Adamu na Eva ndiwo ŵakaŵa ŵanthu ŵakwamba kwananga. Apo ŵakaleka kupulikira Chiuta na kurya vya “mu khuni la kumanyiska uwemi na uheni,” ŵakachita kwananga uko ŵanandi ŵakuti ni kwananga kwakwamba. a (Genizesi 2:16, 17; 3:6; Ŵaroma 5:19) Adamu na Eva ŵakakanizgika kurya vya mu khuni ili chifukwa likimiranga mazaza gha Chiuta, panji kuti wenelero wa kusankhira ŵanthu icho ntchiwemi na chiheni. Apo Adamu na Eva ŵakarya vya mu khuni ili, vikalongora kuti ŵakakhumbanga kujisankhira ŵekha icho ntchiwemi na chiheni pa umoyo wawo. Apa ŵakalongolerathu kuti ŵakakana kulongozgeka na mazaza gha Chiuta pa nkhani ya fundo izo ŵakwenera kwendera.

•  Kasi Adamu na Eva ŵakakhwaskika wuli na “kwananga kwakwamba”?

•  Kasi ise tikukhwaskika wuli na “kwananga kwakwamba”?

•  Kasi tingafwatuka ku vyakufumapo vya “kwananga kwakwamba”?

•  Mautesi pa nkhani ya “kwananga kwakwamba”

 Chifukwa chakuti ŵakananga, Adamu na Eva ŵakachekura ndipo paumaliro ŵakafwa. Iwo ŵakananga ubwezi wawo na Chiuta ndipo ŵakataya mwaŵi wa kukhala na umoyo wamuyirayira kweniso wambura masuzgo.​—Genizesi 3:19.

 Adamu na Eva ŵakaŵapirako ŵana ŵawo wose kwananga. Ivi vingayana waka na umo ŵapapi awo ŵali na nthenda yakwambukira ŵangapirako ŵana ŵawo. (Ŵaroma 5:12) Lekani ŵanthu wose ŵali kubabika ‘ŵakwananga,’ b kung’anamura kuti tili kubabika ŵambura kufikapo ndipo ntchipusu kuti tichite chinthu icho ntchiheni.​—Salimo 51:5; Ŵaefeso 2:3.

 Chifukwa cha kwananga uko tili kuhara, panji kuti kuleka kufikapo, lekani tikulwara, kuchekura, na kufwa. (Ŵaroma 6:23) Nyengo zinyake tikusangana na masuzgo chifukwa cha maubudi ghithu panji gha ŵanyithu.​—Mupharazgi 8:9; Yakobe 3:2.

 Enya. Baibolo likuti Yesu wakafwa kuti waŵe “sembe yakuphepiskira zakwananga zithu.” (1 Yohane 4:10) Sembe ya Yesu yingatifwatura ku vyakufumapo vya kwananga uko tili kuhara, na kutipa mwaŵi wakusanga chinthu icho Adamu na Eva ŵakataya, icho mbumoyo wamuyirayira wambura masuzgo.​—Yohane 3:16. c

 Utesi: Kwananga kwakwamba kukutipatulirathu kwa Chiuta.

 Unenesko: Chiuta wakutipa mulandu chifukwa cha ivyo Adamu na Eva ŵakachita yayi. Iyo wakupulikiska kuti ndise ŵambura kufikapo, ndipo wakukhazga vinandi kuluska ivyo tingafiska yayi. (Salimo 103:14) Nangauli tikusangana na masuzgo chifukwa cha kwananga uko tili kuhara, tili na mwaŵi wa kuŵa paubwezi wakukhora na Chiuta.​—Zintharika 3:32.

 Utesi: Ubatizo ukusuka zakwananga, ntheura ŵana ŵachoko ŵakwenera kubatizika.

 Unenesko: Nangauli ubatizo ngwakuzirwa chomene kuti munthu wazakaponoskeke, kweni munthu wangafwatuka ku kwananga pekha para wali na chipulikano mu sembe ya Yesu. (1 Petrosi 3:21; 1 Yohane 1:7) Pakuti chipulikano chikukhumba kuti munthu wamanye makora unenesko wa mu Baibolo, vingachitika yayi kuti ŵana ŵachoko ŵaŵe na chipulikano. Lekani Baibolo likuyowoyapo yayi kuti ŵana ŵachoko ŵakwenera kubatizika. Fundo iyi yikuwonekaso makora mu ivyo Ŵakhristu ŵakwambilira ŵakachitanga. Iwo ŵakabatizanga ŵana ŵachoko yayi, kweni ŵanthu awo ŵagomezga—“ŵanalume na ŵanakazi” awo ŵakaŵa na chipulikano mu Mazgu gha Chiuta.​—Milimo 2:41; 8:12.

 Utesi: Chiuta wali kuŵatemba ŵanakazi chifukwa Eva ndiyo wakamba kurya vya mu khuni lakukanizgika.

 Unenesko: M’malo mwa kutemba ŵanakazi, Chiuta wakatemba “njoka ya papo kale, iyo yikuchemeka Dyabulosi na Satana” chifukwa ndiyo yikapangiska Eva kuti wanange. (Chivumbuzi 12:9; Genizesi 3:14) Nakutiso Chiuta wakati munthu wakwamba uyo wakabuda ni Adamu, mwanakazi wake yayi.​—Ŵaroma 5:12.

 Chifukwa wuli Chiuta wakati Adamu wazamuwusa muwoli wake? (Genizesi 3:16) Apo Chiuta wakayowoyanga mazgu agha, wakang’anamuranga kuti Adamu wamuchitirenge nkhaza yayi muwoli wake. Iyo wakang’anamuranga kuti kwananga kupangiskenge kuti ubwezi uleke kwenda makora pakati pa ŵanalume na ŵanakazi. Chiuta wakukhumba kuti mwanalume wamutemwenge na kumuchindika muwoli wake kweniso kulongora ntchindi ku ŵanakazi wose.​—Ŵaefeso 5:25; 1 Petrosi 3:7.

 Utesi: Kwananga kwakwamba kukaŵa kugonana.

 Unenesko: Kwananga kwakwamba kukaŵa kugonana yayi pa vifukwa ivi:

• Chiuta wakaphalira Adamu kuti waleke kurya vya mu khuni la kumanyiska uwemi na uheni apo wakaŵa wachali yekha, kwambura muwoli wake.​—Genizesi 2:17, 18.

• Chiuta wakaphalira Adamu na Eva kuti ‘ŵababane na kwandana’—kung’anamura kuti ŵaŵe na ŵana. (Genizesi 1:28) Nthena vikalongora kuti Chiuta ngwankhaza kuti waŵalange chifukwa cha kuchita chinthu icho wakaŵatuma yekha.

• Adamu na Eva ŵakabuda pa nyengo zakupambana—Eva ndiyo wakamba, kufuma apo mfumu wake.​—Genizesi 3:6.

• Baibolo likuzomerezga kuti mfumu na muwoli ŵagonanenge.​—Zintharika 5:18, 19; 1 Ŵakorinte 7:3.