MAVESI GHA MU BAIBOLO GHALONGOSOREKA

Mariko 1:15—“Ufumu wa Chiuta Waneng’enera”

JULANI

“Nyengo yakutemeka yafiskika, ndipo Ufumu wa Chiuta waneng’enera. Ng’anamukani mtima, ndipo muŵe na chipulikano mu makani ghawemi.”—Mariko 1:15, Mang’anamuliro gha Charu Chiphya.

‘Nyengo yafiskika, ndipo Ufumu wa Chiuta waneng’enera: ng’anamukani mu mtima na kupulikana na ivangeli.’—Mariko 1:15, Tumbuka Bible.

Ivyo Lemba la Mariko 1:15 Likung’anamura

Yesu wakati Ufumu wa Chiuta a “uli pafupi” panji kuti “waneng’enera” chifukwa chakuti iyo wazamuŵa Fumu ya Ufumu uwu kweniso panyengo iyi wakaŵa lumoza na ŵanthu awo ŵakamutegherezganga.

Yesu wakang’anamuranga kuti Ufumu wamba kale kuwusa yayi. Nakuti pamanyuma wakaphalira ŵasambiri ŵake kuti Ufumu wizenge kunthazi. (Milimo 1:6, 7) Ndipouli, Yesu wakiza panyengo yake, mu chaka icho Baibolo likayowoyerathu kuti wazamwiza nga ni Fumu. b Pa chifukwa ichi, lekani Yesu wakayowoya kuti: “Nyengo yakutemeka yafiskika.” Apa wakayowoyanga nyengo yakuti wambire kupharazga uthenga uwemi wa Ufumu.—Luka 4:16-21, 43.

Kuti ŵanthu ŵasange chandulo na uthenga uwemi wa Ufumu, ŵakeneranga kusintha, kung’anamura kuwamo kuti ivyo ŵakachitanga kumanyuma vikaŵa viheni na kwamba kukhala mwakukolerana na fundo za Chiuta. Awo ŵakasintha, ŵakalongora kuti ŵakaŵa na chipulikano mu makani ghawemi ghakuyowoya vya Ufumu uwo wizenge kunthazi.

Fundo za pa Mariko 1:15

Yesu wakayowoya mazgu agha apo wakambanga waka uteŵeti wake ku Galileya. Lemba la Mateyu 4:17 ilo pali mazgu ghakuyanako waka likuti “kufuma pa nyengo yira,” Yesu wakapharazganga vya Ufumu wa Chiuta. Ufumu wa Chiuta ndiwo ukaŵa mutu ukuru wa upharazgi wa Yesu. Nakuti mazgu ghakuti Ufumu ghakuzunulika maulendo ghakujumpha 100 mu mabuku ghanayi gha Makani Ghawemi c, ndipo ghanandi ghali mu mazgu agho Yesu wakayowoya. Mu Baibolo, Yesu wakayowoyanga chomene vya Ufumu wa Chiuta kuluska nkhani yiliyose.

Ŵazgani Mariko chaputara 1 na mazgu ghamusi, maliferensi ghanyake mu Baibolo, vithuzi, na mapu.

a Ufumu wa Chiuta ni boma lakuchanya ilo Chiuta wali kukhazikiska kuti wafiske khumbo lake pa charu chapasi. (Daniyeli 2:44; Mateyu 6:10) Kuti mumanye vinandi, wonani nkhani ya mutu wakuti “Kasi Ufumu wa Chiuta Ni Vichi?”

b Yesu wakeneranga kuzakaŵa themba kuti wafiske udindo wake wakuŵa mwimiliri wapadera wa Chiuta, nga Mesiya uyo wakalayizgika. Kuti mumanye vinandi vya uchimi wa mu Baibolo wakuyowoya za chaka icho Mesiya wakenera kuwonekera, wonani nkhani ya mutu wakuti: “Umo Uchimi wa Daniyeli Ukayowoyerathu za Kwiza kwa Mesiya.”

c Mabuku gha Makani Ghawemi ni mabuku ghanayi ghakwambilira mu Malemba Ghachigiriki, agho ghakumanyikwaso kuti Tesitamenti la Sono, ndipo ghakuyowoya vya umoyo wa Yesu na uteŵeti wake.