“Palije uyo wali na chitemwa chikuru kuluska ichi, chakuti munthu wapeleke umoyo wake chifukwa cha ŵabwezi ŵake.”—Yohane 15:13, Mang’anamuliro gha Charu Chiphya.

 “Palive muntu wali na kutemwa kukuru kwakuruska uku, kwakuti waŵikire pasi umoyo wake cifukwa ca ŵabali ŵake.”—Yohane 15:13, Tumbuka Bible.

 Yesu wakawovwiranga ŵalondezgi ŵake kupulikiska fundo yakuti chitemwa chawo chikwenera kuŵa chikuru chomene ndipo ŵakwenera kuŵa ŵakukhumbisiska kupeleka umoyo wawo chifukwa cha ŵanyawo.

 Pambere wandayowoye mazgu gha mu vesi ili, Yesu wakaphalira ŵapositole ŵake kuti: “Ili ni dango lane, lakuti mutemwanenge nga umo ine namutemwerani.” (Yohane 15:12) Kasi Yesu wakaŵalongora chitemwa cha mtundu wuli? Chitemwa cha kujipata. Apo Yesu wakaŵa pano pasi, wakadangizganga vyakukhumba vya ŵalondezgi ŵake m’malo mwa vyake. Wakachizganga ŵanthu ku maulwari ghawo na kuŵasambizga vya Ufumu wa Chiuta. a Wakachitanga na milimo iyo yikawonekanga yapasi na chilato chakuti wawovwire ŵanji. (Mateyu 9:35; Luka 22:27; Yohane 13:3-5) Kweni pa Yohane 15:13, Yesu wakayowoyanga za chitemwa chikuru kuluska apa. Nakuti pati pajumpha maora ghachoko waka wati wayowoya mazgu agha, wakalongora chitemwa chikuru chomene ichi apo wakapeleka mwakukhumbisiska “umoyo wake kuŵa chiwombolero cha ŵanandi.” (Mateyu 20:28; 22:39) Apa Yesu wakalongora nadi pakweru kweniso mu nthowa yapadera kuti wakatemwanga chomene ŵanji kuluska umo wakajitemweranga mwenecho.

 Yesu wakuŵatemwa ŵanthu. Kweni chomene wakutemwa awo ŵakulondezga ivyo wakasambizganga. Iyo wakawonanga ŵasambiri ŵake kuti mbabwezi ŵake chifukwa ŵakapulikiranga ulongozgi wake na kuŵa nayo mu viyezgo vyake. (Luka 22:28; Yohane 15:14, 15) Ntheura pakaŵa pakwenelera nadi kuti wapeleke umoyo wake chifukwa cha iwo.

 Ŵakhristu ŵa mu nyengo yakale ŵakapulikira mazgu gha Yesu agha, ndipo ŵakaŵa ŵakukhumbisiska kupeleka umoyo wawo chifukwa cha ŵanyawo. (1 Yohane 3:16) Nakuti pamanyuma chitemwa cha kujipata ichi—cha nga ni icho Yesu wakalongora, ndicho chikaŵa nthowa yikuru chomene yakovwira ŵanthu kumanya awo Mbakhristu ŵaunenesko nadi.—Yohane 13:34, 35.

 Mu chaputara 13 m’paka 17 cha buku la Makani Ghawemi umo wakalembera Yohane, muli mazgu ghaumaliro agho Yesu wakaphalira ŵapositole ŵake ŵakugomezgeka 11 kweniso lurombo lwake lwaumaliro ulo wakalombera nawo lumoza. Pati pajumpha maora ghachoko waka, wakafwa. Mu chaputara 15, Yesu wakayaniska ŵasambiri ŵake na munthavi uwo uli ku khuni la mpheska na chilato chakuti waŵawovwire kumanya kuti ŵangalongora kuti mbasambiri ŵake nadi para ŵakulutilira kuŵa mu umoza na iyo. Iyo wakaŵachiska kuti lutilirani “kupambika vipambi vinandi.” (Yohane 15:1-5, 8) Nthowa yimoza iyo ŵakachitira nthena ndiyo kulutilira kulongora chitemwa cha kujipata ku ŵanji, kweniso kupharazga uthenga uwo Yesu wakapharazganga—“makani ghawemi gha Ufumu wa Chiuta.”—Luka 4:43; Yohane 15:10, 17.

 Wonelerani vidiyo yifupi waka iyi kuti mumanye ivyo vili mu buku la Yohane.