“Mu vinthu vyose, nkhusanga nkhongono mwa uyo wakunipa nkhongono.”—Ŵafilipi 4:13, Mang’anamuliro gha Charu Chiphya.

 “Ine ndingachita vyose mwa Khristu uyo wakundipa nkhongono.”—Ŵafilipi 4:13, Mazgu gha Chiuta mu Kang’anamuliro Kaphya.

 Mazgu agha, wakalemba ni mpositole Paulosi, ghakusimikizgira wose awo ŵakusopa Chiuta kuti ŵapokerenge nkhongono mwakuti ŵafiske khumbo Lake.

 Mabaibolo ghanyake ghakuti Khristu ndiyo wakamupanga nkhongono Paulosi. Ndipouli, lizgu lakuti “Khristu” mulije mu mipukutu yakale chomene ya Chigiriki. Lekani Mabaibolo ghanandi agho ghakung’anamulika sono, pa lemba ili pali mazgu nga ghakuti “mwa uyo wakunipa nkhongono” (Mang’anamuliro gha Charu Chiphya), “uyo wakunipa nkhongono” (New International Version), na “kwa iyo uko kukufuma nkhongono zane” (New American Bible). Kasi Paulosi wakayowoyanga vya njani pa lemba ili?

 Ivyo Paulosi wakalemba kukwambilira kwa kalata iyi vikulongora kuti wakayowoyanga vya Chiuta. (Ŵafilipi 4:6, 7, 10) Kukwambilira kwa kalata iyi, Paulosi wakalembera Ŵafilipi kuti: “Pakuti Chiuta. . . ndiyo wakumupani . . . nkhongono kuti muchite vyose ivyo wakukhumba.” (Ŵafilipi 2:13) Ndipo pa 2 Ŵakorinte 4:7, wakalemba kuti Chiuta ndiyo wakamupanga nkhongono kuti wafiske uteŵeti wake. (Yaniskani na 2 Timote 1:8.) Ivi, ni vifukwa vyakupulikikwa vyakuyowoyera kuti Paulosi wakang’anamuranga kuti Chiuta ‘ndiyo wakumupa nkhongono.’

 Kasi Paulosi wakang’anamuranga vichi apo wakati wakapokera nkhongono “mu vinthu vyose”? Ivyo Paulosi wakayowoyanga apa vikaŵa vinthu vyakupambanapambana ivyo wakasangananga navyo para wakuchita khumbo la Chiuta. Kwali waŵe na vinthu vinandi vyakuthupi panji vichoko, wakathembanga Chiuta kuti ndiyo wamupwelelerenge. Lekani Paulosi wakasambira kuŵa wakukhorwa kwali vinthu viŵe uli pa umoyo wake.—2 Ŵakorinte 11:23-27; Ŵafilipi 4:11.

 Mazgu gha Paulosi ghangawovwiraso awo ŵakusopa Chiuta mazuŵa ghano. Chiuta waŵapenge nkhongono izo ŵakukhumbikwira kuti ŵazizipizge viyezgo na kuchita khumbo lake. Chiuta wangaŵapa nkhongono kwizira mwa mzimu wake utuŵa, ŵasopi ŵanyawo panji Mazgu ghake Baibolo.—Luka 11:13; Milimo 14:21, 22; Ŵahebere 4:12.

 Mazgu agha ntchigaŵa cha mazgu ghaumaliro gha mu kalata iyo Paulosi wakalembera Ŵakhristu wa ku Filipi. Wakalemba kalata iyi cha m’ma 60-61 C.E., apo wakajalirika mu jele kakwamba ku Romu. Kwa nyengo iyo yikumanyikwa makora viŵi yayi, Ŵakhristu ŵa ku Filipi ŵakatondekanga kupeleka wovwiri wakuthupi kwa mpositole Paulosi. Ndipouli, panyengo iyi ŵakafiskanga kutumizga vyawanangwa kwa Paulosi kuti wasange pakukora.—Ŵafilipi 4:10, 14.

 Paulosi wakaŵawonga chomene Ŵakhristu wa ku Filipi chifukwa cha mtima wawo wakupa ndipo wakaŵasimikizgira kuti sono wali na ivyo wakakhumbikwiranga. (Ŵafilipi 4:18) Wakasangirapo mwaŵi wakuŵaphalirako vya unenesko wakuzirwa wa umoyo wa Chikhristu. Ŵakhristu wose, kwali mbasambazi panji ŵakavu, ŵangaŵa wakukhorwa para ŵakuthemba wovwiri wa Chiuta.—Ŵafilipi 4:12.