1 Timote 5:1-25
5 Ungachenyanga mwanalume mulara mwaukali yayi,+ kweni umudandawulire nga ni wuso. Ŵanyamata uyowoyenge nawo nga mbana ŵakwako,
2 ŵanakazi ŵalara nga mbanyoko, ŵamwali nga mbadumbu ŵako, ndipo uleke kuŵa na maghanoghano ghaheni.
3 Ughanaghanirenge* vyokoro ivyo ni vyokoro nadi.*+
4 Kweni usange chokoro chinyake chili na ŵana panji ŵazukuru, aŵa ŵasambire dankha kusopa Chiuta mwakujipeleka mu nyumba zawo+ na kuŵawezgera vyakwenelera ŵapapi na ŵagogo ŵawo,+ pakuti ichi chikukondweska Chiuta.+
5 Mwanakazi uyo ni chokoro nadi ndipo walije pakukora, wakuŵika chigomezgo chake mwa Chiuta,+ nakuti wakukosera mu maŵeyelero na malurombo usiku na muhanya.+
6 Kweni uyo wakujipeleka kuti wakondweske makhumbiro gha thupi ngwakufwa nangauli ngwamoyo.
7 Ntheura lutilira kupeleka ulongozgi uwu* kuti ŵaŵe ŵambura kafukwa.
8 Usange munthu wakutondeka kupwelelera ŵabali ŵake, chomenechomene awo mbamunyumba yake, wakana chipulikano ndipo ni muheni chomene kuluska munthu wambura chipulikano.+
9 Chokoro chilembeke pa ndondomeko ya wovwiri para chakwaniska vyaka 60, chokoro ichi chiŵe icho chikaŵa na mfumu yumoza.
10 Chokoro ichi chiŵe na ukaboni wa milimo yiwemi+ nga nkhulera ŵana makora,+ kupokelera ŵalendo,+ kugeziska malundi gha ŵatuŵa,+ kovwira ŵakusuzgika,+ ndiposo kulimbikira mulimo uliwose uwemi.
11 Kweni leka kulemba awo ni vyokoro viwukirano, chifukwa para makhumbiro ghakuti ŵaŵe na ŵanalume ghakura, ŵakuwukako kwa Khristu ndipo ŵakukhumba kutengwa.
12 Ŵazamweruzgika chifukwa chakuti ŵaleka chipulikano icho ŵakalongora pakwamba.*
13 Nyengo yeneyiyo pera, ŵakuchita ukata na kuyingayinga mu zinyumba. Ŵakuchita ukata pera yayi kweniso ŵakusesa na kunjilirapo nkhani zaŵene,+ ŵakuyowoya vinthu ivyo ŵakwenera kuyowoya yayi.
14 Ntheura nkhukhumba kuti awo ni vyokoro viwukirano ŵatengwe,+ ŵababe ŵana,+ na kupwelelera ŵamunyumba zawo, kuti wakususka waŵavye mwaŵi wa kususka.
15 Ŵanyake ŵapatuskika kale ndipo ŵakulondezga Satana.
16 Usange mwanakazi waliyose wakugomezga wali na ŵabali ŵake awo ni vyokoro, wawovwirenge vyokoro ivi mwakuti mpingo uleke kuŵa na mphingo. Ndipo mpingo wovwire awo ni vyokoro nadi.*+
17 Ŵalara awo ŵakulongozga makora+ ŵapike ntchindi zikuru,+ chomene awo ŵakulimbikira kuyowoya na kusambizga mazgu gha Chiuta.+
18 Pakuti lemba likuti: “Ng’ombe ungayikakanga ku mulomo yayi para yikupwantha tirigu,”+ kweniso, “Wantchito wakwenera kupokera malipiro ghake.”+
19 Uleke kupulikira para munthu wakuti mulara* wali na mulandu usange palije ukaboni wa ŵanthu ŵaŵiri panji ŵatatu.+
20 Ŵanthu awo ŵakuchita kwananga uŵachenye+ pamaso pa wose,+ mwakuti ŵanyake nawo ŵaŵe na wofi.*
21 Nkhukuphalira panthazi pa Chiuta na Khristu Yesu na ŵangelo ŵakusoleka, kuti ulondezgenge ulongozgi uwu kwambura kutemwera panji sankho.+
22 Ungachimbiliranga yayi kuŵika mawoko pa munthu,*+ nesi kupokako zakwananga za ŵanyake, ujisungilire mutuŵa.
23 Ungamwangaso maji yayi,* kweni umwengepo vinyo pachoko, chifukwa cha mu nthumbo mwako na ulwari uwo ukukusuzga nyengo zinandi.
24 Zakwananga za ŵanthu ŵanyake zikuwoneka pakweru, kulongozgera ku cheruzgo, kweni za ŵanthu ŵanyake zikuzakawoneka pamanyuma.+
25 Mwakuyana waka, milimo yiwemi yikuwoneka pakweru+ ndipo iyo yikuleka kuwoneka yingalutilira yayi kubisika.+
Mazgu Ghamusi
^ Mazgu gheneko, “Chindika.”
^ Panji kuti, “vyokoro ivyo vikusoŵa pakukora,” kung’anamura, ivyo vilije munthu wakuti waviwovwire.
^ Panji kuti, “malango agha.”
^ Panji kuti, “layizgo lawo lakwamba.”
^ Panji kuti, “vyokoro ivyo vikusoŵa pakukora,” kung’anamura, ivyo vilije munthu wakuti waviwovwire.
^ Panji kuti, “munthu mulara.”
^ Panji kuti, “kuti liŵe chenjezgo ku ŵanyake.”
^ Ndiko kuti, kuchimbilira kuŵika munthu pa udindo yayi.
^ Panji kuti, “Leka kumwa maji pera.”
