Kasi Ufumu wa Chiuta Wuli mu Mtima Winu?

JULANI

Ivyo Baibolo likuyowoya

Yayi, Ufumu wa Chiuta uli mu mtima wa munthu waliyose yayi, kweniso ni mtima wa munthu yayi. a Baibolo likulongosora makora uko kuli ufumu uwu. Ilo likuti “Ufumu wakuchanya.” (Mateyu 4:17) Wonani maukaboni agho ghakulongora kuti Ufumu wa Chiuta ni boma lanadi ilo likulamulira kuchanya:

Ufumu wa Chiuta uli na mafumu, ŵanthu, malango, ndipo uzamufiska khumbo la Chiuta kuchanya kweniso pa charu chapasi.—Mateyu 6:10; Chivumbuzi 5:10.
Boma panji kuti Ufumu wa Chiuta, uzamulamulira “mitundu ya ŵanthu, na ŵanthu ŵa viyowoyero vyose” pa charu chapasi. (Daniyeli 7:13, 14) Chiuta ndiyo wali na mazaza mu Ufumu uwu.—Salimo 2:4-6; Yesaya 9:7.
Yesu wakaphalira ŵapositole ŵake ŵakugomezgeka kuti ŵazamuŵa nayo mu Ufumu wa kuchanya na “kukhala pa vitengo.”—Luka 22:28, 30.
Ufumu wa Chiuta uzamuparanya ŵalwani ŵake wose.—Salimo 2:1, 2, 8, 9; 110:1, 2; 1 Ŵakorinte 15:25, 26.

Baibolo lindayowoyepo kuti Ufumu wa Chiuta uli mu mtima panji ukulamulira mu mtima wa munthu. Kweni Baibolo likuyowoya kuti, “mazgu gha Ufumu” panji “makani ghawemi agha gha Ufumu” ghangatifika pa mitima ndipo tingasintha nkharo yithu.—Mateyu 13:19; 24:14.

Kasi mazgu ghakuti “Ufumu wa Chiuta wuli mukati mwinu” ghakung’anamurachi?

Ŵanthu ŵanyake ŵakutimbanizgika pa nkhani ya uko Ufumu wa Chiuta uli chifukwa cha umo lemba la Luka 17:21 lili kulembekera mu Mabaibolo ghanyake. Mwachiyelezgero, Baibolo linyake likuti “ufumu wa Chiuta wuli mukati mwinu.” Kuti tipulikiske makora ivyo lemba ili likung’anamura, tikwenera kumanya dankha nkhani yose.

Ufumu wa Chiuta ukaŵa mu mitima ya Ŵafarisi yayi, awo ŵakasuskanga Yesu ndipo ŵakakhumbanga kumukoma

Apo Yesu wakayowoya mazgu agha, wakayowoyanga na Ŵafarisi, awo ŵakamususkanga ndipo ŵakakhumbanga kumukoma. (Mateyu 12:14; Luka 17:20) Kasi ntchakupulikikwa kuyowoya kuti Ufumu ukaŵa mu mitima yinonono ya Ŵafarisi? Yesu wakaŵaphalira kuti: “Mukati muli ŵakuzura na upusikizgi na uchikanamalango.”—Mateyu 23:27, 28.

Mabaibolo ghanyake ghali kung’anamura makora lemba la Luka 17:21 kuti: “Ufumu wa Chiuta uli pakati pinu.” Yesu wakayowoya kuti Ufumu wa Chiuta wuli “pakati pinu” chifukwa chakuti Yehova wali kusankha iyo kuŵa Fumu, ndipo pa nyengo iyi wakaŵa pakati pawo.—Luka 1:32, 33.

a Visopa vinandi vikusambizga kuti Ufumu wa Chiuta uli mu mtima wa munthu. Mwachiyelezgero, ŵa Southern Baptist ku United States pa ungano wawo ŵakati, Ufumu wa Chiuta ni para “Chiuta wakulamulira mu mtima wa munthu.” Mwakuyana waka, Papa Benedict XVI mu buku lake wakalemba kuti: “Ufumu wa Chiuta ukwiza mwa munthu para wali na mtima wakupulikira.”(Jesus of Nazareth)