Mungamumanya makora Chiuta para mukusambira vya iyo na kuŵikapo mtima kuchita vinthu vyakumukondweska. Para mwachita nthena ndipo Chiuta “wasendelerenge kwa imwe.” (Yakobe 4:8) Nakuti Baibolo likutisimikizgira kuti “wali kutali yayi na waliyose wa ise.”—Milimo 17:27.

•  Ivyo mungachita kuti mumumanye makora Chiuta

•  Mautesi agho ŵanthu ŵakuyowoya pa nkhani ya kumumanya makora Chiuta

 Muŵerengenge Baibolo

•  Baibolo likuti: “Malemba ghose ngakupelekeka na Chiuta.”—2 Timote 3:16.

•  Ng’anamuro: Chiuta ndiyo ni Mweneko wa Baibolo. Iyo wakaŵika maghanoghano ghake mu ŵanthu awo ŵakalemba Baibolo. Kwizira mu buku lapadera ili, Chiuta wakutiphalira vinthu viwemi ivyo wakutikhumbira. Wakutiphaliraso mikhaliro yapadera iyo wali nayo, nga ntchitemwa, urunji na lusungu.—Ekisodo 34:6; Dotoronome 32:4.

•  Ivyo mungachita: Zuŵa lililose muŵerengenge Baibolo. (Joshuwa 1:8) Mughanaghanirengepo ivyo mukuŵerenga na kujifumba kuti: ‘Kasi nkhani iyi yikunisambizga vichi vya Chiuta?’—Salimo 77:12.

   Mwachiyelezgero, ŵerengani Yeremiya 29:11, pamanyuma jifumbani kuti: ‘Kasi Chiuta wakunikhumbira vichi—mtende panji soka? Kasi ni Chiuta wankhaza, panji wakunikhumbira munthazi muwemi?’

 Mulaŵiskenge chilengiwa

•  Baibolo likuti: “Makhaliro [gha Chiuta] ghambura kuwoneka, . . . ghakuwoneka makora chomene chifukwa ghakumanyikwa kwizira mu vinthu ivyo wali kulenga.”—Ŵaroma 1:20.

•  Ng’anamuro: Vinthu ivyo Chiuta wali kulenga vikuvumbura mikhaliro yake. Nga umo vikuŵira kuti chinthu chinyake icho munthu wapanga, chikuvumbura vinandi vya iyo. Mwakuyana waka, umo wongo wamunthu uli kupangikira kweniso umo ukugwilira ntchito, vikuvumbura kuti Chiuta ngwavinjeru. Ivyo vikuchitika kuti zuŵa lileke kotcha mwakujumphizga kweniso umo nyenyezi zikugwilira ntchito, vikulongora kuti ngwankhongono.—Salimo 104:24; Yesaya 40:26.

•  Ivyo mungachita: Patulani nyengo yakuti mulaŵiske chilengiwa na kusambirako kanthu. Para mukuchita nthena, jifumbani kuti, ‘Kasi vinthu vyakuzizika ivyo nkhuwona mu chilengiwa, vikuvumbura vichi vya Chiuta?’ a Unenesko ngwakuti, chilengiwa chingatiphalira vyose yayi vyakukhwaskana na Mlengi withu. Lekani Chiuta wali kutipa Baibolo.

 Mugwiliskirenge ntchito zina la Chiuta

•  Baibolo likuti: “Nimuvikilirenge chifukwa wakumanya zina lane. Wanichemenge, ndipo nimuzgorenge”—Salimo 91:14, 15.

•  Ng’anamuro: Chiuta uyo zina lake ni Yehova, wakuzirwiska wose awo ŵakumanya zina lake ndipo ŵakuligwiliskira ntchito mwakwenelera. b (Salimo 83:18; Malaki 3:16) Chiuta wakukhumba timumanye lekani wakutiphalira zina lake leneko. Iyo wakuti, “Ine ndine Yehova. Ili ndilo zina lane.”—Yesaya 42:8.

•  Ivyo mungachita: Muzunurenge zina la Yehova para mukukhumba kuyowoya nayo.

 Muyowoyenge na Yehova mu lurombo

•  Baibolo likuti: “Yehova wali pafupi na wose awo ŵakumuchema.”—Salimo 145:18.

•  Ng’anamuro: Yehova wakusendelera ku awo ŵakulomba kwa iyo na chipulikano. Lurombo nalo ntchigaŵa cha kusopa, ndipo para tikuchita nthena tikulongora kuti tikumuchindika Chiuta.

