“Zomerani na kumanya kuti ine ndine Chiuta. Nikwezgekenge mu ŵamitundu, Nikwezgekenge mu charu chapasi.”—Salimo 46:10, Mang’anamuliro gha Charu Chiphya.

 ‘Mute chete; mumanye kuti Ine ndine Chiuta; tinditumphuskike mwa ŵamitundu; tinditumphuskike mu vyaru vyose.’—Salimo 46:10, Tumbuka Bible.

 Chiuta wakuchiska waliyose kuti wamusopenge iyo na kumanya kuti iyo ndiyo ngwakwenelera kuwusa charu chose chapasi. Nakuti waliyose uyo wakukhumba kuzakakhala na umoyo kwamuyirayira wakwenera kumanya kuti Chiuta wali na nkhongono kweniso mazaza.—Chivumbuzi 4:11.

 “Zomerani na kumanya kuti ine ndine Chiuta.” Mu Mabaibolo ghanyake, chigaŵa chakwamba cha mazgu agha chili kung’anamurika kuti “muti chete.” Ivi vyatimbanizga ŵanthu ŵanandi ndipo ŵakuwona kuti mazgu agha ni dango lakuti waliyose wakwenera kulongora ntchindi panji kukhala chete mu tchalitchi. Ndipouli, mazgu gha Chihebere agho ghali kung’anamurika kuti “zomerani na kumanya kuti ine ndine Chiuta,” wakuyowoya ni Yehova a Chiuta iyomwene, ndipo ghakuluta ku ŵanthu ŵa mitundu yose, kuŵachiska kuti ŵaleke kwimikana nayo na kumanya fundo yakuti iyo pera ndiyo ngwakwenelera kusopeka.

 Mazgu ghakuyana waka ghakusangika mu Salimo 2. Mu salimo ili, Chiuta wakulayizga kuti waŵalekenge waka yayi awo ŵakwimikana nayo. Apo awo ŵakumanya kuti Chiuta wali na mazaza ŵakuthemba iyo kuti waŵalongozge, kuŵapa nkhongono na vinjeru. Pakuti “ŵakubisama mwa Iyo,” ŵakuŵa ŵakukondwa kweniso ŵakujipulika ŵakuvikilirika, chomene para ŵakujumpha mu nyengo zakusuzga.—Salimo 2:9-12.

 “Nikwezgekenge mu ŵamitundu, nikwezgekenge mu charu chapasi.” Mu nyengo yakale, Yehova Chiuta wakakwezgeka apo wakagwiliskira ntchito nkhongono zake zikuru pakuvikilira ŵanthu ŵake. (Ekisodo 15:1-3) Kunthazi uku, wazamukwezgeka chomene kuluska kumasinda kose apo waliyose pa charu chapasi wazamujilambika ku mazaza ghake na kusopa iyo pera.—Salimo 86:9, 10; Yesaya 2:11.

 Buku linyake likuti Salimo 46 “ni sumu iyo yikulumba nkhongono za Chiuta, muvikiliri wankhongono wa ŵanthu ŵake.” Apo ŵakimbanga Salimo 46, ŵanthu ŵa Chiuta ŵakalongoranga waka kuti ŵakuthemba Yehova kuti waŵavikilire na kuŵawovwira. (Salimo 46:1, 2) Mazgu gha mu salimo ili ghakaŵakumbuskanga kuti Yehova wali nawo nyengo zose.—Salimo 46:7, 11.

 Kuti ŵathembe chomene nkhongono zakuvikilira za Yehova Chiuta, wamasalimo wakaŵachiska kuti ŵakwenera kughanaghanirapo milimo yake yankhongono. (Salimo 46:8) Mwakudumura tingati, mazgu gha mu salimo ili ghakadidimizga chomene fundo yakuti Chiuta wangamazga nkhondo. (Salimo 46:9) Nakuti nadi, Yehova wakamazganga nkhondo mu nyengo yakale apo wakavikiliranga ŵanthu ŵake ku ŵalwani ŵawo. Ndipouli, Baibolo likulayizga kuti sonosono apa Chiuta wamazgenge nkhondo ya mtundu uliwose pa charu chose chapasi.—Yesaya 2:4.

 Kasi Yehova wachali kovwira ŵanthu ŵake mazuŵa ghano? Enya. Nakuti mpositole Paulosi wakachiska chomene Ŵakhristu kuti ŵakwenera kuthemba Chiuta kuti waŵawovwire. (Ŵahebere 13:6) Mazgu agho ghali mu Salimo 46 ghakutovwira kuti tigomezgenge chomene kuti Chiuta wali na nkhongono zakutivikililira. Ghakutovwira kuti tiwonenge Chiuta kuti ndiyo “ntchiphokwero chithu na nkhongono zithu.”—Salimo 46:1.

 Wonelerani vidiyo yakudumura iyi, iyo yikulongosora ivyo vili mu buku la Masalimo.