MAVESI GHA MU BAIBOLO GHALONGOSOREKA

Ŵaroma 10:13—‘Kuchema pa Zina la Fumu’

JULANI

“Waliyose uyo wakuchema pa zina la Yehova wazamuponoskeka.”—Ŵaroma 10:13, Mang’anamuliro gha Charu Chiphya.

“Pakuti, Yose uyo wati wacemenge zina la FUMU wizamkuponoskeka.”—Ŵaroma 10:13, Tumbuka Bible.

Ivyo Lemba la Ŵaroma 10:13 Likung’anamura

Chiuta wakutemwera yayi. Wakukhumba kuti ŵanthu ŵa mitundu yose na mafuko ŵazakaponoskeke na kusanga umoyo wamuyirayira vilije kanthu kuti mbakavu panji mbasambazi. Kweni kuti tizakasange umoyo wamuyirayira tikwenera kuchema pa zina la Yehova, ilo ni zina lake leneko la Chiuta Wankhongonozose. a—Salimo 83:18.

Mu Baibolo mazgu ghakuti “kuchema pa zina la Yehova” ghakung’anamura vinandi padera pakumanya waka zina la Chiuta na kuligwiliskira ntchito pakusopa. (Salimo 116:12-14) Ghakung’anamuraso kumugomezga Chiuta kuti watovwirenge.—Salimo 20:7; 99:6.

Yesu wakawonanga kuti zina la Chiuta ndakuzirwa chomene. Mu lurombo lwake lwakuyelezgera, mazgu ghakwamba ngakuti: “Adada ŵithu imwe muli kuchanya, zina linu lituŵiskike,” panji kuti liŵe lituŵa. (Mateyu 6:9) Yesu wakati tikwenera kumumanya Chiuta, kumupulikira na kumutemwa kuti tizakasange umoyo wamuyirayira.—Yohane 17:3, 6, 26.

Chifukwa wuli tingati “Fumu” iyo yikuzunulika pa Ŵaroma 10:13 mu Tumbuka Bible, ni Yehova? Chifukwa pa vesi ili ŵakakora mazgu gha pa Joyeli 2:32 apo pali zina leneko la Chiuta, m’malo mwa zina la chithokozo lakuti “Fumu,” ilo likaŵa mu Chihebere chakwambilira. b

Fundo za pa Ŵaroma 10:13

Mu Ŵaroma chaputara 10, Baibolo likuyowoya kuti kuŵa pa ubwezi na Yehova vikuthemba pa kuŵa na chipulikano mwa Yesu Khristu. (Ŵaroma 10:9) Fundo iyi yikukolerana na ivyo vili kulembeka mu Tesitamenti Lakale. Munthu wakulongora chipulikano para “wakuzomera pakweru,” ivyo vikusazgapo kupharazga makani ghawemi gha chiponosko. Chifukwa cha makani agha, ŵanyake ŵakuŵa na chipulikano icho chikuŵawovwira kuti ŵazakapone.—Ŵaroma 10:10, 14, 15, 17.

Ŵazgani Ŵaroma chaputara 10 na kuwona umo lalongosolekera mu mazgu ghamusi na mu maliferensi.

a Zina la Chiuta likusangika mu mipukutu yakale ya Baibolo mu malo 7,000. Mu malemba Ghachihebere zina ili likalembekanga na vilembo vinayi ivyo vikuchemeka kuti Tetiragiramatoni. Kanandi zina ili likung’anamulika kuti “Yehova” mu Chitumbuka, ndipo ŵanyake ŵakuti “Yawe.”

b Ntchakuwonekerathu kuti Ŵakhristu awo ŵakalembako Baibolo ŵakakoranga mazgu kufuma mu malemba gha mu “Tesitamenti Lakale” agho ghakaŵanga na zina la Chiuta. Buku linyake likuti: ‘Pali ukaboni wakuti apo Tesitamenti Lasono likambanga kulembeka, vilembo vinayi ivyo vikuchemeka kuti Tetiragiramatoni, Zina la Chiuta kweniso Yawe, vikaŵamo mu malemba ghanyake panji ghose gha mu Tesitamenti Lakale agho ghakang’anamurika mu Tesitamenti Lasono.’ (The Anchor Bible Dictionary) Kuti mumanye vinandi wonani mutu wakuti “Zina la Chiuta mu Malemba Ghachigiriki” pa vyakusazgirapo A5 mu Baibolo la Malemba Ghakupatulika mu Mang’anamuliro gha Charu Chiphya.