Baibolo likuyowoyapo yayi vya “zakwananga 7 izo ni zakofya chomene.” Ndipouli, likuyowoya kuti kuchita kwananga kukuru kungapangiska munthu kuleka kuzakaponoskeka. Mwachiyelezgero, Baibolo likuyowoya zakwananga nga ni uzaghali, kusopa vikozgo, kuchita vyamizimu, kukalipa, na uloŵevu kuti ni “milimo ya thupi.” Ndipo likuti: “Awo ŵakuchita vinthu ivi ŵazamuhara yayi Ufumu wa Chiuta.”—Ŵagalatiya 5:19-21. a

Kasi Baibolo likuzunurapo ‘vinthu 7 ivyo Yehova wakuvitinkha’?

 Enya. Kuyana na Tumbuka bible, Pa Zintharika 6:16 pakuti: ‘Pali vinthu vinkhonde na chimo ivyo Yehova wakuvitinkha, enya, vinkhonde na viŵiri mbunyankhasi kwa iye.’ Ndipouli, zakwananga izo zikuzunurika mu mavesi ghakulondezgapo pa Zintharika 6:17-19 zikulongora kuti ni izi pera yayi. M’malo mwake, likuyowoya waka vinthu vyakubudika, kusazgapo maghanoghano, vyakuyowoya, na vyakuchita. b

Kasi mazgu ghakuti “kwananga kwakofya chomene” ghakung’anamurachi?

 Mabaibolo ghanyake ghakugwiliskira ntchito mazgu agha pa lemba la 1 Yohane 5:16. Mwachiyelezgero, pa lemba ili Baibolo la The New American Bible likuti: “Pali kwananga uko nkhwakofya chomene.” Mazgu ghakuti “kwananga kwakofya” ghangang’anamulikaso kuti ‘kwananga uko kukuchema nyifwa.’ Kasi pali mphambano wuli pakati pa ‘kwananga uko kukuchema nyifwa’ na ‘kwananga uko kukuchema nyifwa yayi’?​—1 Yohane 5:16.

 Baibolo likuyowoyerathu pakweru kuti kwananga kose kukulongozgera ku nyifwa. Ndipouli, tingathaskika ku kwananga na nyifwa kwizira mu sembe yakuwombora ya Yesu Khristu. (Ŵaroma 5:12; 6:23) Apa ndikuti, ‘kwananga uko kukuchema nyifwa’ ni uko kungagowokereka yayi na sembe yakuwombora ya Khristu. Munthu uyo wakuchita kwananga kwa mtundu uwu wakuŵikapo mtima pakuchita kwananga ndipo ngwakuti wangasintha yayi. Baibolo likuti kwananga uku nkhwakuti ‘kuzamugowokereka chara.’​—Mateyu 12:31; Luka 12:10.