Palije apo Baibolo likuzunurapo za vinyama vyakuchemeka ma dinosaur mwakudunjika. Kweni, Baibolo likuyowoya kuti Chiuta ndiyo ‘wakalenga vinthu vyose.’ Ndipo uwu mbukaboni wakuti vinyama ivi navyo ndiyo wakavilenga. a (Chivumbuzi 4:11) Nangauli Baibolo lindavizunurepo mwakudunjika, kweni likuyowoya za vinyama vinyake ivyo Chiuta wali kulenga, ndipo navyo vikaŵapo:

•   “Vyamoyo vikuruvikuru vyamunyanja,” panji kuti “vikoko.”—Genizesi 1:21.

•   “Vyamoyo vinyake vyose ivyo vikukhwaŵa.”—Genizesi 1:25.

•   “Vinyama vyamuthengere.”—Genizesi 1:25.

Kasi ma dinosaur ghakachita kusintha kufuma ku vinyama vinyake?

 Vinthu vyakufukura pasi vikulongora kuti ma dinosaur ghakachita kulengeka, ghakasintha kufuma ku vinyama vinyake yayi. Fundo iyi yikukolerana na iyo yili mu Baibolo yakuti Chiuta ndiyo wakalenga vinyama vyose. Mwachiyelezgero, Salimo 146:6 likuyowoya kuti Chiuta ndiyo “wali kulenga kuchanya na charu chapasi, nyanja na vyose ivyo vilimo.”

Kasi ma dinosaurs ghakaŵako pa wuli?

 Baibolo likuti Chiuta wakalenga vinyama vyamunyanja na vyamoyo vyose ivyo vikwenda, pa zuŵa la 5 na la 6. b (Genizesi 1:20-25, 31) Apa vikulongora kuti ma dinosaur ghakaŵako kwa nyengo yitali.

Kasi Behemoti na Leviyatani ni ma dinosaur?

 Yayi. Nangauli vinyama ivi vikuyowoyeka mu buku la Yobu kweni palije ukaboni wakuti vikaŵa ma dinosaur. Behemoti wakumanyikwa kuti ni chigwere ndipo Leviyatani ŵakumanyikwa kuti ni ng’wina. Umo vinyama ivi vikuwonekera vikuyana na ivyo Malemba ghakulongosora. (Yobu 40:15-23; 41:1, 14-17, 31) Muli mose umo vingaŵira, mazgu ghakuti “Behemoti” na “Leviyatani,” ghangaŵa ma dinosaur yayi. Chiuta wakaphalira Yobu kuti walaŵisiske vinyama ivi, ndipo panyengo iyo Yobu wakaŵa na umoyo, ma dinosaur ghakaŵa kuti ghamara.—Yobu 40:16; 41:8.

Kasi ntchivichi chikachitikira ma dinosaur?

 Baibolo likulongosora yayi umo ma dinosaur ghakamalira. Kweni, likuyowoya kuti vinthu vyose vikaŵako “chifukwa cha khumbo la [Chiuta].” (Chivumbuzi 4:11) So Chiuta wakaŵa na chilato pakulenga ma dinosaur. Ndipo Chiuta wakazomerezga kuti ma dinosaur ghamare, ghati ghafiska chilato icho wakaghalengera.