŵanthu pera ndiwo ŵakalengeka kuti ŵakhalenge kwamuyirayira.—Genizesi 2:16, 17; 3:22, 23.

 Kuti vilengiwa vya pa charu chapasi vilute kuchanya, vikwenera kuwuka dankha ku ŵakufwa. (1 Ŵakorinte 15:42) Baibolo likuti pali ŵanthu ŵanandi awo ŵakawuka ku ŵakufwa. (1 Mathemba 17:17-24; 2 Mathemba 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Milimo 9:36-42; 20:7-12) Kweni lindayowoyepo likuti vinyama vikawuka ku ŵakufwa.

•  Kasi ntchivichi chikuchitika para vinyama vyafwa?

•  Kasi umoyo ukufwa?

•  Kasi vinyama vikwananga?

•  Kasi ntchakuzomerezgeka kuchitira nkhaza vinyama?

 Baibolo likuti vinyama na ŵanthu, vyose vili na umoyo uwo ukufwa. (Maŵazgo 31:28) Munthu wakwamba, Adamu, wakati walengeka, wakapika mzimu yayi, kweni ‘wakazgoka chamoyo icho chikamba kuthuta.’ Umoyo uli kupangika na vinthu viŵiri: “dongo la pasi” na “mvuchi wa umoyo.”—Genizesi 2:7, mazgu ghamusi.)

 Baibolo likuti umoyo ukufwa. (Levitiko 21:11; Ezekiyeli 18:20) Para munthu na vinyama vyafwa, vyose vikuwelera ku fuvu. (Mupharazgi 3:19, 20) Panji tingayowoya kuti, para vyose vyafwa vikuleka kuŵako. a

 Yayi, chifukwa kwananga ni para munthu wakughanaghana panji kuchita vinthu ivyo vikususkana na fundo za Chiuta. Kuti munthu wanange wakwenera kuŵa na nkhongono izo zikumovwira pakusankha chakuchita, kweni vinyama vilije nkhongono iyi. Nyengo zose vinyama vikuchita waka ivyo vyakhumba. (2 Petrosi 2:12) Paumaliro, vikufwa nangauli vikuŵa kuti vyananga chilichose yayi.

 Yayi. Chiuta wali kupa ŵanthu mazaza kuti ŵalaŵilirenge vinyama, kuvichitira nkhaza yayi. (Genizesi 1:28; Salimo 8:6-8) Chiuta wakuwona kuti umoyo wa nyama yiliyose ngwakuzirwa chomene, kusazgapo na tuyuni tuchokotuchoko. (Yona 4:11; Mateyu 10:29) Iyo wakaphalira Ŵaisrayeli kuti ŵaleke kuchitira nkhaza vinyama.—Ekisodo 23:12; Dotoronome 25:4; Zintharika 12:10.