“Pakuti mazgu gha Chiuta ngamoyo na ghankhongono, ngakuthwa kuluska lupanga lwa wuyi kosekose, ghakugwaza m’paka kupatura umoyo na mzimu, mafindo na mongo, ndipo ghakumanya ivyo mtima ukughanaghana na kukhumba.”—Ŵahebere 4:12, Mang’anamuliro gha Charu Chiphya.

 “Pakuti mazgu gha Chiuta ngamoyo ndipo ngakuchitachita na nkhongono.Ngakuthwa kuruska lupanga lwa wuyi kosekose. Ghakuporota na kuya kugaŵa pakati pa moyo wa munthu na mzimu, na pakati pa marunga na wongo wuwo. Ghakumanya kweruzga maghanoghano na dazgo la mu mtima.”—Ŵahebere 4:12, Testamente la Sono.

 Uthenga wa Chiuta uwo uli mu Baibolo uli na nkhongono kuvumbura ivyo tikughanaghana kweniso vilato vithu. Kweniso uthenga uwu ungasintha munthu kuŵa muwemi.

 “Mazgu gha Chiuta Ngamoyo.” Mazgu ghakuti “mazgu gha Chiuta” ghakung’anamura ivyo Chiuta wali kulayizga, panji kuti khumbo lake nga umo vili kulembekera mu Baibolo. a Khumbo lake likuru ndakuti ŵanthu ŵakupulikira ŵazakakhale na umoyo kwamuyirayira pa charu chapasi umo ŵanthu ŵazamukhala mwamtende kweniso mwakukolerana.—Genizesi 1:28; Salimo 37:29; Chivumbuzi 21:3, 4.

 Kasi khumbo la Chiuta kweniso Mazgu gha Chiuta “ngamoyo” munthowa wuli? Mazgu cha Chiuta ngamoyo chifukwa ghali na nkhongono kusintha mitima ya ŵanthu awo ŵaghazomera ndipo ghakuŵapa chigomezgo chiwemi cha munthazi kweniso kukhala umoyo wa chandulo. (Dotoronome 30:14; 32:47) Malayizgo gha Chiuta “ngamoyo” munthowa yakuti Chiuta wakugwira ntchito kuti wafiske ivyo wali kulayizga. (Yohane 5:17) Mwakupambana na ŵanthu, Chiuta wakutondeka yayi kufiska ivyo walayizga chifukwa chakuti waluwa panji kutondeka kukwaniska. (Maŵazgo 23:19) Mazgu ghake ‘ghawelerenge waka chara kwa iyo.’—Yesaya 55:10, 11.

 “Mazgu gha Chiuta . . . ghankhongono.” Fundo yakuti “ghankhongono,” yingalembekaso kuti “ngankhongono,” “ghakugwira ntchito,” panji “ghangafiska chilichose icho iyo waghatumira.” Ntheura chilichose icho Yehova b Chiuta wayowoya panji kulayizga chizamuchitika nadi. (Salimo 135:6; Yesaya 46:10) Nakuti Chiuta wangafiska ivyo walayizga kuluska umo ise tikughanaghanira.—Ŵaefeso 3:20. c

 Kweniso Mazgu gha Chiuta ghali na ‘nkhongono’ chifukwa ghakovwira ŵanthu awo ŵaghazomerezga kusintha nkharo yawo na vinthu vinyake pa umoyo wawo. Ntheura ŵakulondezga ivyo ŵakusambira, kusintha kaghanaghaniro kawo, vyakuchita vyawo, na vilato vyawo. (Ŵaroma 12:2; Ŵaefeso 4:24) Ntheura tingayowoya kuti, “mazgu gha Chiuta, . . . ghakugwira ntchito” mwa awo ŵaghazomerezga.—1 Ŵatesalonika 2:13.

 “Mazgu gha Chiuta . . . ngakuthwa kuluska lupanga lwa wuyi kosekose.” Mwakuyelezgera Mazgu gha Chiuta ngakuthwa kuluska lupanga lulilose ulo munthu wangapanga chifukwa ngankhongono chomene. Vili nthena chifukwa uthenga wa Chiuta ungamufika munthu pa mtima munthowa iyo uthenga wamunthu ungachita yayi. Fundo iyi yikuwonekera makora pa Ŵahebere 4:12 apo pakulutilira kuyowoya kuti.

