“Uthembenge Yehova na mtima wako wose, ungagomezganga pa kapulikiskiro kako yayi. Mu mendero ghako ghose maso ghako ghaŵe kwa iyo, ndipo wakunyoloskerenge nthowa zako.”—Zintharika 3:5, 6, Mang’anamuliro gha Charu Chiphya.

 “Ugomezgenge FUMU na mtima wako wose, ureke kweghamira ku umanyi wako na wako pera. Mu milimo yako yose ukumbukenge FUMU, ndipo iyo wati wanyoroske nthowa zako.”—Zintharika 3:5, 6, Mazgu Gha Chiuta mu Kang’anamuliro Kaphya.

 Tikwenera kupempha Yehova a Chiuta kuti ndiyo watilongozge para tikusankha chakuchita pa nkhani zikuru, m’malo mwakujithemba waka tekha.

 “Uthembenge Yehova na mtima wako wose.” Tikulongora kuti tikuthemba Chiuta para tikuchita vinthu kuyana na khumbo lake. Tikwenera kumuthemba chomene Chiuta, na mtima withu wose. Mu Baibolo, mazgu ghakuti mtima kanandi ghakwimira wunthu wamukati, ivyo vingasazgapo umo munthu wakujipulikira, vilato, kaghanaghaniro, na umo wakuwonera vinthu. Ntheura kuthemba Chiuta na mtima withu wose kukusazgapo vinandi padera pa umo tikujipulikira waka. Tikusankha kuchita nthena chifukwa chakuti tili kukhorwa kuti Mlengi withu wakumanya makora icho ntchiwemi kwa ise.—Ŵaroma 12:1.

 “Ungagomezganga pa kapulikiskiro kako yayi.” Tikwenera kuthemba Chiuta Chifukwa kuthemba maghanoghano ghithu ghambura kufikapo kungatovwira yayi. Usange tikujithemba panji kulongozgeka waka na makhumbiro ghithu, tingasankha vinthu ivyo pakwamba vingawoneka nga kuti ni viwemi waka kweni paumaliro tingazakanjira navyo mu suzgo. (Zintharika 14:12; Yeremiya 17:9) Vinjeru vya Chiuta ni vyapachanya chomene pakuyaniska na vithu. (Yesaya 55:8, 9) Para tikulongozgeka na maghanoghano ghake, vinthu vitiyenderenge makora pa umoyo withu.—Salimo 1:1-3; Zintharika 2:6-9; 16:20.

 “Mu mendero ghako ghose maso ghako ghaŵe kwa iyo.” Tikwenera kumanya dankha maghanoghano gha Chiuta pa nkhani zikuru izo tikukhumba kusankha pa umoyo withu. Tingachita nthena mwa kulomba wovwiri na kulondezga ivyo wakuyowoya mu Mazgu ghake, Baibolo.—Salimo 25:4; 2 Timote 3:16, 17.

 “Wakunyoloskerenge nthowa zako.” Chiuta wakunyoloska nthowa zithu mwakutovwira kuti tikhalenge mwakukolerana na fundo zake zaurunji. (Zintharika 11:5) Ivi vikutovwira kugega masuzgo na kwamba kukhala umoyo wakukondwa.—Salimo 19:7, 8; Yesaya 48:17, 18.

 Buku la mu Baibolo la Zintharika lili na fundo zakuzirwa pa umoyo izo zingatovwira kuti tikondweskenge Chiuta. Machaputara 5 ghakwambilira ghali kulembeka nga kuti dada wakupeleka ulongozgi kwa mwana wake uyo wakumutemwa. Chaputara 3 chikulongosora uwemi uwo ukuŵapo ku awo ŵakuzirwiska na kulondezga vinjeru vya Mlengi.—Zintharika 3:13-26.