MAVESI GHA MU BAIBOLO GHALONGOSOREKA
Salimo 37:4—“Ukondwerenge mu FUMU”
“Ukondwere chomene mwa Yehova, ndipo wakupenge ivyo mtima wako ukukhumba.”—Salimo 37:4, Mang’anamuliro gha Charu Chiphya.
“Ukondwerenge mu FUMU, ndipo yiti yikupe ivyo mtima wako ukukhumba.”—Salimo 37:4, Mazgu gha Chiuta mu Kang’anamuliro Kaphya.
Ivyo Lemba la Salimo 37:4 Likung’anamura
Wamasalimo wakachiska ŵateŵeti ŵa Chiuta kuti ŵaŵenge ŵakukondwa chifukwa chakuŵa paubwezi uwemi na Chiuta. Ŵanthu wose awo ŵali nayo paubwezi ŵangaŵa ŵakusimikizga kuti Yehova a Chiuta waŵapenge vinthu viwemi vyakwenelera ivyo ŵakukhumba.
“Ukondwere chomene mwa Yehova.” Mazgu agha ghangang’anamuraso kuti “Usekelere chomene mwa Yehova,” “Ukondwere pakuteŵetera FUMU,” panji “Ukondwere mu ivyo FUMU yamulayizgani.” Mwakudumura, tikwenera kukondwa chomene” pakusopa Chiuta. (Salimo 37:4, mazgu ghamusi) Chifukwa wuli tikwenera kukondwa?
Awo ŵakuteŵetera Yehova ŵakuwona vinthu umo iyo wakuviwonera nga umo Baibolo likuyowoyera. Iwo ŵakumumanya Chiuta kweniso ŵakumupulikira. Ntheura ivi vikuŵawovwira kusankha vinthu mwamahara ndipo ŵakuŵa na njuŵi yituŵa. (Zintharika 3:5, 6) Mwachiyelezgero, iwo ŵakutukutwa na ukali yayi nesi kuchita sanji para ŵakuwona ŵanthu ŵaheni vinthu vikuŵayendera makora. (Salimo 37:1, 7-9) Ŵanthu ŵa Chiuta ŵakuŵa ŵakukondwa pakumanya kuti sonosono apa Chiuta wamazgenge vinthu vyambura urunji ndipo wazamutumbika ŵanthu ŵake chifukwa cha kuŵa na nkharo yiwemi. (Salimo 37:34) Kweniso ŵakuŵa ŵakukondwa pakumanya kuti Adada ŵawo ŵakuchanya ŵakukondwa nawo.—Salimo 5:12; Zintharika 27:11.
“Wakupenge ivyo mtima wako ukukhumba.” Mazgu agha ghangang’anamurikaso kuti “iyo wakuzgorenge malurombo yako” panji “iyo wakupenge ivyo mtima wako ukukhumba chomene.” Mbunenesko kuti Yehova wangatipa waka chilichose icho takhumba yayi. Nga umo vikuŵira na mupapi muwemi, Yehova wakumanya icho ntchiwemi ku ŵana ŵake. Kweniso ivyo tikupempha na umo tikuchitira vinthu vikwenera kukolerana na fundo zake kweniso khumbo lake. (Zintharika 28:9; Yakobe 4:3; 1 Yohane 5:14) Para vyaŵa nthena tingalomba kwa “ŵakupulika malurombo” na chigomezgo chose kuti watizgorenge.—Salimo 65:2; Mateyu 21:22.
Fundo ya pa Salimo 37:4
Themba Davide ndilo likalemba Salimo 37. Themba ili likalemba mwakulondezga alufabeti panji mwandakaturo. b
Davide wakasuzgika na vinthu vinandi vyambura urunji. Iyo wakachimbira na kukabisama apo Sauli na ŵanyake ŵakakhumbanga kumukoma. (2 Samuyeli 22:1) Kweni nyengo zose Davide wakathembanga Chiuta. Iyo wakamanyanga kuti paumaliro Yehova wazamulanga ŵanthu ŵaheni. (Salimo 37:10, 11) Nanga vinthu vingaŵayendera makora nga ‘mbutheka wakubiliŵira’ kweni para nyengo yajumphapo ŵazamusangikaso yayi.—Salimo 37:2, 20, 35, 36.
Salimo 37 likutisimikizgira ivyo vizamuchitikira ŵanthu awo ŵakulondezga malango gha Chiuta na awo ŵakutondeka kupulikira. (Salimo 37:16, 17, 21, 22, 27, 28) Ntheura Salimo ili likutovwira kuti tiŵe ŵanthu ŵavinjeru kweniso awo Chiuta wakukondwera nawo.
Wonelerani vidiyo yifupi iyi kuti muwone ivyo vili mu buku la Masalimo.
a Yehova ni zina la Chiuta para tang’anamulira mu Chitumbuka kufuma ku Chihebere. Kuti mumanye chifukwa icho mu Mabaibolo ghanandi ŵali kuwuskiramo zina ili na kuŵikamo la chithokozo lakuti Fumu, wonani nkhani ya mutu wakuti, “Kasi Yehova Ni Njani?”
b Mwakuyana na ndondomeko iyi yakalembero, vesi lakwamba panji gulu lakwamba la mavesi likwamba na chilembo chakwamba cha alufabeti ya Chihebere ndipo mavesi ghakulondezgapo ghakwamba na chilembo chachiŵiri na kulutilira ntheura. Kalembero aka kakwenera kuti kakawovwiranga ŵanthu kuti ŵakumbukirenge Salimo ili.
Panji Mungatemwa Kuŵerengaso Nkhani Izi
GONGWE LA MULINDA
Kasi Chiuta Wakupulika Malurombo Ghithu?
Baibolo likutisimikizgira kuti Chiuta wakupulika para tikulomba munthowa yakwenelera.
NKHANI ZINYAKE
Chigomezgo Chakuti Kunthazi Vinthu Vizamusintha
Chifukwa wuli ivyo Baibolo likulayizga vikupambana chomene na ivyo ŵanthu ŵakulayizga panji kuyowoyerathu?
VISAMBIZGO VINYAKE VYA MU BAIBOLO
Kasi Vingachitika Kuŵa Paubwezi na Chiuta?
Kwa vyaka vinandi, ŵanthu ŵakukhumba chomene kumumanya makora Mlengi wawo. Baibolo lingatovwira kuti tiŵe paubwezi na Chiuta. Ubwezi uwu ukwamba na kumanya zina la Chiuta.
MAVESI GHA MU BAIBOLO GHALONGOSOREKA
Lemba la Mateyu 11:28-30, Lalongosoreka—“Zani kwa Ine, . . . Ndipo Ine Nditi Ndimupumuzganinge”
Kasi Yesu wakang’anamuranga kuti wafumiskengepo masuzgo na vinthu vyambura urunji nyengo yeneyiyo?
IVYO BAIBOLO LIKUSAMBIZGA
Yezgani Kusambira Nase Baibolo
Sangani mwaŵi wakusambira Baibolo munthowa yakudumbiskana na munthu.
