“Makiyi gha Ufumu” ghakwimira mazaza ghakujulira ŵanthu nthowa kuti ‘ŵanjire mu Ufumu wa Chiuta.’ (Mateyu 16:19; Milimo 14:22) a Yesu wakapeleka “makiyi gha Ufumu wakuchanya” kwa Petrosi. Ichi chikung’anamura kuti Petrosi wakapika mazaza ghakujulira nthowa ya umo ŵanthu ŵakugomezgeka ŵangaŵira na mwaŵi wa kunjira mu Ufumu wakuchanya, para ŵapokera mzimu utuŵa wa Chiuta.

Kasi makiyi agha ghakagwira ntchito kwa anjani?

 Petrosi wakagwiliskira ntchito mazaza ghakufuma kwa Chiuta pakujulira nthowa ŵanthu magulu ghatatu ghakunjira mu Ufumu:

1.   Ŵayuda na ŵakung’anamukira ku Chiyuda. Nyengo yichoko waka Yesu wati wawuka, Petrosi wakachiska wumba wa awo ŵakaŵa mu chisopa Chachiyuda kuti ŵazomere kuti Yesu ndiyo Chiuta wasankha kuti wazakawuse mu Ufumu. Petrosi wakaŵaphalira ivyo ŵangachita kuti ŵaponoskeke. Ntheura wakaŵajulira nthowa yakunjilira mu Ufumu, ndipo ŵanandi chomene “ŵakapokera mazgu ghake.”​—Milimo 2:38-41.

2.   Ŵasamariya. Pamanyuma Petrosi wakatumika ku Ŵasamariya. b Wakagwiliskiraso ntchito kiyi wa Ufumu apo iyo pamoza na mpositole Yohane ‘ŵakaŵalombera kuti ŵapokere mzimu utuŵa.’ (Milimo 8:14-17) Ichi chikajulira nthowa Ŵasamariya yakunjilira mu Ufumu.

3.   Ŵamitundu. Pati pajumpha vyaka vitatu na hafu kufuma apo Yesu wakawukira, Chiuta wakavumbulira Petrosi kuti Ŵamitundu (ŵanthu awo ŵakaŵa Ŵayuda yayi) nawo ŵaŵenge na mwaŵi wa kunjira mu Ufumu. Ntheura Petrosi wakagwiliskira ntchito yumoza mwa makiyi agha pakupharazgira Ŵamitundu, ndipo wakaŵajulira mulyango kuti ŵapokere mzimu utuŵa, ŵazgoke Ŵakhristu, na kulindilira kuzakaŵa mu Ufumu.​—Milimo 10:30-35, 44, 45.

Kasi ‘kunjira mu Ufumu’ chikung’anamura vichi?

 Awo ‘ŵakunjira mu Ufumu’ ŵazamuŵa ŵahaliri ŵamoza na Yesu kuchanya. Baibolo likayowoyerathu kuti ŵanthu aŵa ‘ŵazamukhala pa vitengo’ na ‘kuwusa charu chapasi nga ni mathemba.’​—Luka 22:29, 30; Chivumbuzi 5:9, 10.

Mautesi pa nkhani ya makiyi gha Ufumu

 Utesi: Awo ŵali kuchanya ŵakalindizganga kuti Petrosi ndiyo wasankhe nyengo yakugwiliskira ntchito makiyi gha Ufumu.

 Unenesko: Apo Yesu wakayowoyanga vya makiyi gha Ufumu, wakaphalira Petrosi kuti: “Chose icho ukakenge pano pasi chiŵenge chakukakika kuchanya; ndipo chose icho usutulenge pano pasi chiŵenge chakusutulika kuchanya.” (Mateyu 16:19, Tumbuka Bible) Nangauli ŵanyake ŵakuti mazgu agha ghakung’anamura kuti awo ŵali kuchanya ŵakenderanga ivyo Petrosi wadumura, kweni mazgu Ghachigiriki ghakulongora kuti fundo yiliyose iyo Petrosi wangadumura yikakolerananga na ivyo vyadumulika kale kuchanya, vya Petrosi ndivyo vikadangiranga yayi. c

 Pa malo ghanyake, Baibolo likulongora kuti Petrosi wakapika mazaza kufuma kuchanya kuti wagwiliskire ntchito makiyi gha Ufumu. Mwachiyelezgero, wakapulikira ulongozgi wakufuma kwa Chiuta apo wakagwiliskiranga ntchito kiyi wachitatu.​—Milimo 10:19, 20.