MAVESI GHA MU BAIBOLO GHALONGOSOREKA

Joshuwa 1:9—“Uŵe Wankhongono na Wakukhwima Mtima”

JULANI

“Asi nakulangura? Khwima mtima na kuŵa wankhongono. Ungatenthemanga yayi panji kopa, chifukwa Yehova Chiuta wako wali nawe kulikose uko ukuya.”—Joshuwa 1:9, Mang’anamuliro gha Charu Chiphya.

“Asi ine ndakulangula? Uwe wankhongono na wakukhwima mtima, ungopanga nesi kuthika lusoko, pakuti FUMU, Chiuta wako waŵenge nawe kose uko ukuruta.”—Joshuwa 1:9, Mazgu gha Chiuta mu Kang’anamuliro Kaphya.

Ivyo Lemba la Joshuwa 1:9 Likung’anamura

Na mazgu gha pa lemba ili, Yehova a Chiuta wakasimikizgira muteŵeti wake wakugomezgeka Joshuwa kuti waŵe “wankhongono na kukhwima mtima” nanga wangasangana na viyezgo kweniso masuzgo agho ghangawoneka ghakuru. Joshuwa wakaŵikapo mtima kupulikira malango gha Chiuta ndipo wakeneranga yayi kopa ivyo wasanganenge navyo munthazi, chifukwa vikaŵa nga kuti Yehova wali nayo pafupi kumovwira kuti vimwendere makora. Chiuta wakaŵa na Joshuwa chifukwa wakamupanga ulongozgi kweniso kumovwira kuti wathereske ŵalwani ŵake.

Kasi Joshuwa wakatenge waŵe wuli “wankhongono na kukhwima mtima”? Iyo wakate wakhwimiskikenge na fundo kweniso malango agho Yehova wakapeleka pa nyengo yira. Ivi vikusazgapo ‘Dango lose ilo Mozesi muteŵeti wa Yehova wakaphalira Joshuwa.’ b (Joshuwa 1:7) Yehova wakaphalira Joshuwa kuti “uŵazgenge na kughanaghanirapo muhanya na usiku.” (Joshuwa 1:8) Nakuti kuŵerenga na kughanaghanirapo kukamovwira Joshuwa kuŵikapo mtima kuchita khumbo la Chiuta. Kweniso Joshuwa wakeneranga kuchita vinthu mwakukolerana na ivyo wakaŵerenganga mu Mazgu gha Chiuta, ‘mwakuti wachitenge mwakupwelelera vyose ivyo vikalembekamo.’ Kuchita nthena, kukatenge kumovwirenge kuti vimwenderenge makora kweniso kuti wachitenge vinthu mwavinjeru. Nakuti ndivyo vikachita nadi. Nangauli Joshuwa wakasangana na masuzgo, kweni wakhala umoyo utali na wakukhorweska pakuŵa muteŵeti wakugomezgeka wa Yehova.—Joshuwa 23:14; 24:15.

Mazgu agho Yehova wakaphalira Joshuwa ghachali ghakukhozga m’paka sono. Mazgu agha ghakulongora waka kuti Yehova wakupwelelera wose awo ŵakumusopa, chomene para ŵakusangana na masuzgo. Iyo wakukhumba kuti nawo vinthu viŵayendere makora nga umo vikaŵira na Joshuwa! Nga ni Joshuwa, nawo ‘ŵangakhwima mtima na kuŵa ŵankhongono’ para ŵakuŵerenga Baibolo zuŵa lililose na kughanaghanirapo kweniso kuchita vinthu mwakukolerana na ivyo ŵakuŵerenga.

Fundo za pa Joshuwa 1:9

Mozesi wati wafwa, Yehova wakati Joshuwa ndiyo wambe kulongozga mtundu wa Israyeli. (Joshuwa 1:1, 2) Pa nyengo iyo, Ŵaisrayeli ŵakaŵa kuti ŵakunozgekera kunjira mu Charu cha Layizgano, charu cha Kenani. Kweni kuti ŵanjire mu charu ichi, ŵakeneranga dankha kuthereska ŵalwani ŵawo awo ŵakaŵa ŵankhongono. Mwachiyelezgero, Joshuwa wakeneranga kurwa nkhondo na Ŵakenani, awo ŵakaŵa ŵanthu ŵaheni chomene. c (Dotoronome 9:5; 20:17, 18) Ŵakenani ŵakaŵaso ŵanandi kweniso ŵakaŵa na vilwero vya nkhondo vyakofya chomene kuluska Ŵaisrayeli. (Joshuwa 9:1, 2; 17:18) Kweni Joshuwa wakatenthema yayi, m’malo mwake wakachita chikanga na kulondezga ivyo Yehova wakamuphalira kuchita. Paumaliro, Chiuta wakalongora kuti wakaŵa nadi nayo, chifukwa mu vyaka 6 pera Ŵaisrayeli ŵakathereska ŵalwani ŵawo ŵanandi.—Joshuwa 21:43, 44.

a Yehova ni zina la Chiuta ndipo lili kung’anamulika kufuma ku zina la Chihebere ilo lili na vilembo vinayi (YHWH) ivyo vikumanyikwa kuti Tetiragiramatoni. Zina ili likulembeka kuti “FUMU” mu Mabaibolo ghanyake. Kuti mumanye vinandi vyakukhwaskana na Yehova kweniso chifukwa icho mu Mabaibolo ghanyake ŵakutondekera kugwiliskira ntchito zina ili, wonani nkhani yakuti “Kasi Yehova Ni Njani?”

b Ivyo vikalembeka kuti Joshuwa waŵazgenge, ndipo nase tichali kuŵazga mu Baibolo mazuŵa ghano, vikwenera kuti ni mabuku 5 agho Mozesi wakalemba (Genizesi, Ekisodo, Levitiko, Maŵazgo, na Dotoronome), buku la Yobu, kweniso Salimo limoza panji ghaŵiri mu buku la Masalimo.

c Pa nkhani yakuti chifukwa wuli nkhondo zanthena zikazomerezgekanga, wonani nkhani yakuti N’chifukwa Chiyani Mulungu Anawononga Akanani?” mu Gongwe la Mulinda la January 1, 2010.