“Uchindami kwa Chiuta kuchanya nkhanira, ndipo pa charu chapasi paŵe mtende pakati pa ŵanthu awo wakukondwa nawo.”—Luka 2:14, Mang’anamuliro gha Charu Chiphya.

 “Uchindami kwa Chiuta kuchanya, na pa charu chapasi chimango mu ŵanthu ŵeneawo wakucha nawo.”—Luka 2:14, Tumbuka Bible

 Mazgu ghakulumba agha, ŵakapharazga mbangelo pa nyengo iyo Yesu wakababikiranga. Ndipo ghakulongora kuti awo ŵakupulikana mwa Yesu, Chiuta wakukondwa nawo ndipo ŵakusanga mtende.

 “Uchindami kwa Chiuta kuchanya nkhanira.” Pakuyowoya mazgu agha, ŵangelo ŵakadidimizganga fundo yakuti Chiuta ndiyo wakwenera kupokera uchindami wose. Mazgu agha ghakulongoraso kuti kubabika kwa Yesu kweniso uteŵeti wake pa charu chapasi vikakhozgera kuti Yehova a Chiuta wakwenera kupokera uchindami. Mwachiyelezgero pa ivyo Yesu wakasambizganga, nyengo zose wakalumbanga Chiuta. Nyengo yinyake wakati: “Ivyo nkhusambizga ni vyane chara, kweni vya uyo wakanituma.” (Yohane 7:16-18) Apo Yesu wakachitanga minthondwe, ŵanthu awo ŵakamuwonanga ‘ŵakamba kuchindika Chiuta.’ (Luka 5:18, 24-26; Yohane 5:19) Nanga ni nyifwa ya Yesu yikapeleka uchindami kwa Chiuta. Yili kupeleka mwaŵi kwa Chiuta kuti wazakafiske khumbo lake likuru la kuzuzga charu chapasi na ŵanthu ŵarunji kuti ŵazakakhale mwamtende.—Genizesi 1:28.

 “Pa charu chapasi paŵe mtende.” Mtende uwu ukung’anamura kuti paŵavyenge nkhondo yayi. Kweni ni mtende wa mu mtima uwo munthu wakuŵa nawo chifukwa chakuti Yehova wakukondwa nayo. Tikuwonga chomene Yesu chifukwa mtende uwu ukuwovwira ŵanthu kuŵa paubwezi uwemi na Chiuta. (Yakobe 4:8) Pakuŵa Fumu ya Ufumu wa Chiuta, Yesu wizenge na mtende weneko pa charu chose chapasi.—Salimo 37:11; Luka 1:32, 33.

 “Ŵanthu awo wakukondwa nawo.” Mazgu agha ghakuyowoya vya ŵanthu awo Chiuta wakukondwa nawo, panji wakuŵatemwa chifukwa chakuti ŵakulongora chipulikano mwa iyo kweniso kwa uyo wakamutuma, Yesu. Ghakung’anamura kuti Chiuta wakukondwa na munthu waliyose yayi uyo vyakuchita vyake na nkharo yake ni viheni, nesi kung’anamura kuti Chiuta wakukondwa na chilichose icho munthu wakuchita. Mu ma Baibolo ghanyake, nga Tumbuka Bible, ŵali kung’anamura lizgu ili kuti, “chimango mu ŵanthu ŵeneawo wakucha nawo.” Ndipouli, mu mipukutu yakale ya Chigiriki mu Baibolo la Mang’anamuliro gha Charu Chiphya na ma Baibolo ghanyake ghasono pa lizgu ili lakuti mtende ghakuyowoya vya mtende uwo ukuŵa pakati pa ŵanthu awo Chiuta wakukondwa nawo.—Wonani “ Luka 2:14 Kufuma mu ma Baibolo Ghanyake.”

 Luka chipaturo 2 chikulongosora vya nyengo yakwambilira ya umoyo wa Yesu apo wakaŵa pa charu chapasi. Pamanyuma pakuti wababika waka, mungelo wakawonekera ku ŵaliska awo “ŵakakhalanga kuwaro usiku na kulinda miskambo yawo.” b (Luka 2:4-8) Mungelo wakapharazga “makani ghawemi gha chimwemwe chikuru,” kuphalira ŵaliska kuti: “Muhanya uno kwamubabikirani mponoski, uyo ni Khristu Fumu, mu msumba wa Davide.” (Luka 2:9-11) Ŵaliska ŵakaphalirika uko ŵamusanga bonda, ndipo pamanyuma ŵakajiwonera ŵekha kuti ŵangelo ŵakulumba Chiuta. Ŵakati ŵafika ku Betelehemu, ŵaliska ŵakasanga Mariya na Yosefe pamoza na bonda Yesu. (Luka 2:12-16) Pamanyuma pakuti ŵayowoya vya munthondwe uwo ŵakawona, ŵaliska ŵakawelera ku miskambo yawo, “ŵakapelekanga uchindami na kulumba Chiuta chifukwa cha vinthu vyose ivyo ŵakapulika na kuwona.”—Luka 2:17-20.

 “Uchindami kwa Chiuta kuchanya nkhanira, ndipo mtende pa charu chapasi ku ŵanthu awo wakucha nawo.”—Luka 2:14, Phangano Liphya.

 “Uchindami kwa Chiuta kuchanya nkhanira, ndipo mtende pa charu chapasi ku ŵanthu awo wakucha nawo.”—Luka 2:14, Testamente la Sono.

 “Uchindami kwa Chiuta kuchanya nkhanira, ndipo pa charu chapasi paŵe mutende pakati pa ŵanthu awo iyo wakucha nawo.”—Luka 2:14, Mazgu gha Chiuta mu Kang’anamuliro Kaphya.

 Wonelerani vidiyo yifupi waka iyi kuti muwone ivyo vili mu buku la Luka.