 “Mazgu gha Chiuta . . . ghakugwaza m’paka kupatura umoyo na mzimu, mafindo na mongo.” Mu Baibolo lizgu lakuti “umoyo” lingang’anamura umo munthu wakuwonekera kuwaro apo lakuti “mzimu” lingayowoya za umo waliri mukati. (Ŵagalatiya 6:18) Mwakuyelezgera, “mazgu gha Chiuta” ghakufika m’paka mukati mu “mongo,” kung’anamura kuti ghakukhwaska umo tikujipulikira kweniso ivyo tikughanaghana. Pakuti ghakuvumbura wunthu withu wamukati, uwo munthu wangawuwona yayi, ivyo Yehova wakutisambizga vingatovwira kuti tisinthe na kwamba kuchita makora vinthu. Ivi vikukondweska Mlengi withu kweniso ise taŵene.

 “Mazgu gha Chiuta . . . ghakumanya ivyo mtima ukughanaghana na kukhumba.” Umo munthu wakuchitira para wapulika mazgu gha Chiuta, vingavumbura umo wakughanaghanira kweniso ivyo wakukhumba kuchita panji vilato vyake ndipo ivi vikukhwaska nkharo panji vyakuchita vyake. Mwachiyelezgero, para munthu wapulika mazgu gha Chiuta na kuchitapo kanthu kusintha vinthu vinyake pa umoyo wake, vikulongora kuti munthu uyo ngwakujiyuyura na wa mtima uwemi. Ivi vingalongora kuti wakukhumba kukondweska Mlengi wake. Kweni para wakwamba kusanga vifukwa na mazgu gha Chiuta, vingavumbura kuti wali na mikhaliro yiheni nga kujikuzga, kweniso kujighanaghanira. Panji wangamba kujigowokera pa chinthu chiheni icho wakuchita icho Chiuta wakukanizga.—Yeremiya 17:9; Ŵaroma 1:24-27.

 Nga umo buku linyake likuyowoyera, mazgu gha Chiuta munthu “ghangamufika nkhanira mukati mweneko.” Palije chigaŵa cha wunthu withu wamukati icho Chiuta wangatondeka kuchiwona kweniso icho mazgu ghake ghangatondeka kuchivumbura. Lemba la Ŵahebere 4:13 likuti: “Vinthu vyose vili pakweru ndipo vikuwoneka pamaso pa uyo wazamutifumba.”

 Mpositole Paulosi ndiyo wakalemba buku la Ŵahebere mu 61 C.E. Buku ili ni kalata iyo Chiuta wakamutuma kuti walembere Ŵakhristu Ŵayuda ku Yerusalemu na Yudeya.

 Mu chaputara 3 na 4, Paulosi wakulongosora kuti ivyo Ŵaisrayeli ŵakachita ni chenjezgo ku Ŵakhristu. (Ŵahebere 3:8-12; 4:11) Yehova wakalayizga kuti waŵathaskenge Ŵaisrayeli ku wuzga na kuŵanjizga mu charu icho ‘ŵamukhala mwakufwasa.’ (Dotoronome 12:9, 10) Kweni Ŵaisrayeli awo ŵakafuma mu Eguputo, mwakuwerezgawerezga ŵakalongora kuti ŵalije chipulikano mwa ivyo Chiuta wakaŵalayizga ndipo kanandi waka ŵakatondekanga kupulikira malango gha Chiuta. Ntheura ŵakatondeka kunjira mu chipumulo cha Chiuta na kuŵa nayo pa mtende. M’malo mwake iwo ŵakafwira mu chipalamba. Nangauli ŵana ŵawo ŵakanjira mu Charu cha Layizgano, kweni nawo ŵakatondeka kulutilira kupulikira. Paumaliro mtundu wose wa Ŵaisrayeli ukasangana na suzgo.—Nehemiya 9:29, 30; Salimo 95:9-11; Luka 13:34, 35.

 Paulosi ŵakati Ŵakhristu ŵakwenera kusambirapo kanthu pa viheni ivyo Ŵaisrayeli ŵambura kugomezgeka ŵakachita. Mwakupambana na iwo, ise tinganjira mu chipumulo cha Chiuta para tikupulikira mazgu ghake na kuŵa na chipulikano mu ivyo watilayizga.—Ŵahebere 4:1-3, 11.

 Wonelerani vidiyo yakudumura iyi, iyo yikulongosora ivyo vili mu buku la Ŵahebere.