Salimo 109:1-31
Kwa wakulongozga sumu. Salimo la Davide. Sumu.
109 A Chiuta, imwe nkhumulumbani,+ mungakhalanga chete yayi.
2 Pakuti ŵaheni na ŵapusikizgi ŵakujura milomo yawo kwimikana nane.
Ŵakuyowoya vya ine na malulimi ghautesi.+
3 Ŵakunizingilizga na mazgu ghathinkho,Ŵakuniwukira kwambura chifukwa.+
4 Apo ine nkhuŵatemwa, iwo ŵakulimbana nane.+Kweni nkhulutilira kulomba.
5 Ŵakuniwezgera uheni pa uwemi+Na thinkho pa chitemwa icho nkhuŵalongora.+
6 Mwimike pa iyo munthu muheni,Wakupindikana* nayo wimilire ku woko lake lamalyero.
7 Para wakweruzgika, wasangike na mulandu.Lurombo lwake nalo luŵe nga nkhwananga.+
8 Mazuŵa ghake ghaŵe ghachoko.+Mulimo wake wa ulaŵiliri munthu munyake watore.+
9 Ŵana ŵake ŵazgoke ŵalanda,Muwoli wake waŵe chokoro.
10 Ŵana ŵake ŵayingeyinge na kupempheska,Kupepeta vyakurya mu vikaya vyawo ivyo vyapasulika.
11 Uyo wali nayo na ngongoli watore* vyose ivyo wali navyo,Ŵalendo ŵayore katundu wake.
12 Paŵavye munthu wamuchitire lusungu,Paŵavye munthu wachitire uwemi ŵana ŵake ŵalanda.
13 Mphapu yake yidumulike.+Zina lawo lisisitike mu muwiro.
14 Ubudi wa ŵasekuru ŵake ukumbukike na Yehova,+Kwananga kwa anyina kuleke kusisitika.
15 Mphanyi nyengo zose Yehova wakumbuka ivyo ŵali kuchita.Ndipo wadumure chikumbukiro chawo pa charu chapasi.+
16 Pakuti iyo wakakumbuka yayi kulongora lusungu,+Kweni wakalutilira kuskera munthu wakuyuzgika,+ mukavu, na wakusweka mtima,Kuti wamukome.+
17 Wakatemwanga kutemba, ntheura nthembo ndiyo yikiza pa iyo.Wakakhumbanga yayi kutumbika, ntheura nayo wakapokera yayi thumbiko.
18 Wakavwara nthembo nga ntchakuvwara.
Zikapungulika mu thupi lake nga ni maji,Mu viwangwa vyake nga ni mafuta.
19 Nthembo zake ziŵe nga ntchakuvwara icho wajibungilizga nacho+Kweniso nga ni lamba uyo wakuvwara nyengo zose.
20 Iyi ndiyo ni njombe ya munthu uyo wakulimbana nane yakufuma kwa Yehova+Na ya awo ŵakuniyowoyera viheni.
21 Kweni imwe, Yehova Fumu Yikuru,Novwirani chifukwa cha zina linu.+
Nithaskani, chifukwa cha uwemi wa lusungu* lwinu.+
22 Pakuti nili wakusokwa na mukavu,+Ndipo mtima wane walasika mukati.+
23 Nkhuzgeŵelekera nga ni muzgezge.Nakhung’unthika nga ni zombe.
24 Makongono ghane ghateluka chifukwa cha kuziŵizga kurya,Thupi lane laghanda, ndipo nkhuphapa.*
25 Nazgoka chakusekeska kwa iwo.+
Para ŵaniwona, ŵakupukunya mitu yawo.+
26 Novwirani, mwe Yehova Chiuta wane.Niponoskani na lusungu* lwinu.
27 Mphanyi ŵamanya kuti ichi chachitika na woko linu.Kuti imwe, A Yehova, ndimwe mwachichita.
28 Lekani ŵatembe, kweni imwe pelekani thumbiko.
Ŵakhozgeke soni para ŵakuniwukira,Kweni muteŵeti winu wasekelere.
29 Awo ŵakulimbana nane ŵavwalikike soni,Ŵavungilizgike na soni zawo nga ni munjilira.+
30 Mulomo wane ulumbenge Yehova kwambura kuleka,Nimulumbenge pamaso pa ŵanthu ŵanandi.+
31 Pakuti iyo wimilirenge ku woko lamalyero la mukavu,Kuti wamuponoske ku awo ŵakumupa mulandu.
Mazgu Ghamusi
^ Panji kuti, “Wakususkana.”
^ Panji kuti, “Ŵakatapira ŵathye vipingo pa.”
^ Panji kuti, “chitemwa chakugomezgeka.”
^ Mazgu gheneko, “Thupi lane laghanda, lilije mafuta.”
^ Panji kuti, “chitemwa chakugomezgeka.”