•  Ivyo mungachita: Nyengo zose mulombenge kwa Yehova. (1 Ŵatesalonika 5:17) Muphalirani ivyo mukwenjerwa navyo kweniso umo mukujipulikira.—Salimo 62:8. c

 Muŵe na chipulikano mwa Chiuta

•  Baibolo likuti: “Kwambura chipulikano ntchambura machitiko kumukondweska Chiuta.”—Ŵahebere 11:6.

•  Ng’anamuro: Kuti tisendelere kwa Chiuta, tikwenera kuŵa na chipulikano mwa iyo. Mu Baibolo, kuŵa na chipulikano chikung’anamura vinandi, padera pa kugomezga waka kuti kuli Chiuta. Chikung’anamuraso kumugomezga na mtima withu wose, kusazgapo kugomezga kuti malayizgo ghake ghose ghazamufiskika kweniso kuti fundo zake zose ni zakovwira. Kuti tiŵe paubwezi na munthu tikwenera kumugomezga dankha.

•  Ivyo mungachita: Kuti tiŵe na chipulikano chanadi, tikwenera kughamanya makora Malemba. (Ŵaroma 10:17) Ntheura mukwenera kusambira Baibolo na kulipulikiska kuti mumugomezge chomene Chiuta kweniso ulongozgi wake. Ŵakaboni ŵa Yehova ŵangakondwa chomene kuti ŵasambirenge namwe Baibolo. d

 Muchitenge vinthu ivyo vikumukondweska Chiuta

•  Baibolo likuti: “Ili ni ng’anamuro la kutemwa Chiuta lakuti tisungilire malango ghake.”—1 Yohane 5:3.

•  Ng’anamuro: Yehova wali pafupi na awo ŵakumutemwa ndipo ŵakuyezgayezga kuchita chilichose kuti ŵapulikirenge malango ghake.

•  Ivyo mungachita: Para mukusambira Baibolo, wonani vinthu ivyo Chiuta wakutemwa na ivyo wakutinkha. Jifumbani kuti, ‘Kasi ni vichi ivyo nkhwenera kusintha kuti nikondweske Mlengi wane?’—1 Ŵatesalonika 4:1.

 Londezgani ulongozgi wa Chiuta kuti muwone umo wakumupwelelerani

•  Baibolo likuti: “Chetani mwe, muwone kuti Yehova ni muwemi.”—Salimo 34:8.

•  Ng’anamuro: Chiuta wakumupemphani kuti mujiwonere mwekha umo iyo waliri muwemi. Para mwawona umo wakumutemwerani kweniso umo wakumovwilirani, namwe mukhumbenge kuŵa nayo paubwezi.

•  Ivyo mungachita: Para mwaŵerenga Baibolo, londezgani ulongozgi wa Chiuta ndipo muwonenge umo vinthu vyenderenge makora mu umoyo winu. (Yesaya 48:17, 18) Wonaniso viyelezgero vya ŵanthu awo Chiuta wakaŵawovwira mu nyengo yithu yino kuti ŵatonde masuzgo agho ŵakasangana nagho, kusintha umoyo wawo kweniso wa mbumba yawo ndipo paumaliro ŵakasanga chimwemwe chanadi. e

 Utesi: Tingamumanya yayi Chiuta chifukwa ntchakusuzga kumupulikiska.

 Unenesko: Vinthu vinyake vyakukhwaskana na Chiuta ni vyakusuzga kupulikiska, mwachiyelezgero iyo wakuwoneka yayi chifukwa ni Mzimu. Kweni nipera, tingamumanya Chiuta. Nakuti Baibolo likuti tikwenera kumumanya makora Chiuta kuti tizakasange umoyo wamuyirayira. (Yohane 17:3) Baibolo likugwiliskira ntchito mazgu ghapusu kuti litiphalire vinthu vyakukhwaskana na Mlengi withu, makhaliro ghake, ivyo wakutikhumbira taŵanthu na chifukwa icho wakalengera charu chapasi, kweniso malango ghake. (Yesaya 45:18, 19; 1 Timote 2:4) Nga umo tanguyowoyera kale kukwambilira kwa nkhani iyi, Baibolo likuvumburaso zina la Chiuta. (Salimo 83:18) Ntheura tingamumanya Chiuta na kusendelera kwa iyo.—Yakobe 4:8.