“Kuyowoya malulimi” ntchawanangwa icho Ŵakhristu ŵanyake ŵakwambilira ŵakapika ndipo vikaŵawovwira kuti ŵayowoye chiyowoyero chachilendo icho ŵandayowoyepo nakale. (Milimo 10:46) Para ŵakuyowoya chiyowoyero chachilendo, ŵekha awo ŵakamanyanga chiwoyero icho ndiwo ŵakapulikanga. (Milimo 2:4-8) Kuyowoya malulimi chikaŵa chimoza mwa vyawanangwa vya mzimu utuŵa ivyo Chiuta wakapeleka ku Ŵakhristu ŵakwambilira.​—Ŵahebere 2:4; 1 Ŵakorinte 12:4, 30.

•  Kasi kuyowoya malulimi kukayambira nkhu, ndipo pawuli?

•  Kasi chilato chakuyowoyera malulimi chikaŵa chakuti wuli?

•  Kasi kuyowoya malulimi kukeneranga kulutilira?

•  Kasi kuyowoya malulimi kukamara pawuli?

•  Kasi mazuŵa ghano napo tikwenera kuyowoya malulimi?

•  Kasi Ŵakhristu ŵaunenesko ŵangamanyikwa wuli?

 Munthondwe uwu ukambira ku Yerusalemu pa Pentekoste mu 33 C.E. Ŵasambiri pafupifupi 120 ŵakawungana “ndipo wose ŵakazuzgika na mzimu utuŵa na kwamba kuyowoya mu viyowoyero vyakupambanapambana.” (Milimo 1:15; 2:1-4) Ŵanthu ŵanandi ŵakufuma ku “mtundu uliwose pa charu chapasi” ŵakawungana, ndipo “waliyose wakaŵapulika ŵakuyowoya mu chiyowoyero chake.”​—Milimo 2:5, 6.

1.   Vikalongoranga kuti Chiuta wakovwira Ŵakhristu. Kale Chiuta wakachitanga minthondwe para wakukhumba kovwira ŵateŵeti ŵake ŵakugomezgeka, nga umo wakachitira na Mozesi. (Ekisodo 4:1-9, 29-31; Maŵazgo 17:10) Mwakuyana waka, mu nyengo ya Ŵakhristu ŵakwambilira kuyowoya malulimi kukalongoranga kuti Chiuta wakovwira mpingo Wachikhristu uwo ukaŵa kuti wamba waka. Mpositole Paulosi wakalemba kuti: “Malulimi ntchimanyikwiro ku ŵakugomezga yayi, kweni ŵambura kugomezga.”​—1 Ŵakorinte 14:22.

2.   Vikawovwiranga Ŵakhristu kuti ŵachitire ukaboni mwakukwana. Ŵanthu awo ŵakapulikanga ivyo ŵasambiri ŵa Yesu ŵakayowoyanga pa zuŵa la Pentekoste, ŵakati: “Tose tikuŵapulika ŵakuyowoya mu viyowoyero vithu za vinthu vikuru vya Chiuta.” (Milimo 2:11) Ntheura chifukwa chinyake chikuru icho Ŵakhristu ŵakayowoyeranga malulimi chikaŵa chakuti ‘ŵapeleke ukaboni wakukwana’ kweniso kuti ‘ŵazgore ŵanthu ŵa mitundu yose kuŵa ŵasambiri,” nga umo Yesu wakaŵaphalilira. (Milimo 10:42; Mateyu 28:19) Ŵanthu pafupifupi 3,000 awo ŵakawona munthondwe uwu kweniso kupulika ukaboni uwo ukapelekeka, ŵakazgoka ŵasambiri.—Milimo 2:41.

 Yayi. Vyawanangwa vinyake vya mzimu utuŵa, nga kuyowoya malulimi, vikaŵa vyakanyengo kachoko waka. Baibolo likayowoyerathu kuti: “Kwali kuli vyawanangwa vya kuchima, vizamumara. Kwali kuli malulimi, ghazamuleka.”​—1 Ŵakorinte 13:8.

 Mu nyengo ya Ŵakhristu ŵakwambilira, ŵapositole ŵakagaŵirangako ŵanyawo vyawanangwa vya mzimu utuŵa mwakuŵika mawoko pa Ŵakhristu ŵanyake. (Milimo 8:18; 10:44-46) Vikuwoneka kuti awo ŵakapokera vyawanangwa vyamzimu utuŵa kufuma ku ŵapositole, ŵakapelekangaso ku Ŵakhristu ŵanyawo yayi. (Milimo 8:5-7, 14-17) Tiyelezgere kuti boma lapereka layisensi yakwendeskera galimoto kwa dilayivara, kasi dilayivara uyu wali na mazaza ghakupanga layisensi na kupeleka kwa munthu munyake? Yayi. Mwakuyana waka, kuyowoya malulimi kukamara apo ŵapositole kweniso ŵanthu ŵanyake awo ŵakapika chawanangwa ichi, ŵati ŵafwa.

 Chawanangwa chakuyowoya malulimi chikamara mu nyengo ya Ŵakhristu ŵakwambilira. Pasono palije munthu waliyose uyo wakwenera kuyowoya kuti nkhongono ya Chiuta ndiyo yikumovwira kuti wayowoye malulimi.

 Yesu wakati chitemwa chakujipata ndicho ntchimanyikwiro cha Ŵakhristu ŵaunenesko. (Yohane 13:34, 35) Mwakuyana waka, mpositole Paulosi nayo wakasambizga kuti chitemwa ntchimanyikwiro chambura kumara cha Ŵakhristu ŵaunenesko. (1 Ŵakorinte 13:1, 8) Wakayowoya kuti mzimu wa Chiuta uzamovwira Ŵakhristu kuti ŵaŵe na mikhaliro yiwemi, iyo yikumanyikwa kuti “vipambi vya mzimu.” Chakwamba mwa vipambi ivi ntchitemwa.​—Ŵagalatiya 5:22, 23.