Mazgu ghakuti “Yerusalemu Muphya” ni msumba wakuyelezgera waka. Mazgu agha ghakusangika kaŵiri mu Baibolo ndipo ghakwimira gulu la ŵalondezgi ŵa Yesu awo ŵakuluta kuchanya kuti ŵakalamulire lumoza na iyo mu Ufumu wa Chiuta. (Chivumbuzi 3:12; 21:2) Baibolo likulongora kuti gulu ili lingachemekaso kuti mwali wa Khristu.

1.   Yerusalemu Muphya wali kuchanya. Nyengo zose para Baibolo likuzunura Yerusalemu Muphya, likuyowoya kuti wakukhira kufuma kuchanya uko ŵangelo ŵakulinda vipata vya msumba. (Chivumbuzi 3:12; 21:2, 10, 12) Kweniso ukuru wa msumba uwu ukulongora kuti ungaŵa pa charu chapasi yayi. Vigaŵa vyose vinayi vya msumba uwu vikuyana waka ndipo ukuru wake ni “masitadiyo 12,000.” a (Chivumbuzi 21:16; King James Version) Utali wake, kufuma pasi kuya muchanya ni makilomita pafupifupi 560 (350 mi).

2.   Yerusalemu Muphya Mbakhristu awo ŵakulondezga Yesu, mwali wa Khristu. Yerusalemu Muphya wakuchemeka kuti “mwali, muwoli wa Mwana wa mberere.” (Chivumbuzi 21:9, 10) Mazgu ghakuti mwana wa Mberere, ghakwimira Yesu Khristu. (Yohane 1:29; Chivumbuzi 5:12) “Muwoli wa Mwana wa mberere,” mwali wa Khristu, wakwimira Ŵakhristu awo ŵamuwusa na Yesu kuchanya. Baibolo likuyaniska ubwezi wa pakati pa Yesu na Ŵakhristu aŵa nga mpha mfumu na muwoli. (2 Ŵakorinte 11:2; Ŵaefeso 5:23-25) Kweniso pa malibwe gha fawundeshoni gha Yerusalemu Muphya pakalembeka “mazina 12 gha ŵapositole 12 ŵa Mwana wa mberere.” (Chivumbuzi 21:14) Fundo iyi yikutovwira kumanya makora Yerusalemu Muphya, chifukwa Ŵakhristu awo ŵakuchemekera kuchanya ŵakuzengeka “pa fawundeshoni ya ŵapositole na ntchimi.”—Ŵaefeso 2:20.

3.   Yerusalemu Muphya ntchigaŵa cha boma la Chiuta. Yerusalemu wakale ukaŵa msumba ukuru wa Israyeli. Ku malo agha ndiko Themba Davide, mwana wake Solomoni, kweniso na mathemba ghanyake ghakawusanga “pa chitengo cha Yehova.” (1 Midauko 29:23) Ntheura Yerusalemu wakuchemeka “msumba utuŵa,” ukimiranga Ufumu wa Chiuta mu mbumba ya Davide. (Nehemiya 11:1) Ŵanthu awo ŵakupanga Yerusalemu Muphya, uyo wakuchemekaso kuti “msumba utuŵa,” ni awo ŵakuluta kuchanya kuti ‘ŵakawuse charu chapasi nga ni mathemba’ pamoza na Yesu.—Chivumbuzi 5:9, 10; 21:2.

4.   Ŵanthu ŵa pa charu chapasi ŵakusanga vitumbiko chifukwa cha Yerusalemu Muphya. Baibolo likuti Yerusalemu Muphya “wakukhira kufuma kuchanya kwa Chiuta,” ivi vikulongora kuti Chiuta wakumugwiliskira ntchito pa vinthu vinyake vya pa charu cha pasi. (Chivumbuzi 21:2) Mazgu agha ghakulongora kuti pali kukolerana pakati pa Yerusalemu Muphya na Ufumu wa Chiuta, uwo Chiuta wakuwugwiliskira ntchito kuti ufiske khumbo lake “pano pasi nga nkhuchanya.” (Mateyu 6:10) Vitumbiko ivyo tizamusanga chifukwa cha Ufumu wa Chiuta ni ivi:

   •   Uzamuwuskapo kwananga. “Mlonga wa maji gha umoyo” uwo ukukhira kufuma ku Yerusalemu Muphya ukupeleka maji ku “makuni gha umoyo” agho mahamba ghake “ghakuchizgira mitundu.” (Chivumbuzi 22:1, 2) Mwantheura para Chiuta wazakawuskapo kwananga, ŵanthu ŵazamuchira mwakuthupi na mwauzimu ndipo ŵazamuŵa na umoyo uwemi, uwo Chiuta wakakhumbanga pakwamba.—Ŵaroma 8:21.

   •   Uzamovwira kuti Chiuta na ŵanthu ŵaŵe pa ubwezi wakukhora. Kwananga kukutipatura kwa Chiuta. (Yesaya 59:2) Para Chiuta wazakawuskapo kwananga, uchimi uwu uzamufiskika: “Hema la Chiuta lili na ŵanthu. Iyo wazamukhala nawo, ndipo iwo ŵazamuŵa ŵanthu ŵake. Chiuta wazamuŵa nawo pamoza.”—Chivumbuzi 21:3.

   •   Uzamuwuskapo masuzgo na nyifwa. Kwizira mu Ufumu wake, Chiuta “wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivumbuzi 21:4.