“Chifukwa kwa Chiuta kulije mazgu agho ghangatondeka kuchitika.”—Luka 1:37, Mang’anamuliro gha Charu Chiphya.

 “Chifukwa kulije icho ntchambura machitiko na Chiuta.”—Luka 1:37, Phangano Liphya.

 Chiuta Wankhongonozose wangachita vinthu ivyo ŵanthu ŵakuwona kuti vingachitika yayi. Palije icho chingamutondeska kufiska ivyo wayowoya panji kulayizga.

 Mu chiyowoyero icho Baibolo likalembekera, pa vesi ili lizgu ilo lang’anamurika kuti “mazgu,” lingang’anamura “lizgu” panji ivyo Chiuta “wayowoya.” Lingang’anamuraso ivyo vingachitika para Yehova a wayowoya. Pakuti nyengo zose mazgu gha Chiuta ghakufiskika, lemba la Luka 1:37 lingang’anamuraso kuti: “Pakuti ivyo Chiuta walayizga vingatondeka yayi” panji kuti “Kwa Chiuta, palije icho chingatondeka kuchitika.” Mazgu ghose agha ghakuluta pa fundo yimoza yakuti: Palije mazgu panji ivyo Chiuta walayizga ivyo vingatondeka kufiskika, chifukwa palije icho chingamutonda Chiuta.”—Yes. 55:10, 11.

 Mazgu ghakuyana waka ghakukhwaskana na malayizgo gha Chiuta ghakusangika mu malo ghanandi mu Baibolo. Mwachiyelezgero, Yehova kwizira mwa mungelo wakayowoyerathu kuti Sara muwoli wa Abrahamu uyo wakababanga yayi wazamuŵa na nthumbo ku uchekuru wake. Chiuta wakayowoyaso kuti: “Kasi chilipo icho chingamutonda Yehova?” (Genizesi 18:13, 14) Yobu wakati waghanaghanirapo vinthu ivyo Chiuta wakalenga, wakayowoya kuti: “Chilichose icho mungaghanaghana, palije icho mungatondeka kuchita.” (Yobu 42:2) Nakuti panyengo yinyake apo ŵasambiri ŵa Yesu ŵakakayikiranga kuti ŵangakwaniska yayi kulondezga fundo za Chiuta kuti ŵazakaponoskeke, Yesu wakaŵakumbuska kuti, “kwa Chiuta vinthu vyose ni vyamachitiko.”—Mateyu 19:25, 26. b

 Mungelo Gabriyeli ndiyo wakayowoya mazgu gha pa Luka 1:37 kwa Mariya uyo wakaŵa mwali wa Chiyuda. Gabriyeli wakaŵa kuti waphalira kale Mariya kuti wazamubaba “Mwana wa Wapachanya Nkhanira” kweniso kuti zina lake lizamuŵa “Yesu.” Iyo wazamuŵa Fumu ya Ufumu wa Chiuta uwo uzamuwusa muyirayira.—Luka 1:26-33; Chivumbuzi 11:15.

 Mariya wakazizwa ndipo wakafumba umo vingachitikira pakuti iyo wakaŵa wambura kutengwa kweniso ‘wakaŵa kuti wandagonepo na mwanalume.’ (Luka 1:34, 35) Gabriyeli wakamuzgora kuti Chiuta wagwiliskirenge ntchito mzimu wake utuŵa panji kuti nkhongono iyo yikugwira ntchito. Pa nyengo iyi, Yesu wakaŵa kuti wali kuchanya pamoza na Chiuta pakuŵa mwana wake wauzimu. Ntheura Yehova wakagwiliskira ntchito mzimu wake utuŵa kusamuska umoyo wa Mwana wake kuchanya na kuwuŵika mu nthumbo mwa Mariya. (Yohane 1:14; Ŵafilipi 2:5-7) Mariya wakaŵa na nthumbo mwamunthondwe. Kuti mungelo wakhozge Mariya kuti waŵe na chipulikano chakukhora, wakamuphalira kuti mubali wake Elizabeti wali na nthumbo ndipo wababenge mwana msepuka “mu uchekuru wake.” Elizabeti na mfumu wake Zekariya ŵakaŵavya mwana chifukwa chakuti Elizabeti wakaŵa chumba. (Luka 1:36) Mwana wawo wakaŵa Yohane Mubatizi ndipo Yehova wakayowoyerathu uteŵeti uwo wazamuchita.—Luka 1:10-16; 3:1-6.

 Mungelo Gabriyeli wakayowoya mazgu agho ghali pa Luka 1:37. Wakwenera kuti wakayowoya ku wose, Mariya na Elizabeti. Mazgu agha ghangakhozgaso ŵateŵeti ŵa Yehova mazuŵa ghano kuti Yehova wakusunga malayizgo ghake. Limoza mwa malayizgo agha ndakuti Yehova wazamuwuskapo maboma gha ŵanthu na kukhazikiska boma laurunji ilo Mwana wake Yesu Khristu wazamulamulira.—Daniyeli 2:44; 7:13, 14.

 Wonelerani vidiyo yakudumura iyi, iyo yikulongosora ivyo vili mu buku la Luka.