Munthu musambazi na Lazaro mbanthu ŵakuyelezgera waka awo Yesu wakaŵazunura mu ntharika yake. (Luka 16:19-31) Mu chiyelezgero ichi, ŵanalume ŵaŵiri aŵa ŵakimiranga magulu ghaŵiri gha ŵanthu: (1) ŵalongozgi ŵakujitemwa ŵa chisopa cha Chiyuda mu nyengo ya Yesu na (2) ŵanthu bweka kweni ŵa mtima uwemi awo ŵakategherezganga uthenga wa Yesu.

Mu nkhani iyi

•  Kasi Yesu wakayowoya vichi vyakukhwaskana na munthu musambazi na Lazaro?

•  Kasi nkhani iyi yikachitika nadi?

•  Kasi nkhani iyi yikukhozgera chisambizgo cha moto wa helo?

•  Kasi nkhani ya munthu musambazi na Lazaro yikung’anamurachi?

 Mu Luka chaputara 16, Yesu wakayowoya vya ŵanalume ŵaŵiri awo vinthu vikasintha chomene kwa iwo.

 Mwakudumura, nkhani iyo Yesu wakayowoya ni iyi: Munthu musambazi wakakhalanga umoyo wa wofuwofu. Munthu wakupempheska zina lake Lazaro wakaŵikika pa chipata cha munthu musambazi uyu; wakakhazganga kuti wapikenge chakurya chilichose icho chikambotokanga kufuma pa thebulu la munthu musambazi. Pati pajumpha nyengo, Lazaro wakafwa, ndipo ŵangelo ŵakamutolera uko kukaŵa Abrahamu. Munthu musambazi nayoso wakafwa ndipo wakasungika. Mu nkhani iyi, ŵanalume wose ŵaŵiri aŵa ŵakulongosoreka nga kuti ŵakaŵa ŵachali ŵamoyo pamanyuma pakuti ŵafwa. Munthu musambazi wakatambuzgikanga na moto wakugolera ndipo wakapempha Abrahamu kuti watume Lazaro wazakamuzizimiskeko lulimi lwake na nthonyezi ya maji gha ku munwe wake. Abrahamu wakamukanira munthu musambazi uyu na kumuphalira kuti pasono vinthu vikaŵa kuti vyagadabuka ku ŵanalume ŵaŵiri aŵa, ndiposo kuti pakati pawo pakaŵa chibuwu chikuru mwakuti munthu wangambuka yayi.

 Yayi. Ichi chikaŵa waka chiyelezgero icho Yesu wakayowoya kuti ŵanthu ŵasambirepo kanthu. Nakuti nanga ni awo ŵakufufuza mbiri ya Baibolo ŵakuzomerezga fundo yakuti nkhani iyi ni ntharika waka. Mwachiyelezgero, kamutu kachoko ka mu Baibolo la mu 1912 ilo wakang’anamura Luther kakuti nkhani iyi ni ntharika. Nanga ni Baibolo la Catholic Jerusalem, mu mazgu ghamusi, likuyowoya kuti iyi “ni ntharika waka ndipo ni nkhani yakuti yikachitikira munthu waliyose yayi.”

 Kasi Yesu wakasambizganga vyakuti munthu wakuŵaso wamoyo kunyake para wafwa? Kasi wakang’anamuranga kuti ŵanthu ŵanyake ŵakutambuzgika ku moto wa helo para ŵafwa kweniso kuti Abrahamu na Lazaro ŵali kuchanya? Ukaboni wakupambanapambana ukulongora kuti umu ndimo vikaŵira yayi.

 Mwachiyelezgero:

•   Kasi viŵenge kuti munthu musambazi wakaŵa nadi ku malo agho ghakagoleranga moto, nthena moto ukawomizga yayi maji ku munwe wa Lazaro?

•   Nanga viŵenge kuti moto undawomizge maji agho ghakaŵa ku munwe wa Lazaro, kasi nthonyezi pera nthena yikachita kanthu pakovwira munthu uyo wakutambuzgika mu moto?

•   Kasi vingachitika wuli kuti Abrahamu waŵe wamoyo kuchanya, apo Yesu wakayowoya mwakupulikikwa makora kuti kufika pa nyengo iyo wakayowoyanga ntharika iyi pakaŵavya munthu uyo wakakwelera kuchanya?—Yohane 3:13.

 Yayi. Nangauli iyi ni nkhani iyo yikachitika nadi yayi, kweni ŵanyake ŵakuti yikwimira fundo yakuti ŵanthu ŵawemi ŵakuluta kuchanya ndipo ŵaheni ŵakutambuzgika ku moto wa helo. a

 Kasi fundo iyi njakupulikikwa? Yayi.

 Chisambizgo chakuti ŵanthu ŵakuphya ku helo chikukolerana yayi na ivyo Baibolo likuyowoya pa nkhani ya umo ŵakufwa ŵaliri. Mwachiyelezgero, likuyowoyapo yayi kuti ŵanthu ŵawemi wose awo ŵali kufwa ŵakukondwa na umoyo kuchanya panji ŵanthu ŵaheni ŵakutambuzgika mu moto wa helo. M’malo mwake, Baibolo likuyowoya mwakupulikikwa makora kuti: “Ŵamoyo ŵakumanya kuti ŵafwenge, kweni ŵakufwa ŵakumanya kalikose chara.”—Mupharazgi 9:5.

 Nkhani iyi yikulongora kuti pakakhala pachoko waka kuti vinthu visinthe chomene pa umoyo wa magulu ghaŵiri gha ŵanthu.

 Ntchakuwonekerathu kuti munthu musambazi wakimiranga ŵalongozgi ŵa chisopa cha Chiyuda, “awo ŵakaŵa ŵakutemwa ndalama.” (Luka 16:14) Ŵakamupulikanga Yesu wakuyowoya, kweni ŵakasuskanga ivyo wakasambizganga. Ŵalongozgi ŵa chisopa aŵa ŵakawonanga ŵanthu bweka kuti mbapasi chomene.—Yohane 7:49.

 Lazaro wakwimira ŵanthu bweka awo ŵakazomeranga uthenga wa Yesu ndipo ŵalongozgi ŵa chisopa ŵakaŵawonanga kuti mbapasi.

 Vinthu vikasintha mwaluŵiro chomene ku magulu ghose ghaŵiri agha.

•   Ŵalongozgi ŵa chisopa cha Chiyuda ŵakawonanga nga kuti Chiuta wakuŵatemwa. Kweni apo unenesko ngwakuti ŵakaŵa nga mbakufwa apo Chiuta wakaŵakana iwo kweniso kasopero kawo chifukwa ŵakakana kupokera uthenga wa Yesu. Ndipo ŵakatambuzgikanga na uthenga uwo Yesu na ŵalondezgi ŵake ŵakapharazganga.—Mateyu 23:29, 30; Milimo 5:29-33.

•   Ŵanthu bweka awo ŵakajowoleka kwa nyengo yitali na ŵalongozgi ŵawo ŵa chisopa, ndiwo pa nyengo iyi vikaŵayenderanga makora. Ŵanandi ŵakazomera uthenga wa mu Malemba uwo Yesu wakasambizganga na kusanga nawo chandulo. Apa ŵakaŵa na mwaŵi wakuti ŵambe kutemweka na Chiuta kwamuyirayira.—Yohane 17:3.