“Sono kwa uyo wangafiska, kuyana na nkhongono zake izo zikugwira ntchito mwa ise, wachite vinandi nkhanira kuluska vinthu vyose ivyo tikulomba panji kughanaghana, iyo wapike ntchindi.”—Ŵaefeso 3:20, 21, Mang’anamuliro gha Charu Chiphya.

 “Sono kwa mweneuyo wali na nkhongono kuchita mulimo mwa ise kuluska vyose ivyo tikulomba panji ivyo tikughanaghana kwa iyo kuŵenge uchindami.”—Ŵaefeso 3:20, 21, Testamente La Sono.

 Mpositole Paulosi wakayowoyanga na chigomezgo chose kuti Chiuta wakuzgora malurombo kweniso wakufiska ivyo ŵateŵeti ŵake ŵakukhazga munthowa yakuti ŵaghanaghanirangako yayi. Chiuta wangazgora malurombo gha ŵateŵeti ŵake mwakuzizika chomene.

 “Sono kwa uyo wangafiska, kuyana na nkhongono zake izo zikugwira ntchito mwa ise.” Lizgu lakuti “uyo,” ilo likuzunulika mu vesi 20 likuyowoya za Yehova Chiuta. a Pa fundo iyi, Paulosi wakalemba kuti: “Iyo wapike ntchindi kwizira mu mpingo ndiposo kwizira mwa Khristu Yesu.” Nakuti Chiuta wangatipa nkhongono izo tikukhumbikwira kuti tichite khumbo lake.—Ŵafilipi 4:13.

 Mu vesi 20, mpositole Paulosi wakazunura chinthu chapadera chakukhwaskana na umo Yehova wakuchitira kuti wawovwire ŵateŵeti ŵake. Pakuyowoyapo pa mazgu ghakuti “kwa uyo wangafiska,” buku linyake likayowoya kuti: “Vesi ili likuyowoya waka yayi kuti Chiuta wangafiska chinthu chinyake makora waka panji kuti kwa iyo ntchipusu waka kuchita chinthu chinyake. Kweni likung’anamura kuti Chiuta wali na nkhongono zakuchitira chilichose icho wakhumba.” Mwakupambana na mubwezi withu uyo wangakhumbisiska kuti watovwire kweni nyengo zinyake wangatondeka, Yehova ngwakunozgeka nyengo zose kuchita chilichose kuti wawovwire ŵateŵeti ŵake na kuzgora malurombo ghawo. Wali na nkhongono zambura chigoti kweniso wali na mazaza.—Yesaya 40:26.

 “[Chiuta] wachite vinandi nkhanira kuluska vinthu vyose ivyo tikulomba panji kughanaghana.” Yehova wangaŵachitira vinthu “vinandi” chomene ŵateŵeti ŵake. Wangaŵawovwira munthowa izo ŵakhazganga yayi.

 Lizgu lakuti ‘kwakuluska vinthu vyose ivyo tikulomba panji kughanaghana,’ likutiphalira fundo yinyake iyo yili mu vesi ili. Apo mpositole Paulosi wakayowoyanga kuti Chiuta “wachite vinandi nkhanira kuluska vinthu vyose ivyo tikulomba panji kughanaghana,” wakakhumbanga kuti Ŵakhristu ŵamanye fundo yakuti Chiuta wangaŵawovwira munthowa iyo ŵakhazganga yayi. Mu Testamente La Sono, mazgu gha mu vesi 20 ghali kulembeka kuti: “Sono kwa mweneuyo wali na nkhongono kuchita mulimo mwa ise kuluska vyose ivyo tikulomba panji ivyo tikughanaghana.” Nyengo zinyake, Ŵakhristu ŵangawona kuti masuzgo ghawo ngakuru chomene ndipo mphakusuzga kughamazga. Nakuti nyengo zinyake ŵakumanya yayi icho ŵangalomba kwa Chiuta. Kweni Yehova wakumanya makora chomene masuzgo ghithu ndipo wali na nkhongono kutovwira. Pa nyengo yake yakwenelera, wangamazga suzgo lililose, ndipo wangachita ivi munthowa iyo talindiliranga yayi panji kughanaghana. (Yobu 42:2; Yeremiya 32:17) Pa nyengo yasono, wakutipa nkhongono kuti tizizipizge masuzgo mwachimwemwe!—Yakobe 1:2, 3.

 Buku la Ŵaefeso ni kalata iyo mpositole Paulosi wakalembera Ŵakhristu awo ŵakakhalanga mu msumba wa Efeso ku Asia Minor, ndipo chigaŵa ichi mazuŵa ghano chikuchemeka Turkey. Mu kalata yake, Paulosi wakalembamo mazgu ghakulongora kuti wakaŵalomberanga ŵanthu ŵa mu msumba uwu. (Ŵaefeso 3:14-21) Wakalomba kuti Ŵakhristu wose, ŵaŵe ŵakumanya makora chitemwa cha Khristu kweniso ŵakwenera kuyezga Yesu pa nkhani yakulongora chitemwa, mu kaghanaghaniro na kachitiro ka vinthu. Ndimo Ŵakhristu wose mazuŵa ghano ŵakwenera kuchitira. Paulosi wakamalizga lurombo lwake mwa kulumba Chiuta ndipo wakayowoya mazgu agho tikughasanga pa Ŵaefeso 3:20, 21.

 Wonelerani vidiyo yakudumura iyi, iyo yikulongosora ivyo vili mu buku la Ŵaefeso.