“Peleka kwa Yehova chose icho ukuchita, ndipo ivyo ukughanaghana vikwenderenge makora.”—Zintharika 16:3, Mang’anamuliro gha Charu Chiphya.

 “Pereka milimo yako kwa Yehova, ndipo ivyo mukukhumba kuchita vikhozgekenge.”—Zintharika 16:3, Tumbuka Bible.

 Ntharika iyi yikusimikizgira wose awo ŵakusopa Chiuta waunenesko kuti ivyo ŵakukhumba kuchita viŵayenderenge makora usange ŵakumugomezga na kulondezga fundo zake.

 “Peleka kwa Yehova chose icho ukuchita.” Pambere ŵandasankhe chakuchita, awo ŵakusopa Yehova a ŵakupempha dankha ulongozgi kwa iyo. (Yakobe 1:5) Chifukwa wuli? Chifukwa chimoza ntchakuti, ŵanthu mbakupeleŵera panji kuti ŵalije mazaza pa vinthu ivyo vingaŵachitikira pa umoyo wawo. (Mupharazgi 9:11; Yakobe 4:13-15) Kweniso vinjeru vyawo ni vyakupeleŵera kuti ŵafiske vilato vyawo. Pa vifukwa ivi, ŵanandi ŵakuthemba dankha Chiuta pambere ŵandasankhe vyakuchita. Ŵakuchita nthena mwa kulomba kwa Chiuta kuti waŵape ulongozgi kweniso vyakuchita vyawo vikukolerana na khumbo lake ilo wali kulivumbura mu Mazgu ghake Baibolo.—Zintharika 3:5, 6; 2 Timote 3:16, 17.

 Lizgu lakuti “peleka milimo yako kwa FUMU” b likung’anamura “kukunkhuzgira milimo yako kwa FUMU.” Kuyana na buku linyake, lizgu ili likuyowoya vya “munthu uyo wanguyegha katundu muzito ndipo sono wakuthwikiska munthu munyake wankhongono na chilato chakuti wapepuskikeko.” Awo ŵakumuthemba chomene Chiuta ŵangaŵa na chigomezgo chose kuti waŵawovwirenge na kuŵakhozga.—Salimo 37:5; 55:22.

 Lizgu lakuti “chose icho ukuchita” likung’anamura kuti Chiuta wazomerezgenge panji kutumbika chilichose icho munthu wakukhumba kuchita yayi. Kuti Yehova wamutumbike, ivyo wakukhumba kuchita vikwenera kukolerana na fundo zaurunji za Chiuta kweniso khumbo lake. (Salimo 127:1; 1 Yohane 5:14) Chiuta wakutumbika yayi awo ŵakuleka kumupulikira. Kweni “wakutimbanizga maghanoghano gha ŵaheni.” (Salimo 146:9) Ndipouli wakovwira awo mbakujilambika kwa iyo ndipo ŵakuchindika fundo zake izo zili mu Baibolo.—Salimo 37:23.

 “Ndipo ivyo ukughanaghana vikwenderenge makora.” Mu Mabaibolo ghanyake, mazgu agha ghali kung’anamurika kuti “ivyo ukughanaghana vikhozgekenge.” Mu Malemba gha Chihebere, agho kanandi ghakumanyikwa kuti Testamente Lakale, lizgu ilo lili kung’anamurika mu Chingelezi lakuti “kukhozgeka” likupeleka fundo yakuzenga fawundeshoni, ndipo kanandi likuyowoya umo Chiuta wali kukhozgera vinthu ivyo wali kulenga. (Zintharika 3:19; Yeremiya 10:12) Ndimo Chiuta wakuchitira kuti wakhozge ivyo munthu wakukhumba kuchita pekha para wakuchita icho ntchakwenelera pa maso ghake, ndipo wakumovwira kuti waŵe wakuvikilirika, wambura wofi, kweniso wakuŵa na umoyo uwemi.—Salimo 20:4; Zintharika 12:3.

 Wakalemba ntharika iyi ni Themba Solomoni, uyo wakalemba chigaŵa chikuru cha buku la Zintharika. Wakamanyanga kuyowoya ntharika masauzandi ghanandi chifukwa cha vinjeru ivyo Chiuta wakamupa.—1 Mathemba 4:29, 32; 10:23, 24.

 Mu chipaturo 16, Solomoni wakwamba kulumba vinjeru vya Chiuta kweniso kulongora umo Chiuta wakutinkhira ŵanthu ŵakujikuzga. (Zintharika 16:1-5) Chipaturo ichi chikovwira awo ŵakuŵazga buku ili kuti ŵapulikiske fundo yikuru iyo yili kulembeka mwakuwerezgawerezga mu buku la Zintharika: Yakuti ŵanthu ŵangasanga vinjeru vyanadi ndipo vinthu vingaŵayendera makora pekha usange mbakujiyuyura, ndipo ŵakuzomerezga kuti Chiuta ndiyo walongozgenge mendero ghawo. (Zintharika 16:3, 6-8, 18-23) Unenesko wambura kususkika uwu ukusangika mu Baibolo mwakuwerezgawerezga.—Salimo 1:1-3; Yesaya 26:3; Yeremiya 17:7, 8; 1 Yohane 3:22.

 Wonelerani vidiyo yifupi waka iyi yakulongosora mwakudumura ivyo vili mu buku la Zintharika.