“Kweni awo ŵakugomezga Yehova ŵaŵengeso na nkhongono. Ŵadukenge na mapapindo nga ni nombo. Ŵachimbirenge, kweni ŵalopwenge chara. Ŵendenge ndipo ŵavukenge yayi.”—Yesaya 40:31, Mang’anamuliro gha Charu Chiphya.

 ‘Kweni awo ŵakulindirira Yehova ndiŵo tiŵapokereso nkhongono ziphya, tiŵawuruke na mapapindo nga ndi nombo, tiŵachamale, ndipo kuti ŵamkuvuka chara, tiŵende-ŵendenge pasi kwambura kulopwa nkhongono.’—Yesaya 40:31, Tumbuka Bible.

 Yehova a Chiuta, wakusimikizgira awo ŵakumusopa kuti waŵapenge nkhongono izo ŵakukhumbikwira kuti ŵatonde panji kuzizipizga suzgo lililose ilo ŵangakumana nalo.

 “Awo ŵakugomezga Yehova ŵaŵengeso na nkhongono.” Awo ŵali na chigomezgo kuti Chiuta wali na nkhongono kweniso kuti ngwakukhumbisiska kovwira ŵanthu ŵake, ŵangaŵa na chigomezgo chose kuti iyo waŵawovwirenge. (Zintharika 3:5, 6) Nthowa yimoza iyo Chiuta wangaŵapira nkhongono awo ŵakumusopa nkhwizira mu nkhongono yake ya mzimu utuŵa.—Luka 11:13.

 “Ŵadukenge na mapapindo nga ni nombo.” Mazgu agha ghakutipa waka chithuzi cha umo munthu wakuŵira para wangapokera nkhongono zakufuma kwa Chiuta. Nombo yikuthemba mphepo zakuthukira kuti yiduke na kufika kuchanya chomene. Para nombo yasangana na mphepo izi, yikutandawura mapapindo ndipo yikuyegheka waka na mphepo izi m’paka muchanya. Chifukwa cha mphepo zakuthukira, nombo yingakhala muchanya kwanyengo yitali kwambura kuvuka chomene.

 “Ŵachimbirenge, kweni ŵalopwenge chara.” Masuzgo agho tikusangana nagho pa umoyo ghangatilopweska panji kutipangiska kuti tenjerwenge chomene, kweni tingalutilira kuzizipizga chifukwa cha nkhongono izo Chiuta wakutipa. Nkhongono izo Chiuta wakutipa zingatovwira kuti tichite icho ntchiwemi nangauli tikukumana na masuzgo ghakofya. Mpositole Paulosi uyo wakazizipizga masuzgo ghakuru, wakalemba kuti: “Mu vinthu vyose, nkhusanga nkhongono mwa uyo wakunipa nkhongono.”—Ŵafilipi 4:13.

 Chiuta wakatuma ntchimi Yesaya kuti yilembe mazgu agha cha m’ma 700 B.C.E. Nangauli mazgu agha ghakuluta ku ŵateŵeti wose ŵa Chiuta ŵakugomezgeka, kweni Yehova wakwenera kuti wakayowoya mazgu agha kuti wakhozge Ŵayuda awo ŵakeneranga kutolekera ku wuzga ku Babuloni kwa vyaka 70. Apo Ŵayuda ŵakaweleranga ku kwawo kufuma ku wuzga, ŵakawona mazgu gha Chiuta agha ghakufiskika. (Yesaya 40:1-3) Chiuta wakaŵapa nkhongono kuti ŵafiske kwenda mtunda b utali chomene kweniso wakusuzga kufuma ku Babuloni m’paka ku Yerusalemu mu 537 B.C.E.—Yesaya 40:29.